૧૦. દસકવારો

૩૩૦. દસ આઘાતવત્થૂનિ. દસ આઘાતપટિવિનયા. દસ વિનીતવત્થૂનિ. દસવત્થુકા મિચ્છાદિટ્ઠિ. દસવત્થુકા સમ્માદિટ્ઠિ. દસ અન્તગ્ગાહિકા દિટ્ઠિ. દસ મિચ્છત્તા. દસ સમ્મત્તા. દસ અકુસલકમ્મપથા. દસ કુસલકમ્મપથા. દસ અધમ્મિકા સલાકગ્ગાહા. દસ ધમ્મિકા સલાકગ્ગાહા. સામણેરાનં દસ સિક્ખાપદાનિ. દસહઙ્ગેહિ સમન્નાગતો સામણેરો નાસેતબ્બો.

દસહઙ્ગેહિ સમન્નાગતો વિનયધરો બાલો ત્વેવ સઙ્ખં ગચ્છતિ – અત્તનો ભાસપરિયન્તં ન ઉગ્ગણ્હાતિ, પરસ્સ ભાસપરિયન્તં ન ઉગ્ગણ્હાતિ, અત્તનો ભાસપરિયન્તં અનુગ્ગહેત્વા પરસ્સ ભાસપરિયન્તં અનુગ્ગહેત્વા અધમ્મેન કારેતિ, અપ્પટિઞ્ઞાય આપત્તિં ન જાનાતિ, આપત્તિયા મૂલં ન જાનાતિ, આપત્તિસમુદયં ન જાનાતિ, આપત્તિનિરોધં ન જાનાતિ, આપત્તિનિરોધગામિનિં પટિપદં ન જાનાતિ.

દસહઙ્ગેહિ સમન્નાગતો વિનયધરો પણ્ડિતો ત્વેવ સઙ્ખં ગચ્છતિ – અત્તનો ભાસપરિયન્તં ઉગ્ગણ્હાતિ, પરસ્સ ભાસપરિયન્તં ઉગ્ગણ્હાતિ, અત્તનો ભાસપરિયન્તં ઉગ્ગહેત્વા પરસ્સ ભાસપરિયન્તં ઉગ્ગહેત્વા ધમ્મેન કારેતિ, પટિઞ્ઞાય આપત્તિં જાનાતિ, આપત્તિયા મૂલં જાનાતિ, આપત્તિસમુદયં જાનાતિ, આપત્તિનિરોધં જાનાતિ, આપત્તિનિરોધગામિનિં પટિપદં જાનાતિ.

અપરેહિપિ દસહઙ્ગેહિ સમન્નાગતો વિનયધરો બાલો ત્વેવ સઙ્ખં ગચ્છતિ – અધિકરણં ન જાનાતિ, અધિકરણસ્સ મૂલં ન જાનાતિ, અધિકરણસમુદયં ન જાનાતિ, અધિકરણનિરોધં ન જાનાતિ, અધિકરણનિરોધગામિનિં પટિપદં ન જાનાતિ, વત્થું ન જાનાતિ, નિદાનં [ઉદ્દાનં (ક.)] ન જાનાતિ, પઞ્ઞત્તિં ન જાનાતિ, અનુપઞ્ઞત્તિં ન જાનાતિ, અનુસન્ધિવચનપથં ન જાનાતિ.

દસહઙ્ગેહિ સમન્નાગતો વિનયધરો પણ્ડિતો ત્વેવ સઙ્ખં ગચ્છતિ – અધિકરણં જાનાતિ, અધિકરણસ્સ મૂલં જાનાતિ, અધિકરણસમુદયં જાનાતિ, અધિકરણનિરોધં જાનાતિ, અધિકરણનિરોધગામિનિં પટિપદં જાનાતિ, વત્થું જાનાતિ, નિદાનં જાનાતિ, પઞ્ઞત્તિં જાનાતિ, અનુપઞ્ઞત્તિં જાનાતિ, અનુસન્ધિવચનપથં જાનાતિ.

અપરેહિપિ દસહઙ્ગેહિ સમન્નાગતો વિનયધરો બાલો ત્વેવ સઙ્ખં ગચ્છતિ – ઞત્તિં ન જાનાતિ, ઞત્તિયા કરણં ન જાનાતિ, ન પુબ્બકુસલો હોતિ, ન અપરકુસલો હોતિ, અકાલઞ્ઞૂ ચ હોતિ, આપત્તાનાપત્તિં ન જાનાતિ, લહુકગરુકં આપત્તિં ન જાનાતિ, સાવસેસાનવસેસં આપત્તિં ન જાનાતિ, દુટ્ઠુલ્લાદુટ્ઠુલ્લં આપત્તિં ન જાનાતિ, આચરિયપરમ્પરા ખો પનસ્સ ન સુગ્ગહિતા હોતિ ન સુમનસિકતા ન સૂપધારિતા.

દસહઙ્ગેહિ સમન્નાગતો વિનયધરો પણ્ડિતો ત્વેવ સઙ્ખં ગચ્છતિ – ઞત્તિં જાનાતિ, ઞત્તિયા કરણં જાનાતિ, પુબ્બકુસલો હોતિ, અપરકુસલો હોતિ, કાલઞ્ઞૂ ચ હોતિ, આપત્તાનાપત્તિં જાનાતિ, લહુકગરુકં આપત્તિં જાનાતિ, સાવસેસાનવસેસં આપત્તિં જાનાતિ, દુટ્ઠુલ્લાદુટ્ઠુલ્લં આપત્તિં જાનાતિ, આચરિયપરમ્પરા ખો પનસ્સ સુગ્ગહિતા હોતિ સુમનસિકતા સૂપધારિતા.

અપરેહિપિ દસહઙ્ગેહિ સમન્નાગતો વિનયધરો બાલો ત્વેવ સઙ્ખં ગચ્છતિ – આપત્તાનાપત્તિં ન જાનાતિ, લહુકગરુકં આપત્તિં ન જાનાતિ, સાવસેસાનવસેસં આપત્તિં ન જાનાતિ, દુટ્ઠુલ્લાદુટ્ઠુલ્લં આપત્તિં ન જાનાતિ, ઉભયાનિ ખો પનસ્સ પાતિમોક્ખાનિ વિત્થારેન ન સ્વાગતાનિ હોન્તિ ન સુવિભત્તાનિ ન સુપ્પવત્તીનિ ન સુવિનિચ્છિતાનિ સુત્તસો અનુબ્યઞ્જનસો, આપત્તાનાપત્તિં ન જાનાતિ, લહુકગરુકં આપત્તિં ન જાનાતિ, સાવસેસાનવસેસં આપત્તિં ન જાનાતિ, દુટ્ઠુલ્લાદુટ્ઠુલ્લં આપત્તિં ન જાનાતિ, અધિકરણે ચ ન વિનિચ્છયકુસલો હોતિ.

દસહઙ્ગેહિ સમન્નાગતો વિનયધરો પણ્ડિતો ત્વેવ સઙ્ખં ગચ્છતિ – આપત્તાનાપત્તિં જાનાતિ, લહુકગરુકં આપત્તિં જાનાતિ, સાવસેસાનવસેસં આપત્તિં જાનાતિ, દુટ્ઠુલ્લાદુટ્ઠુલ્લં આપત્તિં જાનાતિ, ઉભયાનિ ખો પનસ્સ પાતિમોક્ખાનિ વિત્થારેન સ્વાગતાનિ હોન્તિ સુવિભત્તાનિ સુપ્પવત્તીનિ સુવિનિચ્છિતાનિ સુત્તસો અનુબ્યઞ્જનસો, આપત્તાનાપત્તિં જાનાતિ, લહુકગરુકં આપત્તિં જાનાતિ, સાવસેસાનવસેસં આપત્તિં જાનાતિ, દુટ્ઠુલ્લાદુટ્ઠુલ્લં આપત્તિં જાનાતિ, અધિકરણે ચ વિનિચ્છયકુસલો હોતિ.

[અ. નિ. ૧૦.૩૩] દસહઙ્ગેહિ સમન્નાગતો ભિક્ખુ ઉબ્બાહિકાય સમ્મન્નિતબ્બો. દસ અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દસ આદીનવા રાજન્તેપુરપ્પવેસને. દસ દાનવત્થૂનિ. દસ રતનાનિ. દસવગ્ગો ભિક્ખુસઙ્ઘો. દસવગ્ગેન ગણેન ઉપસમ્પાદેતબ્બં. દસ પંસુકૂલાનિ. દસ ચીવરધારણા [ચીવરધારણાનિ (સ્યા.)]. દસાહપરમં અતિરેકચીવરં ધારેતબ્બં. દસ સુક્કાનિ. દસ ઇત્થિયો. દસ ભરિયાયો. વેસાલિયા દસ વત્થૂનિ દીપેન્તિ. દસ પુગ્ગલા અવન્દિયા. દસ અક્કોસવત્થૂનિ. દસહાકારેહિ પેસુઞ્ઞં ઉપસંહરતિ. દસ સેનાસનાનિ. દસ વરાનિ યાચિંસુ. દસ અધમ્મિકાનિ પાતિમોક્ખટ્ઠપનાનિ. દસ ધમ્મિકાનિ પાતિમોક્ખટ્ઠપનાનિ. દસાનિસંસા યાગુયા. દસ મંસા અકપ્પિયા. દસ પરમાનિ. દસવસ્સેન ભિક્ખુના બ્યત્તેન પટિબલેન પબ્બાજેતબ્બં ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો. દસવસ્સાય ભિક્ખુનિયા બ્યત્તાય પટિબલાય પબ્બાજેતબ્બં ઉપસમ્પાદેતબ્બં નિસ્સયો દાતબ્બો સામણેરી ઉપટ્ઠાપેતબ્બા. દસવસ્સાય ભિક્ખુનિયા બ્યત્તાય પટિબલાય વુટ્ઠાપનસમ્મુતિ સાદિતબ્બા. દસવસ્સાય ગિહિગતાય સિક્ખા દાતબ્બાતિ.

દસકં નિટ્ઠિતં.

તસ્સુદ્દાનં –

આઘાતં વિનયં વત્થુ, મિચ્છા સમ્મા ચ અન્તગા;

મિચ્છત્તા ચેવ સમ્મત્તા, અકુસલા કુસલાપિ ચ.

સલાકા અધમ્મા ધમ્મા, સામણેરા ચ નાસના;

ભાસાધિકરણઞ્ચેવ, ઞત્તિલહુકમેવ ચ.

લહુકા ગરુકા એતે, કણ્હસુક્કા વિજાનથ;

ઉબ્બાહિકા ચ સિક્ખા ચ, અન્તેપુરે ચ વત્થૂનિ.

રતનં દસવગ્ગો ચ, તથેવ ઉપસમ્પદા;

પંસુકૂલધારણા ચ, દસાહસુક્કઇત્થિયો.

ભરિયા દસ વત્થૂનિ, અવન્દિયક્કોસેન ચ;

પેસુઞ્ઞઞ્ચેવ સેનાનિ, વરાનિ ચ અધમ્મિકા.

ધમ્મિકા યાગુમંસા ચ, પરમા ભિક્ખુ ભિક્ખુની;

વુટ્ઠાપના ગિહિગતા, દસકા સુપ્પકાસિતાતિ.