અત્થાપત્તિસમુટ્ઠાનં

૧. પારાજિકં

૪૭૦. અત્થાપત્તિ અચિત્તકો આપજ્જતિ, સચિત્તકો વુટ્ઠાતિ. અત્થાપત્તિ સચિત્તકો આપજ્જતિ, અચિત્તકો વુટ્ઠાતિ. અત્થાપત્તિ અચિત્તકો આપજ્જતિ, અચિત્તકો વુટ્ઠાતિ. અત્થાપત્તિ સચિત્તકો આપજ્જતિ, સચિત્તકો વુટ્ઠાતિ. અત્થાપત્તિ કુસલચિત્તો આપજ્જતિ, કુસલચિત્તો વુટ્ઠાતિ. અત્થાપત્તિ કુસલચિત્તો આપજ્જતિ, અકુસલચિત્તો વુટ્ઠાતિ. અત્થાપત્તિ કુસલચિત્તો આપજ્જતિ, અબ્યાકતચિત્તો વુટ્ઠાતિ. અત્થાપત્તિ અકુસલચિત્તો આપજ્જતિ, કુસલચિત્તો વુટ્ઠાતિ. અત્થાપત્તિ અકુસલચિત્તો આપજ્જતિ, અકુસલચિત્તો વુટ્ઠાતિ. અત્થાપત્તિ અકુસલચિત્તો આપજ્જતિ, અબ્યાકતચિત્તો વુટ્ઠાતિ. અત્થાપત્તિ અબ્યાકતચિત્તો આપજ્જતિ, કુસલચિત્તો વુટ્ઠાતિ. અત્થાપત્તિ અબ્યાકતચિત્તો આપજ્જતિ, અકુસલચિત્તો વુટ્ઠાતિ. અત્થાપત્તિ અબ્યાકતચિત્તો આપજ્જતિ, અબ્યાકતચિત્તો વુટ્ઠાતિ.

પઠમં પારાજિકં કતિહિ સમુટ્ઠાનેહિ સમુટ્ઠાતિ? પઠમં પારાજિકં એકેન સમુટ્ઠાનેન સમુટ્ઠાતિ. કાયતો ચ ચિત્તતો ચ સમુટ્ઠાતિ, ન વાચતો.

દુતિયં પારાજિકં કતિહિ સમુટ્ઠાનેહિ સમુટ્ઠાતિ? દુતિયં પારાજિકં તીહિ સમુટ્ઠાનેહિ સમુટ્ઠાતિ – સિયા કાયતો ચ ચિત્તતો ચ સમુટ્ઠાતિ, ન વાચતો; સિયા વાચતો ચ ચિત્તતો ચ સમુટ્ઠાતિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠાતિ.

તતિયં પારાજિકં કતિહિ સમુટ્ઠાનેહિ સમુટ્ઠાતિ? તતિયં પારાજિકં તીહિ સમુટ્ઠાનેહિ સમુટ્ઠાતિ – સિયા કાયતો ચ ચિત્તતો ચ સમુટ્ઠાતિ, ન વાચતો; સિયા વાચતો ચ ચિત્તતો ચ સમુટ્ઠાતિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠાતિ.

ચતુત્થં પારાજિકં કતિહિ સમુટ્ઠાનેહિ સમુટ્ઠાતિ? ચતુત્થં પારાજિકં તીહિ સમુટ્ઠાનેહિ સમુટ્ઠાતિ – સિયા કાયતો ચ ચિત્તતો ચ સમુટ્ઠાતિ, ન વાચતો; સિયા વાચતો ચ ચિત્તતો ચ સમુટ્ઠાતિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠાતિ.

ચત્તારો પારાજિકા નિટ્ઠિતા.

૨. સઙ્ઘાદિસેસં

૪૭૧. ઉપક્કમિત્વા અસુચિં મોચેન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? ઉપક્કમિત્વા અસુચિં મોચેન્તસ્સ સઙ્ઘાદિસેસો એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો.

માતુગામેન સદ્ધિં કાયસંસગ્ગં સમાપજ્જન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? માતુગામેન સદ્ધિં કાયસંસગ્ગં સમાપજ્જન્તસ્સ સઙ્ઘાદિસેસો એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો.

માતુગામં દુટ્ઠુલ્લાહિ વાચાહિ ઓભાસેન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? માતુગામં દુટ્ઠુલ્લાહિ વાચાહિ ઓભાસેન્તસ્સ સઙ્ઘાદિસેસો તીહિ સમુટ્ઠાનેહિ સમુટ્ઠાતિ – સિયા કાયતો ચ ચિત્તતો ચ સમુટ્ઠાતિ ન વાચતો; સિયા વાચતો ચ ચિત્તતો ચ સમુટ્ઠાતિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠાતિ.

માતુગામસ્સ સન્તિકે અત્તકામપારિચરિયાય વણ્ણં ભાસન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? માતુગામસ્સ સન્તિકે અત્તકામપારિચરિયાય વણ્ણં ભાસન્તસ્સ સઙ્ઘાદિસેસો તીહિ સમુટ્ઠાનેહિ સમુટ્ઠાતિ…પે….

સઞ્ચરિત્તં સમાપજ્જન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? સઞ્ચરિત્તં સમાપજ્જન્તસ્સ સઙ્ઘાદિસેસો છહિ સમુટ્ઠાનેહિ સમુટ્ઠાતિ – સિયા કાયતો સમુટ્ઠાતિ, ન વાચતો ન ચિત્તતો; સિયા વાચતો સમુટ્ઠાતિ, ન કાયતો ન ચિત્તતો; સિયા કાયતો ચ વાચતો ચ સમુટ્ઠાતિ, ન ચિત્તતો; સિયા કાયતો ચ ચિત્તતો ચ સમુટ્ઠાતિ, ન વાચતો; સિયા વાચતો ચ ચિત્તતો ચ સમુટ્ઠાતિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠાતિ.

સઞ્ઞાચિકાય કુટિં કારાપેન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? સઞ્ઞાચિકાય કુટિં કારાપેન્તસ્સ સઙ્ઘાદિસેસો છહિ સમુટ્ઠાનેહિ સમુટ્ઠાતિ…પે….

મહલ્લકં વિહારં કારાપેન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? મહલ્લકં વિહારં કારાપેન્તસ્સ સઙ્ઘાદિસેસો છહિ સમુટ્ઠાનેહિ સમુટ્ઠાતિ…પે….

ભિક્ખું અમૂલકેન પારાજિકેન ધમ્મેન અનુદ્ધંસેન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? ભિક્ખું અમૂલકેન પારાજિકેન ધમ્મેન અનુદ્ધંસેન્તસ્સ સઙ્ઘાદિસેસો તીહિ સમુટ્ઠાનેહિ સમુટ્ઠાતિ…પે….

ભિક્ખું અઞ્ઞભાગિયસ્સ અધિકરણસ્સ કિઞ્ચિ દેસં લેસમત્તં ઉપાદાય પારાજિકેન ધમ્મેન અનુદ્ધંસેન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? ભિક્ખું અઞ્ઞભાગિયસ્સ અધિકરણસ્સ કિઞ્ચિ દેસં લેસમત્તં ઉપાદાય પારાજિકેન ધમ્મેન અનુદ્ધંસેન્તસ્સ સઙ્ઘાદિસેસો તીહિ સમુટ્ઠાનેહિ સમુટ્ઠાતિ…પે….

સઙ્ઘભેદકસ્સ ભિક્ખુનો યાવતતિયં સમનુભાસનાય ન પટિનિસ્સજ્જન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? સઙ્ઘભેદકસ્સ ભિક્ખુનો યાવતતિયં સમનુભાસનાય ન પટિનિસ્સજ્જન્તસ્સ સઙ્ઘાદિસેસો એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ.

ભેદકાનુવત્તકાનં ભિક્ખૂનં યાવતતિયં સમનુભાસનાય ન પટિનિસ્સજ્જન્તાનં સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? ભેદકાનુવત્તકાનં ભિક્ખૂનં યાવતતિયં સમનુભાસનાય ન પટિનિસ્સજ્જન્તાનં સઙ્ઘાદિસેસો એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ.

દુબ્બચસ્સ ભિક્ખુનો યાવતતિયં સમનુભાસનાય ન પટિનિસ્સજ્જન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? દુબ્બચસ્સ ભિક્ખુનો યાવતતિયં સમનુભાસનાય ન પટિનિસ્સજ્જન્તસ્સ સઙ્ઘાદિસેસો એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ.

કુલદૂસકસ્સ ભિક્ખુનો યાવતતિયં સમનુભાસનાય ન પટિનિસ્સજ્જન્તસ્સ સઙ્ઘાદિસેસો કતિહિ સમુટ્ઠાનેહિ સમુટ્ઠાતિ? કુલદૂસકસ્સ ભિક્ખુનો યાવતતિયં સમનુભાસનાય ન પટિનિસ્સજ્જન્તસ્સ સઙ્ઘાદિસેસો એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ.

તેરસ સઙ્ઘાદિસેસા નિટ્ઠિતા.

૪૭૨. …પે… અનાદરિયં પટિચ્ચ ઉદકે ઉચ્ચારં વા પસ્સાવં વા ખેળં વા કરોન્તસ્સ દુક્કટં કતિહિ સમુટ્ઠાનેહિ સમુટ્ઠાતિ? અનાદરિયં પટિચ્ચ ઉદકે ઉચ્ચારં વા પસ્સાવં વા ખેળં વા કરોન્તસ્સ દુક્કટં એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો.

સેખિયા નિટ્ઠિતા.

૩. પારાજિકાદિ

૪૭૩. ચત્તારો પારાજિકા કતિહિ સમુટ્ઠાનેહિ સમુટ્ઠન્તિ? ચત્તારો પારાજિકા તીહિ સમુટ્ઠાનેહિ સમુટ્ઠન્તિ – સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ.

તેરસ સઙ્ઘાદિસેસા કતિહિ સમુટ્ઠાનેહિ સમુટ્ઠન્તિ? તેરસ સઙ્ઘાદિસેસા છહિ સમુટ્ઠાનેહિ સમુટ્ઠન્તિ – સિયા કાયતો સમુટ્ઠન્તિ, ન વાચતો ન ચિત્તતો; સિયા વાચતો સમુટ્ઠન્તિ, ન કાયતો ન ચિત્તતો; સિયા કાયતો ચ વાચતો ન સમુટ્ઠન્તિ, ન ચિત્તતો; સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ.

દ્વે અનિયતા કતિહિ સમુટ્ઠાનેહિ સમુટ્ઠન્તિ? દ્વે અનિયતા તીહિ સમુટ્ઠાનેહિ સમુટ્ઠન્તિ – સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ.

તિંસ નિસ્સગ્ગિયા પાચિત્તિયા કતિહિ સમુટ્ઠાનેહિ સમુટ્ઠન્તિ? તિંસ નિસ્સગ્ગિયા પાચિત્તિયા છહિ સમુટ્ઠાનેહિ સમુટ્ઠન્તિ – સિયા કાયતો સમુટ્ઠન્તિ, ન વાચતો ન ચિત્તતો; સિયા વાચતો સમુટ્ઠન્તિ, ન કાયતો ન ચિત્તતો; સિયા કાયતો ચ વાચતો ચ સમુટ્ઠન્તિ, ન ચિત્તતો; સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ.

દ્વેનવુતિ પાચિત્તિયા કતિહિ સમુટ્ઠાનેહિ સમુટ્ઠન્તિ? દ્વેનવુતિ પાચિત્તિયા છહિ સમુટ્ઠાનેહિ સમુટ્ઠન્તિ – સિયા કાયતો સમુટ્ઠન્તિ, ન વાચતો ન ચિત્તતો; સિયા વાચતો સમુટ્ઠન્તિ, ન કાયતો ન ચિત્તતો; સિયા કાયતો ચ વાચતો ચ સમુટ્ઠન્તિ, ન ચિત્તતો; સિયા કાયતો ચ ચિત્તતો ચ સમુટ્ઠન્તિ ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ.

ચત્તારો પાટિદેસનીયા કતિહિ સમુટ્ઠાનેહિ સમુટ્ઠન્તિ? ચત્તારો પાટિદેસનીયા ચતૂહિ સમુટ્ઠાનેહિ સમુટ્ઠન્તિ – સિયા કાયતો સમુટ્ઠન્તિ, ન વાચતો ન ચિત્તતો; સિયા કાયતો ચ વાચતો ચ સમુટ્ઠન્તિ, ન ચિત્તતો; સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા કાયતો ચ વાચતો ચ ચિત્તતો ચ સમુટ્ઠન્તિ.

પઞ્ચસત્તતિ સેખિયા કતિહિ સમુટ્ઠાનેહિ સમુટ્ઠન્તિ? પઞ્ચસત્તતિ સેખિયા તીહિ સમુટ્ઠાનેહિ સમુટ્ઠન્તિ – સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ.

સમુટ્ઠાનં નિટ્ઠિતં.