૧૧. એકાદસકવારો

૩૩૧. એકાદ પુગ્ગલા અનુપસમ્પન્ના ન ઉપસમ્પાદેતબ્બા, ઉપસમ્પન્ના નાસેતબ્બા. એકાદસ પાદુકા અકપ્પિયા. એકાદસ પત્તા અકપ્પિયા. એકાદસ ચીવરાનિ અકપ્પિયાનિ. એકાદસ યાવતતિયકા. ભિક્ખુનીનં એકાદસ અન્તરાયિકા ધમ્મા પુચ્છિતબ્બા. એકાદસ ચીવરાનિ અધિટ્ઠાતબ્બાનિ. એકાદસ ચીવરાનિ ન વિકપ્પેતબ્બાનિ. એકાદસે અરુણુગ્ગમને નિસ્સગ્ગિયં હોતિ. એકાદસ ગણ્ઠિકા કપ્પિયા. એકાદસ વિધા [વીથા (સ્યા.)] કપ્પિયા. એકાદસ પથવી અકપ્પિયા. એકાદસ પથવી કપ્પિયા. એકાદસ નિસ્સયપટિપ્પસ્સદ્ધિયો. એકાદસ પુગ્ગલા અવન્દિયા. એકાદસ પરમાનિ. એકાદસ વરાનિ યાચિંસુ. એકાદસ સીમાદોસા. અક્કોસકપરિભાસકે પુગ્ગલે એકાદસાદીનવા પાટિકઙ્ખા. [અ. નિ. ૧૧.૧૫; મિ. પ. ૪.૪.૬] મેત્તાય ચેતોવિમુત્તિયા આસેવિતાય ભાવિતાય બહુલીકતાય યાનીકતાય વત્થુકતાય અનુટ્ઠિતાય પરિચિતાય સુસમારદ્ધાય એકાદસાનિસંસા પાટિકઙ્ખા. સુખં સુપતિ, સુખં પટિબુજ્ઝતિ, ન પાપકં સુપિનં પસ્સતિ, મનુસ્સાનં પિયો હોતિ, અમનુસ્સાનં પિયો હોતિ, દેવતા રક્ખન્તિ, નાસ્સ અગ્ગિ વા વિસં વા સત્થં વા કમતિ, તુવટ્ટં ચિત્તં સમાધિયતિ, મુખવણ્ણો વિપ્પસીદતિ, અસમ્મૂળ્હો કાલઙ્કરોતિ, ઉત્તરિ અપ્પટિવિજ્ઝન્તો બ્રહ્મલોકૂપગો હોતિ – મેત્તાય ચેતોવિમુત્તિયા આસેવિતાય ભાવિતાય બહુલીકતાય યાનીકતાય વત્થુકતાય અનુટ્ઠિતાય પરિચિતાય સુસમારદ્ધાય ઇમે એકાદસાનિસંસા પાટિકઙ્ખાતિ.

એકાદસકં નિટ્ઠિતં.

તસ્સુદ્દાનં –

નાસેતબ્બા પાદુકા ચ, પત્તા ચ ચીવરાનિ ચ;

તતિયા પુચ્છિતબ્બા ચ, અધિટ્ઠાનવિકપ્પના.

અરુણા ગણ્ઠિકા વિધા, અકપ્પિયા ચ કપ્પિયં;

નિસ્સયાવન્દિયા ચેવ, પરમાનિ વરાનિ ચ;

સીમાદોસા ચ અક્કોસા, મેત્તાયેકાદસા કતાતિ.

એકુત્તરિકનયો.

તસ્સુદ્દાનં –

એકકા ચ દુકા ચેવ, તિકા ચ ચતુપઞ્ચકા;

છસત્તટ્ઠનવકા ચ, દસ એકાદસાનિ ચ.

હિતાય સબ્બસત્તાનં, ઞાતધમ્મેન તાદિના;

એકુત્તરિકા વિમલા, મહાવીરેન દેસિતાતિ.

એકુત્તરિકનયો નિટ્ઠિતો.