૨. દેસનાગામિનિયાદિઆપત્તિ

૪૭૫. કતિ દેસનાગામિનિયો, કતિ સપ્પટિકમ્મા કતા;

કતેત્થ અપ્પટિકમ્મા વુત્તા, બુદ્ધેનાદિચ્ચબન્ધુના.

પઞ્ચ દેસનાગામિનિયો, છ સપ્પટિકમ્મા કતા;

એકેત્થ અપ્પટિકમ્મા વુત્તા, બુદ્ધેનાદિચ્ચબન્ધુના.

વિનયગરુકા કતિ વુત્તા, કાયવાચસિકાનિ ચ;

કતિ વિકાલે ધઞ્ઞરસો, કતિ ઞત્તિચતુત્થેન સમ્મુતિ.

વિનયગરુકા દ્વે વુત્તા, કાયવાચસિકાનિ ચ;

એકો વિકાલે ધઞ્ઞરસો, એકા ઞત્તિચતુત્થેન સમ્મુતિ.

પારાજિકા કાયિકા કતિ, કતિ સંવાસકભૂમિયો;

કતિનં રત્તિચ્છેદો, પઞ્ઞત્તા દ્વઙ્ગુલા કતિ.

પારાજિકા કાયિકા દ્વે, દ્વે સંવાસકભૂમિયો;

દ્વિન્નં રત્તિચ્છેદો, પઞ્ઞત્તા દ્વઙ્ગુલા દુવે.

કતત્તાનં વધિત્વાન, કતિહિ સઙ્ઘો ભિજ્જતિ;

કતેત્થ પઠમાપત્તિકા, ઞત્તિયા કરણા કતિ.

દ્વે અત્તાનં વધિત્વાન, દ્વીહિ સઙ્ઘો ભિજ્જતિ;

દ્વેત્થ પઠમાપત્તિકા, ઞત્તિયા કરણા દુવે.

પાણાતિપાતે કતિ આપત્તિયો, વાચા પારાજિકા કતિ;

ઓભાસના કતિ વુત્તા, સઞ્ચરિત્તેન વા કતિ.

પાણાતિપાતે તિસ્સો આપત્તિયો;

વાચા પારાજિકા તયો;

ઓભાસના તયો વુત્તા;

સઞ્ચરિત્તેન વા તયો.

કતિ પુગ્ગલા ન ઉપસમ્પાદેતબ્બા, કતિ કમ્માનં સઙ્ગહા;

નાસિતકા કતિ વુત્તા, કતિનં એકવાચિકા.

તયો પુગ્ગલા ન ઉપસમ્પાદેતબ્બા, તયો કમ્માનં સઙ્ગહા;

નાસિતકા તયો વુત્તા, તિણ્ણન્નં એકવાચિકા.

અદિન્નાદાને કતિ આપત્તિયો, કતિ મેથુનપચ્ચયા;

છિન્દન્તસ્સ કતિ આપત્તિયો, કતિ છડ્ડિતપચ્ચયા.

અદિન્નાદાને તિસ્સો આપત્તિયો, ચતસ્સો મેથુનપચ્ચયા;

છિન્દન્તસ્સ તિસ્સો આપત્તિયો, પઞ્ચ છડ્ડિતપચ્ચયા.

ભિક્ખુનોવાદકવગ્ગસ્મિં, પાચિત્તિયેન દુક્કટા;

કતેત્થ નવકા વુત્તા, કતિનં ચીવરેન ચ.

ભિક્ખુનોવાદકવગ્ગસ્મિં, પાચિત્તિયેન દુક્કટા કતા;

ચતુરેત્થ નવકા વુત્તા, દ્વિન્નં ચીવરેન ચ.

ભિક્ખુનીનઞ્ચ અક્ખાતા, પાટિદેસનિયા કતિ;

ભુઞ્જન્તામકધઞ્ઞેન, પાચિત્તિયેન દુક્કટા કતિ.

ભિક્ખુનીનઞ્ચ અક્ખાતા, અટ્ઠ પાટિદેસનીયા કતા;

ભુઞ્જન્તામકધઞ્ઞેન, પાચિત્તિયેન દુક્કટા કતા.

ગચ્છન્તસ્સ કતિ આપત્તિયો, ઠિતસ્સ ચાપિ કિત્તકા;

નિસિન્નસ્સ કતિ આપત્તિયો, નિપન્નસ્સાપિ કિત્તકા.

ગચ્છન્તસ્સ ચતસ્સો આપત્તિયો, ઠિતસ્સ ચાપિ તત્તકા;

નિસિન્નસ્સ ચતસ્સો આપત્તિયો, નિપન્નસ્સાપિ તત્તકા.