૧૬. સંસટ્ઠવારો

૩૦૬. અધિકરણન્તિ વા સમથાતિ વા ઇમે ધમ્મા સંસટ્ઠા ઉદાહુ વિસંસટ્ઠા? લબ્ભા ચ પનિમેસં ધમ્માનં વિનિબ્ભુજિત્વા વિનિબ્ભુજિત્વા [વિનિબ્ભુજ્જિત્વા વિનિબ્ભુજ્જિત્વા (ક.), ટીકાયં એકપદમેવ દિસ્સતિ] નાનાકરણં પઞ્ઞાપેતુન્તિ?

અધિકરણન્તિ વા સમથાતિ વા ઇમે ધમ્મા વિસંસટ્ઠા, નો સંસટ્ઠા. લબ્ભા ચ પનિમેસં ધમ્માનં વિનિબ્ભુજિત્વા વિનિબ્ભુજિત્વા નાનાકરણં પઞ્ઞાપેતુન્તિ. સો – ‘‘મા હેવ’’ન્તિસ્સ વચનીયો. અધિકરણન્તિ વા સમથાતિ વા ઇમે ધમ્મા સંસટ્ઠા, નો વિસંસટ્ઠા. નો ચ લબ્ભા [ન ચ લબ્ભા (ક.)] ઇમેસં ધમ્માનં વિનિબ્ભુજિત્વા વિનિબ્ભુજિત્વા નાનાકરણં પઞ્ઞાપેતું. તં કિસ્સ હેતુ? નનુ વુત્તં ભગવતા – ‘‘ચત્તારિમાનિ, ભિક્ખવે, અધિકરણાનિ, સત્ત સમથા. અધિકરણા સમથેહિ સમ્મન્તિ, સમથા અધિકરણેહિ સમ્મન્તિ. એવં, ઇમે ધમ્મા સંસટ્ઠા નો વિસંસટ્ઠા; નો ચ લબ્ભા ઇમેસં ધમ્માનં વિનિબ્ભુજિત્વા વિનિબ્ભુજિત્વા નાનાકરણં પઞ્ઞાપેતુ’’ન્તિ.

સંસટ્ઠવારો નિટ્ઠિતો સોળસમો.