૨૦. સમુટ્ઠાપનવારો

૩૧૪. વિવાદાધિકરણં ચતુન્નં અધિકરણાનં કતમં અધિકરણં સમુટ્ઠાપેતિ? વિવાદાધિકરણં ચતુન્નં અધિકરણાનં ન કતમં અધિકરણં સમુટ્ઠાપેતિ; અપિચ, વિવાદાધિકરણપચ્ચયા ચત્તારો અધિકરણા જાયન્તિ. યથા કથં વિય? [ચૂળવ. ૨૧૫; પરિ. ૩૪૮ આદયો] ઇધ ભિક્ખૂ વિવદન્તિ – ‘‘ધમ્મોતિ વા, અધમ્મોતિ વા, વિનયોતિ વા, અવિનયોતિ વા, અભાસિતં અલપિતં તથાગતેનાતિ વા, ભાસિતં લપિતં તથાગતેનાતિ વા, અનાચિણ્ણં તથાગતેનાતિ વા, આચિણ્ણં તથાગતેનાતિ વા, અપઞ્ઞત્તં તથાગતેનાતિ વા, પઞ્ઞત્તં તથાગતેનાતિ વા, આપત્તીતિ વા, અનાપત્તીતિ વા, લહુકા આપત્તીતિ વા, ગરુકા આપત્તીતિ વા, સાવસેસા આપત્તીતિ વા, અનવસેસા આપત્તીતિ વા, દુટ્ઠુલ્લા આપત્તીતિ વા અદુટ્ઠુલ્લા આપત્તીતિ વા’’. યં તત્થ ભણ્ડનં કલહો વિગ્ગહો વિવાદો નાનાવાદો અઞ્ઞથાવાદો વિપચ્ચતાય વોહારો મેધકં [મેધગં (ક.)], ઇદં વુચ્ચતિ વિવાદાધિકરણં. વિવાદાધિકરણે સઙ્ઘો વિવદતિ. વિવાદાધિકરણં વિવદમાનો અનુવદતિ. અનુવાદાધિકરણં અનુવદમાનો આપત્તિં આપજ્જતિ આપત્તાધિકરણં. તાય આપત્તિયા સઙ્ઘો કમ્મં કરોતિ કિચ્ચાધિકરણં. એવં વિવાદાધિકરણપચ્ચયા ચત્તારો અધિકરણા જાયન્તિ.

૩૧૫. અનુવાદાધિકરણં ચતુન્નં અધિકરણાનં કતમં અધિકરણં સમુટ્ઠાપેતિ? અનુવાદાધિકરણં ચતુન્નં અધિકરણાનં ન કતમં અધિકરણં સમુટ્ઠાપેતિ; અપિચ, અનુવાદાધિકરણપચ્ચયા ચત્તારો અધિકરણા જાયન્તિ. યથા કથં વિય? [ચૂળવ. ૨૧૫; પરિ. ૩૪૮ આદયો] ઇધ ભિક્ખૂ ભિક્ખું અનુવદન્તિ સીલવિપત્તિયા વા આચારવિપત્તિયા વા દિટ્ઠિવિપત્તિયા વા આજીવવિપત્તિયા વા. યો તત્થ અનુવાદો અનુવદના અનુલ્લપના અનુભણના અનુસમ્પવઙ્કતા અબ્ભુસ્સહનતા અનુબલપ્પદાનં, ઇદં વુચ્ચતિ અનુવાદાધિકરણં. અનુવાદાધિકરણે સઙ્ઘો વિવદતિ. વિવાદાધિકરણં વિવદમાનો અનુવદતિ. અનુવાદાધિકરણં અનુવદમાનો આપત્તિં આપજ્જતિ આપત્તાધિકરણં. તાય આપત્તિયા સઙ્ઘો કમ્મં કરોતિ કિચ્ચાધિકરણં. એવં અનુવાદાધિકરણપચ્ચયા ચત્તારો અધિકરણા જાયન્તિ.

૩૧૬. આપત્તાધિકરણં ચતુન્નં અધિકરણાનં કતમં અધિકરણં સમુટ્ઠાપેતિ? આપત્તાધિકરણં ચતુન્નં અધિકરણાનં ન કતમં અધિકરણં સમુટ્ઠાપેતિ; અપિચ, આપત્તાધિકરણપચ્ચયા ચત્તારો અધિકરણા જાયન્તિ. યથા કથં વિય? પઞ્ચપિ આપત્તિક્ખન્ધા આપત્તાધિકરણં, સત્તપિ આપત્તિક્ખન્ધા આપત્તાધિકરણં, ઇદં વુચ્ચતિ આપત્તાધિકરણં. આપત્તાધિકરણે સઙ્ઘો વિવદતિ. વિવાદાધિકરણં વિવદમાનો અનુવદતિ. અનુવાદાધિકરણં અનુવદમાનો આપત્તિં આપજ્જતિ આપત્તાધિકરણં. તાય આપત્તિયા સઙ્ઘો કમ્મં કરોતિ કિચ્ચાધિકરણં. એવં આપત્તાધિકરણપચ્ચયા ચત્તારો અધિકરણા જાયન્તિ.

૩૧૭. કિચ્ચાધિકરણં ચતુન્નં અધિકરણાનં કતમં અધિકરણં સમુટ્ઠાપેતિ? કિચ્ચાધિકરણં ચતુન્નં અધિકરણાનં ન કતમં અધિકરણં સમુટ્ઠાપેતિ, અપિચ કિચ્ચાધિકરણપચ્ચયા ચત્તારો અધિકરણા જાયન્તિ. યથા કથં વિય? યા સઙ્ઘસ્સ કિચ્ચયતા કરણીયતા અપલોકનકમ્મં ઞત્તિકમ્મં ઞત્તિદુતિયકમ્મં ઞત્તિચતુત્થકમ્મં, ઇદં વુચ્ચતિ કિચ્ચાધિકરણં. કિચ્ચાધિકરણે સઙ્ઘો વિવદતિ. વિવાદાધિકરણં વિવદમાનો અનુવદતિ. અનુવાદાધિકરણં અનુવદમાનો આપત્તિં આપજ્જતિ આપત્તાધિકરણં. તાય આપત્તિયા સઙ્ઘો કમ્મં કરોતિ કિચ્ચાધિકરણં. એવં કિચ્ચાધિકરણપચ્ચયા ચત્તારો અધિકરણા જાયન્તિ.

સમુટ્ઠાપનવારો નિટ્ઠિતો વીસતિમો.