૪. સઞ્ઞાપનીયાદિ

૩૮૭. કથં સઞ્ઞાપનીયે ઠાને સઞ્ઞાપેતિ? અધમ્મં અધમ્મોતિ દીપેન્તો સઞ્ઞાપનીયે ઠાને સઞ્ઞાપેતિ, ધમ્મં ધમ્મોતિ દીપેન્તો સઞ્ઞાપનીયે ઠાને સઞ્ઞાપેતિ…પે… દુટ્ઠુલ્લં આપત્તિં દુટ્ઠુલ્લા આપત્તીતિ દીપેન્તો સઞ્ઞાપનીયે ઠાને સઞ્ઞાપેતિ, અદુટ્ઠુલ્લં આપત્તિં અદુટ્ઠુલ્લા આપત્તીતિ દીપેન્તો સઞ્ઞાપનીયે ઠાને સઞ્ઞાપેતિ. એવં સઞ્ઞાપનીયે ઠાને સઞ્ઞાપેતિ.

૩૮૮. કથં નિજ્ઝાપનીયે ઠાને નિજ્ઝાપેતિ? અધમ્મં અધમ્મોતિ દીપેન્તો નિજ્ઝાપનીયે ઠાને નિજ્ઝાપેતિ, ધમ્મં ધમ્મોતિ દીપેન્તો નિજ્ઝાપનીયે ઠાને નિજ્ઝાપેતિ…પે… દુટ્ઠુલ્લં આપત્તિં દુટ્ઠુલ્લા આપત્તીતિ દીપેન્તો નિજ્ઝાપનીયે ઠાને નિજ્ઝાપેતિ, અદુટ્ઠુલ્લં આપત્તિં અદુટ્ઠુલ્લા આપત્તીતિ દીપેન્તો નિજ્ઝાપનીયે ઠાને નિજ્ઝાપેતિ. એવં નિજ્ઝાપનીયે ઠાને નિજ્ઝાપેતિ.

૩૮૯. કથં પેક્ખનીયે ઠાને પેક્ખતિ? અધમ્મં અધમ્મોતિ દીપેન્તો પેક્ખનીયે ઠાને પેક્ખતિ, ધમ્મં ધમ્મોતિ દીપેન્તો પેક્ખનીયે ઠાને પેક્ખતિ…પે… દુટ્ઠુલ્લં આપત્તિં દુટ્ઠુલ્લા આપત્તીતિ દીપેન્તો પેક્ખનીયે ઠાને પેક્ખતિ, અદુટ્ઠુલ્લં આપત્તિં અદુટ્ઠુલ્લા આપત્તીતિ દીપેન્તો પેક્ખનીયે ઠાને પેક્ખતિ. એવં પેક્ખનીયે ઠાને પેક્ખતિ.

૩૯૦. કથં પસાદનીયે ઠાને પસાદેતિ? અધમ્મં અધમ્મોતિ દીપેન્તો પસાદનીયે ઠાને પસાદેતિ, ધમ્મં ધમ્મોતિ દીપેન્તો પસાદનીયે ઠાને પસાદેતિ…પે… દુટ્ઠુલ્લં આપત્તિં દુટ્ઠુલ્લા આપત્તીતિ દીપેન્તો પસાદનીયે ઠાને પસાદેતિ, અદુટ્ઠુલ્લં આપત્તિં અદુટ્ઠુલ્લા આપત્તીતિ દીપેન્તો પસાદનીયે ઠાને પસાદેતિ. એવં પસાદનીયે ઠાને પસાદેતિ.