૪. અવન્દનીયપુગ્ગલાદિ

૪૭૭. કતિ પુગ્ગલા નાભિવાદેતબ્બા, અઞ્જલિસામિચેન ચ;

કતિનં દુક્કટં હોતિ, કતિ ચીવરધારણા.

દસ પુગ્ગલા નાભિવાદેતબ્બા, અઞ્જલિસામિચેન ચ;

દસન્નં દુક્કટં હોતિ, દસ ચીવરધારણા.

કતિનં વસ્સંવુટ્ઠાનં, દાતબ્બં ઇધ ચીવરં;

કતિનં ભન્તે દાતબ્બં, કતિનઞ્ચેવ ન દાતબ્બં.

પઞ્ચન્નં વસ્સંવુટ્ઠાનં, દાતબ્બં ઇધ ચીવરં;

સત્તન્નં સન્તે દાતબ્બં, સોળસન્નં ન દાતબ્બં.

કતિસતં રત્તિસતં, આપત્તિયો છાદયિત્વાન;

કતિ રત્તિયો વસિત્વાન, મુચ્ચેય્ય પારિવાસિકો.

દસસતં રત્તિસતં, આપત્તિયો છાદયિત્વાન;

દસ રત્તિયો વસિત્વાન, મુચ્ચેય્ય પારિવાસિકો.

કતિ કમ્મદોસા વુત્તા, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, સબ્બેવ અધમ્મિકા [સબ્બે અધમ્મિકા (સી. સ્યા.)] કતિ.

દ્વાદસ કમ્મદોસા વુત્તા, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, સબ્બેવ અધમ્મિકા [સબ્બેવાધમ્મિકા (સી.), સબ્બે અધમ્મિકા (સ્યા.)] કતા.

કતિ કમ્મસમ્પત્તિયો વુત્તા, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, સબ્બેવ ધમ્મિકા કતિ.

ચતસ્સો કમ્મસમ્પત્તિયો વુત્તા, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, સબ્બેવ ધમ્મિકા કતા.

કતિ કમ્માનિ વુત્તાનિ, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, ધમ્મિકા અધમ્મિકા કતિ.

છ કમ્માનિ વુત્તાનિ, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, એકેત્થ ધમ્મિકા કતા;

પઞ્ચ અધમ્મિકા વુત્તા, બુદ્ધેનાદિચ્ચબન્ધુના.

કતિ કમ્માનિ વુત્તાનિ, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, ધમ્મિકા અધમ્મિકા કતિ.

ચત્તારિ કમ્માનિ વુત્તાનિ, બુદ્ધેનાદિચ્ચબન્ધુના;

ચમ્પાયં વિનયવત્થુસ્મિં, એકેત્થ ધમ્મિકા કતા;

તયો અધમ્મિકા વુત્તા, બુદ્ધેનાદિચ્ચબન્ધુના.

યં દેસિતંનન્તજિનેન તાદિના;

આપત્તિક્ખન્ધાનિ વિવેકદસ્સિના;

કતેત્થ સમ્મન્તિ વિના સમથેહિ;

પુચ્છામિ તં બ્રૂહિ વિભઙ્ગકોવિદ.

યં દેસિતંનન્તજિનેન તાદિના;

આપત્તિક્ખન્ધાનિ વિવેકદસ્સિના;

એકેત્થ સમ્મતિ વિના સમથેહિ;

એતં તે અક્ખામિ વિભઙ્ગકોવિદ.

કતિ આપાયિકા વુત્તા, બુદ્ધેનાદિચ્ચબન્ધુના;

વિનયં પટિજાનન્તસ્સ, વિનયાનિ [વિસયાનિ (સી. સ્યા. એવમુપરિપિ)] સુણોમ તે.

છઊનદિયડ્ઢસતા વુત્તા, બુદ્ધેનાદિચ્ચબન્ધુના;

આપાયિકા નેરયિકા, કપ્પટ્ઠા સઙ્ઘભેદકા;

વિનયં પટિજાનન્તસ્સ, વિનયાનિ સુણોહિ મે.

કતિ નાપાયિકા વુત્તા, બુદ્ધેનાદિચ્ચબન્ધુના;

વિનયં પટિજાનન્તસ્સ, વિનયાનિ સુણોમ તે.

અટ્ઠારસ નાપાયિકા વુત્તા, બુદ્ધેનાદિચ્ચબન્ધુના;

વિનયં પટિજાનન્તસ્સ, વિનયાનિ સુણોહિ મે.

કતિ અટ્ઠકા વુત્તા, બુદ્ધેનાદિચ્ચબન્ધુના;

વિનયં પટિજાનન્તસ્સ, વિનયાનિ સુણોમ તે.

અટ્ઠારસ અટ્ઠકા વુત્તા, બુદ્ધેનાદિચ્ચબન્ધુના;

વિનયં પટિજાનન્તસ્સ, વિનયાનિ સુણોહિ મે.