દુતિયગાથાસઙ્ગણિકં
૧. કાયિકાદિઆપત્તિ
૪૭૪. કતિ આપત્તિયો કાયિકા, કતિ વાચસિકા કતા.
છાદેન્તસ્સ કતિ આપત્તિયો, કતિ સંસગ્ગપચ્ચયા.
છાપત્તિયો કાયિકા, છ વાચસિકા કતા;
છાદેન્તસ્સ તિસ્સો આપત્તિયો, પઞ્ચ સંસગ્ગપચ્ચયા.
અરુણુગ્ગે કતિ આપત્તિયો, કતિ યાવતતિયકા;
કતેત્થ અટ્ઠ વત્થુકા, કતિહિ સબ્બસઙ્ગહો.
અરુણુગ્ગે તિસ્સો આપત્તિયો, દ્વે યાવતતિયકા;
એકેત્થ અટ્ઠ વત્થુકા, એકેન સબ્બસઙ્ગહો.
વિનયસ્સ કતિ મૂલાનિ, યાનિ બુદ્ધેન પઞ્ઞત્તા;
વિનયગરુકા કતિ વુત્તા, દુટ્ઠુલ્લચ્છાદના કતિ.
વિનયસ્સ દ્વે મૂલાનિ, યાનિ બુદ્ધેન પઞ્ઞત્તા;
વિનયગરુકા દ્વે વુત્તા, દ્વે દુટ્ઠુલ્લચ્છાદના.
ગામન્તરે કતિ આપત્તિયો, કતિ નદિપારપચ્ચયા;
કતિમંસેસુ થુલ્લચ્ચયં, કતિમંસેસુ દુક્કટં.
ગામન્તરે ચતસ્સો આપત્તિયો, ચતસ્સો નદિપારપચ્ચયા;
એકમંસે થુલ્લચ્ચયં, નવમંસેસુ દુક્કટં.
કતિ વાચસિકા રત્તિં, કતિ વાચસિકા દિવા;
દદમાનસ્સ કતિ આપત્તિયો, પટિગ્ગણ્હન્તસ્સ કિત્તકા.
દ્વે વાચસિકા રત્તિં, દ્વે વાચસિકા દિવા;
દદમાનસ્સ તિસ્સો આપત્તિયો, ચત્તારો ચ પટિગ્ગહે.
૨. દેસનાગામિનિયાદિઆપત્તિ
૪૭૫. કતિ દેસનાગામિનિયો, કતિ સપ્પટિકમ્મા કતા;
કતેત્થ અપ્પટિકમ્મા વુત્તા, બુદ્ધેનાદિચ્ચબન્ધુના.
પઞ્ચ દેસનાગામિનિયો, છ સપ્પટિકમ્મા કતા;
એકેત્થ અપ્પટિકમ્મા વુત્તા, બુદ્ધેનાદિચ્ચબન્ધુના.
વિનયગરુકા કતિ વુત્તા, કાયવાચસિકાનિ ચ;
કતિ વિકાલે ધઞ્ઞરસો, કતિ ઞત્તિચતુત્થેન સમ્મુતિ.
વિનયગરુકા દ્વે વુત્તા, કાયવાચસિકાનિ ચ;
એકો વિકાલે ધઞ્ઞરસો, એકા ઞત્તિચતુત્થેન સમ્મુતિ.
પારાજિકા કાયિકા કતિ, કતિ સંવાસકભૂમિયો;
કતિનં રત્તિચ્છેદો, પઞ્ઞત્તા દ્વઙ્ગુલા કતિ.
પારાજિકા કાયિકા દ્વે, દ્વે સંવાસકભૂમિયો;
દ્વિન્નં રત્તિચ્છેદો, પઞ્ઞત્તા દ્વઙ્ગુલા દુવે.
કતત્તાનં વધિત્વાન, કતિહિ સઙ્ઘો ભિજ્જતિ;
કતેત્થ પઠમાપત્તિકા, ઞત્તિયા કરણા કતિ.
દ્વે અત્તાનં વધિત્વાન, દ્વીહિ સઙ્ઘો ભિજ્જતિ;
દ્વેત્થ પઠમાપત્તિકા, ઞત્તિયા કરણા દુવે.
પાણાતિપાતે કતિ આપત્તિયો, વાચા પારાજિકા કતિ;
ઓભાસના કતિ વુત્તા, સઞ્ચરિત્તેન વા કતિ.
પાણાતિપાતે તિસ્સો આપત્તિયો;
વાચા પારાજિકા તયો;
ઓભાસના તયો વુત્તા;
સઞ્ચરિત્તેન વા તયો.
કતિ પુગ્ગલા ન ઉપસમ્પાદેતબ્બા, કતિ કમ્માનં સઙ્ગહા;
નાસિતકા કતિ વુત્તા, કતિનં એકવાચિકા.
તયો પુગ્ગલા ન ઉપસમ્પાદેતબ્બા, તયો કમ્માનં સઙ્ગહા;
નાસિતકા તયો વુત્તા, તિણ્ણન્નં એકવાચિકા.
અદિન્નાદાને કતિ આપત્તિયો, કતિ મેથુનપચ્ચયા;
છિન્દન્તસ્સ કતિ આપત્તિયો, કતિ છડ્ડિતપચ્ચયા.
અદિન્નાદાને તિસ્સો આપત્તિયો, ચતસ્સો મેથુનપચ્ચયા;
છિન્દન્તસ્સ તિસ્સો આપત્તિયો, પઞ્ચ છડ્ડિતપચ્ચયા.
ભિક્ખુનોવાદકવગ્ગસ્મિં, પાચિત્તિયેન દુક્કટા;
કતેત્થ નવકા વુત્તા, કતિનં ચીવરેન ચ.
ભિક્ખુનોવાદકવગ્ગસ્મિં, પાચિત્તિયેન દુક્કટા કતા;
ચતુરેત્થ નવકા વુત્તા, દ્વિન્નં ચીવરેન ચ.
ભિક્ખુનીનઞ્ચ અક્ખાતા, પાટિદેસનિયા કતિ;
ભુઞ્જન્તામકધઞ્ઞેન, પાચિત્તિયેન દુક્કટા કતિ.
ભિક્ખુનીનઞ્ચ અક્ખાતા, અટ્ઠ પાટિદેસનીયા કતા;
ભુઞ્જન્તામકધઞ્ઞેન, પાચિત્તિયેન દુક્કટા કતા.
ગચ્છન્તસ્સ કતિ આપત્તિયો, ઠિતસ્સ ચાપિ કિત્તકા;
નિસિન્નસ્સ કતિ આપત્તિયો, નિપન્નસ્સાપિ કિત્તકા.
ગચ્છન્તસ્સ ચતસ્સો આપત્તિયો, ઠિતસ્સ ચાપિ તત્તકા;
નિસિન્નસ્સ ચતસ્સો આપત્તિયો, નિપન્નસ્સાપિ તત્તકા.
૩. પાચિત્તિયં
૪૭૬. કતિ પાચિત્તિયાનિ, સબ્બાનિ નાનાવત્થુકાનિ;
અપુબ્બં અચરિમં, આપજ્જેય્ય એકતો.
પઞ્ચ પાચિત્તિયાનિ, સબ્બાનિ નાનાવત્થુકાનિ;
અપુબ્બં અચરિમં, આપજ્જેય્ય એકતો.
કતિ પાચિત્તિયાનિ, સબ્બાનિ નાનાવત્થુકાનિ;
અપુબ્બં અચરિમં, આપજ્જેય્ય એકતો.
ન પાચિત્તિયાનિ, સબ્બાનિ નાનાવત્થુકાનિ;
અપુબ્બં અચરિમં, આપજ્જેય્ય એકતો.
કતિ પાચિત્તિયાનિ, સબ્બાનિ નાનાવત્થુકાનિ;
કતિ વાચાય દેસેય્ય, વુત્તા આદિચ્ચબન્ધુના.
પઞ્ચ પાચિત્તિયાનિ, સબ્બાનિ નાનાવત્થુકાનિ;
એકવાચાય દેસેય્ય, વુત્તા આદિચ્ચબન્ધુના.
કતિ પાચિત્તિયાનિ, સબ્બાનિ નાનાવત્થુકાનિ;
કતિ વાચાય દેસેય્ય, વુત્તા આદિચ્ચબન્ધુના.
નવ પાચિત્તિયાનિ, સબ્બાનિ નાનાવત્થુકાનિ;
એકવાચાય દેસેય્ય, વુત્તા આદિચ્ચબન્ધુના.
કતિ પાચિત્તિયાનિ, સબ્બાનિ નાનાવત્થુકાનિ;
કિઞ્ચ કિત્તેત્વા દેસેય્ય, વુત્તા આદિચ્ચબન્ધુના.
પઞ્ચ પાચિત્તિયાનિ, સબ્બાનિ નાનાવત્થુકાનિ;
વત્થું કિત્તેત્વા દેસેય્ય, વુત્તા આદિચ્ચબન્ધુના.
કતિ પાચિત્તિયાનિ, સબ્બાનિ નાનાવત્થુકાનિ;
કિઞ્ચ કિત્તેત્વા દેસેય્ય, વુત્તા આદિચ્ચબન્ધુના.
નવ પાચિત્તિયાનિ, સબ્બાનિ નાનાવત્થુકાનિ;
વત્થું કિત્તેત્વા દેસેય્ય, વુત્તા આદિચ્ચબન્ધુના.
યાવતતિયકે કતિ આપત્તિયો, કતિ વોહારપચ્ચયા;
ખાદન્તસ્સ કતિ આપત્તિયો, કતિ ભોજનપચ્ચયા.
યાવતતિયકે તિસ્સો આપત્તિયો, છ વોહારપચ્ચયા;
ખાદન્તસ્સ તિસ્સો આપત્તિયો, પઞ્ચ ભોજનપચ્ચયા.
સબ્બા યાવતતિયકા, કતિ ઠાનાનિ ગચ્છન્તિ;
કતિનઞ્ચેવ આપત્તિ, કતિનં અધિકરણેન ચ.
સબ્બા યાવતતિયકા, પઞ્ચ ઠાનાનિ ગચ્છન્તિ;
પઞ્ચન્નઞ્ચેવ આપત્તિ, પઞ્ચન્નં અધિકરણેન ચ.
કતિનં વિનિચ્છયો હોતિ, કતિનં વૂપસમેન ચ;
કતિનઞ્ચેવ અનાપત્તિ, કતિહિ ઠાનેહિ સોભતિ.
પઞ્ચન્નં વિનિચ્છયો હોતિ, પઞ્ચન્નં વૂપસમેન ચ;
પઞ્ચન્નઞ્ચેવ અનાપત્તિ, તીહિ ઠાનેહિ સોભતિ.
કતિ કાયિકા રત્તિં, કતિ કાયિકા દિવા;
નિજ્ઝાયન્તસ્સ કતિ આપત્તિ, કતિ પિણ્ડપાતપચ્ચયા.
દ્વે કાયિકા રત્તિં, દ્વે કાયિકા દિવા;
નિજ્ઝાયન્તસ્સ એકા આપત્તિ, એકા પિણ્ડપાતપચ્ચયા.
કતાનિસંસે સમ્પસ્સં, પરેસં સદ્ધાય દેસયે;
ઉક્ખિત્તકા કતિ વુત્તા, કતિ સમ્માવત્તના.
અટ્ઠાનિસંસે સમ્પસ્સં, પરેસં સદ્ધાય દેસયે;
ઉક્ખિત્તકા તયો વુત્તા, તેચત્તાલીસ સમ્માવત્તના.
કતિ ઠાને મુસાવાદો, કતિ પરમન્તિ વુચ્ચતિ;
કતિ પાટિદેસનીયા, કતિનં દેસનાય ચ.
પઞ્ચ ઠાને મુસાવાદો, ચુદ્દસ પરમન્તિ વુચ્ચતિ;
દ્વાદસ પાટિદેસનીયા, ચતુન્નં દેસનાય ચ.
કતઙ્ગિકો મુસાવાદો, કતિ ઉપોસથઙ્ગાનિ;
કતિ દૂતેય્યઙ્ગાનિ, કતિ તિત્થિયવત્તના.
અટ્ઠઙ્ગિકો મુસાવાદો, અટ્ઠ ઉપોસથઙ્ગાનિ;
અટ્ઠ દૂતેય્યઙ્ગાનિ, અટ્ઠ તિત્થિયવત્તના.
કતિવાચિકા ઉપસમ્પદા, કતિનં પચ્ચુટ્ઠાતબ્બં;
કતિનં આસનં દાતબ્બં, ભિક્ખુનોવાદકો કતિહિ.
અટ્ઠવાચિકા ઉપસમ્પદા, અટ્ઠન્નં પચ્ચુટ્ઠાતબ્બં;
અટ્ઠન્નં આસનં દાતબ્બં, ભિક્ખુનોવાદકો અટ્ઠહિ.
કતિનં છેજ્જં હોતિ, કતિનં થુલ્લચ્ચયં;
કતિનઞ્ચેવ અનાપત્તિ, સબ્બેસં એકવત્થુકા.
એકસ્સ છેજ્જં હોતિ, ચતુન્નં થુલ્લચ્ચયં;
ચતુન્નઞ્ચેવ અનાપત્તિ, સબ્બેસં એકવત્થુકા.
કતિ આઘાતવત્થૂનિ, કતિહિ સઙ્ઘો ભિજ્જતિ;
કતેત્થ પઠમાપત્તિકા, ઞત્તિયા કરણા કતિ.
નવ આઘાતવત્થૂનિ, નવહિ સઙ્ઘો ભિજ્જતિ;
નવેત્થ પઠમાપત્તિકા, ઞત્તિયા કરણા નવ.
૪. અવન્દનીયપુગ્ગલાદિ
૪૭૭. કતિ પુગ્ગલા નાભિવાદેતબ્બા, અઞ્જલિસામિચેન ચ;
કતિનં દુક્કટં હોતિ, કતિ ચીવરધારણા.
દસ પુગ્ગલા નાભિવાદેતબ્બા, અઞ્જલિસામિચેન ચ;
દસન્નં દુક્કટં હોતિ, દસ ચીવરધારણા.
કતિનં વસ્સંવુટ્ઠાનં, દાતબ્બં ઇધ ચીવરં;
કતિનં ભન્તે દાતબ્બં, કતિનઞ્ચેવ ન દાતબ્બં.
પઞ્ચન્નં વસ્સંવુટ્ઠાનં, દાતબ્બં ઇધ ચીવરં;
સત્તન્નં સન્તે દાતબ્બં, સોળસન્નં ન દાતબ્બં.
કતિસતં રત્તિસતં, આપત્તિયો છાદયિત્વાન;
કતિ રત્તિયો વસિત્વાન, મુચ્ચેય્ય પારિવાસિકો.
દસસતં રત્તિસતં, આપત્તિયો છાદયિત્વાન;
દસ રત્તિયો વસિત્વાન, મુચ્ચેય્ય પારિવાસિકો.
કતિ કમ્મદોસા વુત્તા, બુદ્ધેનાદિચ્ચબન્ધુના;
ચમ્પાયં વિનયવત્થુસ્મિં, સબ્બેવ અધમ્મિકા [સબ્બે અધમ્મિકા (સી. સ્યા.)] કતિ.
દ્વાદસ કમ્મદોસા વુત્તા, બુદ્ધેનાદિચ્ચબન્ધુના;
ચમ્પાયં વિનયવત્થુસ્મિં, સબ્બેવ અધમ્મિકા [સબ્બેવાધમ્મિકા (સી.), સબ્બે અધમ્મિકા (સ્યા.)] કતા.
કતિ કમ્મસમ્પત્તિયો વુત્તા, બુદ્ધેનાદિચ્ચબન્ધુના;
ચમ્પાયં વિનયવત્થુસ્મિં, સબ્બેવ ધમ્મિકા કતિ.
ચતસ્સો કમ્મસમ્પત્તિયો વુત્તા, બુદ્ધેનાદિચ્ચબન્ધુના;