૫. અધિકરણાધિપ્પાયો

૩૪૮. વિવાદાધિકરણં હોતિ અનુવાદાધિકરણં, હોતિ આપત્તાધિકરણં, હોતિ કિચ્ચાધિકરણં. વિવાદાધિકરણં ન હોતિ અનુવાદાધિકરણં, ન હોતિ આપત્તાધિકરણં, ન હોતિ કિચ્ચાધિકરણં; અપિ ચ, વિવાદાધિકરણપચ્ચયા હોતિ અનુવાદાધિકરણં, હોતિ આપત્તાધિકરણં, હોતિ કિચ્ચાધિકરણં. યથા કથં વિય? [ચૂળવ. ૨૧૫; પરિ. ૩૧૪] ઇધ ભિક્ખૂ વિવદન્તિ – ધમ્મોતિ વા અધમ્મોતિ વા દુટ્ઠુલ્લાપત્તીતિ વા અદુટ્ઠુલ્લાપત્તીતિ વા. યં તત્થ ભણ્ડનં કલહો વિગ્ગહો વિવાદો નાનાવાદો અઞ્ઞથાવાદો વિપચ્ચતાય વોહારો મેધકં, ઇદં વુચ્ચતિ વિવાદાધિકરણં. વિવાદાધિકરણે સઙ્ઘો વિવદતિ વિવાદાધિકરણં. વિવદમાનો અનુવદતિ અનુવાદાધિકરણં. અનુવદમાનો આપત્તિં આપજ્જતિ આપત્તાધિકરણં. તાય આપત્તિયા સઙ્ઘો કમ્મં કરોતિ કિચ્ચાધિકરણં. એવં વિવાદાધિકરણપચ્ચયા હોતિ અનુવાદાધિકરણં, હોતિ આપત્તાધિકરણં, હોતિ કિચ્ચાધિકરણં.

અનુવાદાધિકરણં હોતિ આપત્તાધિકરણં, હોતિ કિચ્ચાધિકરણં, હોતિ વિવાદાધિકરણં. અનુવાદાધિકરણં ન હોતિ આપત્તાધિકરણં, ન હોતિ કિચ્ચાધિકરણં, ન હોતિ વિવાદાધિકરણં; અપિ ચ, અનુવાદાધિકરણપચ્ચયા હોતિ આપત્તાધિકરણં, હોતિ કિચ્ચાધિકરણં, હોતિ વિવાદાધિકરણં. યથા કથં વિય? ઇધ ભિક્ખૂ ભિક્ખું અનુવદન્તિ સીલવિપત્તિયા વા આચારવિપત્તિયા વા દિટ્ઠિવિપત્તિયા વા આજીવવિપત્તિયા વા. યો તત્થ અનુવાદો અનુવદના અનુલ્લપના અનુભણના અનુસમ્પવઙ્કતા અબ્ભુસ્સહનતા અનુબલપ્પદાનં, ઇદં વુચ્ચતિ અનુવાદાધિકરણં. અનુવાદાધિકરણે સઙ્ઘો વિવદતિ, વિવાદાધિકરણં. વિવદમાનો અનુવદતિ, અનુવાદાધિકરણં. અનુવદમાનો આપત્તિં આપજ્જતિ, આપત્તાધિકરણં. તાય આપત્તિયા સઙ્ઘો કમ્મં કરોતિ, કિચ્ચાધિકરણં. એવં અનુવાદાધિકરણપચ્ચયા હોતિ આપત્તાધિકરણં, હોતિ કિચ્ચાધિકરણં, હોતિ વિવાદાધિકરણં.

આપત્તાધિકરણં હોતિ કિચ્ચાધિકરણં, હોતિ વિવાદાધિકરણં, હોતિ અનુવાદાધિકરણં. આપત્તાધિકરણં ન હોતિ કિચ્ચાધિકરણં, ન હોતિ વિવાદાધિકરણં, ન હોતિ અનુવાદાધિકરણં; અપિ ચ, આપત્તાધિકરણપચ્ચયા હોતિ કિચ્ચાધિકરણં, હોતિ વિવાદાધિકરણં, હોતિ અનુવાદાધિકરણં. યથા કથં વિય? [ચૂળવ. ૨૧૫; પરિ. ૩૪૮] પઞ્ચપિ આપત્તિક્ખન્ધા આપત્તાધિકરણં, સત્તપિ આપત્તિક્ખન્ધા આપત્તાધિકરણં, ઇદં વુચ્ચતિ આપત્તાધિકરણં. આપત્તાધિકરણે સઙ્ઘો વિવદતિ વિવાદાધિકરણં. વિવદમાનો અનુવદતિ અનુવાદાધિકરણં. અનુવદમાનો આપત્તિં આપજ્જતિ આપત્તાધિકરણં. તાય આપત્તિયા સઙ્ઘો કમ્મં કરોતિ કિચ્ચાધિકરણં. એવં આપત્તાધિકરણપચ્ચયા હોતિ કિચ્ચાધિકરણં, હોતિ વિવાદાધિકરણં, હોતિ અનુવાદાધિકરણં.

કિચ્ચાધિકરણં હોતિ વિવાદાધિકરણં, હોતિ અનુવાદાધિકરણં, હોતિ આપત્તાધિકરણં. કિચ્ચાધિકરણં ન હોતિ વિવાદાધિકરણં, ન હોતિ અનુવાદાધિકરણં, ન હોતિ આપત્તાધિકરણં; અપિ ચ, કિચ્ચાધિકરણપચ્ચયા હોતિ વિવાદાધિકરણં, હોતિ અનુવાદાધિકરણં, હોતિ આપત્તાધિકરણં. યથા કથં વિય? યા સઙ્ઘસ્સ કિચ્ચયતા કરણીયતા અપલોકનકમ્મં ઞત્તિકમ્મં ઞત્તિદુતિયકમ્મં ઞત્તિચતુત્થકમ્મં, ઇદં વુચ્ચતિ કિચ્ચાધિકરણં. કિચ્ચાધિકરણે સઙ્ઘો વિવદતિ વિવાદાધિકરણં. વિવદમાનો અનુવદતિ અનુવાદાધિકરણં. અનુવદમાનો આપત્તિં આપજ્જતિ આપત્તાધિકરણં. તાય આપત્તિયા સઙ્ઘો કમ્મં કરોતિ કિચ્ચાધિકરણં. એવં કિચ્ચાધિકરણપચ્ચયા હોતિ વિવાદાધિકરણં, હોતિ અનુવાદાધિકરણં, હોતિ આપત્તાધિકરણં.