૧૧. સઙ્ઘભેદકવગ્ગો

૪૫૯. [ચૂળવ. ૩૫૪-૩૫૫; અ. નિ. ૧૦.૩૮ આદયો] ‘‘કતિહિ નુ ખો, ભન્તે, અઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો’’તિ? ‘‘પઞ્ચહુપાલિ, અઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ, અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય દિટ્ઠિં કમ્મેન – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો.

‘‘અપરેહિપિ, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ, અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય દિટ્ઠિં ઉદ્દેસેન – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો.

‘‘અપરેહિપિ, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ, અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય દિટ્ઠિ વોહરન્તો – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો.

‘‘અપરેહિપિ, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ, અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય દિટ્ઠિં અનુસ્સાવનેન – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો.

‘‘અપરેહિપિ, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ, અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય દિટ્ઠિં સલાકગ્ગાહેન – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો.

‘‘અપરેહિપિ, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ, અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય ખન્તિં કમ્મેન…પે… વિનિધાય ખન્તિં ઉદ્દેસેન…પે… વિનિધાય ખન્તિં વોહરન્તો…પે… વિનિધાય ખન્તિં અનુસ્સાવનેન…પે… વિનિધાય ખન્તિં સલાકગ્ગાહેન – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો.

‘‘અપરેહિપિ, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય રુચિં કમ્મેન…પે… વિનિધાય રુચિં ઉદ્દેસેન…પે… વિનિધાય રુચિં વોહરન્તો…પે… વિનિધાય રુચિં અનુસ્સાવનેન…પે… વિનિધાય રુચિં સલાકગ્ગાહેન – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો.

‘‘અપરેહિપિ, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો. કતમેહિ પઞ્ચહિ? ઇધુપાલિ, ભિક્ખુ અધમ્મં ધમ્મોતિ દીપેતિ, ધમ્મં અધમ્મોતિ દીપેતિ, અવિનયં વિનયોતિ દીપેતિ, વિનયં અવિનયોતિ દીપેતિ, વિનિધાય સઞ્ઞં કમ્મેન…પે… વિનિધાય સઞ્ઞં ઉદ્દેસેન…પે… વિનિધાય સઞ્ઞં વોહરન્તો…પે… વિનિધાય સઞ્ઞં અનુસ્સાવનેન…પે… વિનિધાય સઞ્ઞં સલાકગ્ગાહેન – ઇમેહિ ખો, ઉપાલિ, પઞ્ચહઙ્ગેહિ સમન્નાગતો સઙ્ઘભેદકો આપાયિકો નેરયિકો કપ્પટ્ઠો અતેકિચ્છો’’તિ.

સઙ્ઘભેદકવગ્ગો નિટ્ઠિતો એકાદસમો.

તસ્સુદ્દાનં –

વિનિધાય દિટ્ઠિં કમ્મેન, ઉદ્દેસે વોહરેન ચ;

અનુસ્સાવને સલાકેન, પઞ્ચેતે દિટ્ઠિનિસ્સિતા;

ખન્તિં રુચિઞ્ચ સઞ્ઞઞ્ચ, તયો તે પઞ્ચધા નયાતિ.