૧. વોહરન્તેન જાનિતબ્બાદિ

૩૬૮. સઙ્ગામાવચરે ભિક્ખુના સઙ્ઘે વોહરન્તેન વત્થુ જાનિતબ્બં, વિપત્તિ જાનિતબ્બા, આપત્તિ જાનિતબ્બા, નિદાનં જાનિતબ્બં, આકારો જાનિતબ્બો, પુબ્બાપરં જાનિતબ્બં, કતાકતં જાનિતબ્બં, કમ્મં જાનિતબ્બં, અધિકરણં જાનિતબ્બં, સમથો જાનિતબ્બો, ન છન્દાગતિ ગન્તબ્બા, ન દોસાગતિ ગન્તબ્બા, ન મોહાગતિ ગન્તબ્બા, ન ભયાગતિ ગન્તબ્બા, સઞ્ઞાપનીયે ઠાને સઞ્ઞાપેતબ્બં, નિજ્ઝાપનીયે ઠાને નિજ્ઝાપેતબ્બં, પેક્ખનીયે ઠાને પેક્ખિતબ્બં, પસાદનીયે ઠાને પસાદેતબ્બં, લદ્ધપક્ખોમ્હીતિ પરપક્ખો નાવજાનિતબ્બો, બહુસ્સુતોમ્હીતિ અપ્પસ્સુતો નાવજાનિતબ્બો, થેરતરોમ્હીતિ નવકતરો નાવજાનિતબ્બો, અસમ્પત્તં ન બ્યાહાતબ્બં, સમ્પત્તં ધમ્મતો વિનયતો ન પરિહાપેતબ્બં, યેન ધમ્મેન યેન વિનયેન યેન સત્થુસાસનેન તં અધિકરણં વૂપસમ્મતિ, તથા તં અધિકરણં વૂપસમેતબ્બં.

૩૬૯. વત્થુ જાનિતબ્બન્તિ અટ્ઠપારાજિકાનં [અટ્ઠન્નં પારાજિકાનં (સી. ક.)] વત્થુ જાનિતબ્બં, તેવીસસઙ્ઘાદિસેસાનં વત્થુ જાનિતબ્બં, દ્વેઅનિયતાનં વત્થુ જાનિતબ્બં, દ્વેચત્તારીસનિસ્સગ્ગિયાનં વત્થુ જાનિતબ્બં, અટ્ઠાસીતિસતપાચિત્તિયાનં વત્થુ જાનિતબ્બં, દ્વાદસપાટિદેસનીયાનં વત્થુ જાનિતબ્બં, દુક્કટાનં વત્થુ જાનિતબ્બં, દુબ્ભાસિતાનં વત્થુ જાનિતબ્બં.

૩૭૦. વિપત્તિ જાનિતબ્બાતિ સીલવિપત્તિ જાનિતબ્બા, આચારવિપત્તિ જાનિતબ્બા, દિટ્ઠિવિપત્તિ જાનિતબ્બા, આજીવવિપત્તિ જાનિતબ્બા.

૩૭૧. આપત્તિ જાનિતબ્બાતિ પારાજિકાપત્તિ જાનિતબ્બા, સઙ્ઘાદિસેસાપત્તિ જાનિતબ્બા, થુલ્લચ્ચયાપત્તિ જાનિતબ્બા, પાચિત્તિયાપત્તિ જાનિતબ્બા, પાટિદેસનીયાપત્તિ જાનિતબ્બા, દુક્કટાપત્તિ જાનિતબ્બા, દુબ્ભાસિતાપત્તિ જાનિતબ્બા.

૩૭૨. નિદાનં જાનિતબ્બન્તિ અટ્ઠપારાજિકાનં નિદાનં જાનિતબ્બં, તેવીસસઙ્ઘાદિસેસાનં નિદાનં જાનિતબ્બં, દ્વેઅનિયતાનં નિદાનં જાનિતબ્બં, દ્વેચત્તારીસનિસ્સગ્ગિયાનં નિદાનં જાનિતબ્બં, અટ્ઠાસીતિસતપાચિત્તિયાનં નિદાનં જાનિતબ્બં, દ્વાદસપાટિદેસનીયાનં નિદાનં જાનિતબ્બં, દુક્કટાનં નિદાનં જાનિતબ્બં, દુબ્ભાસિતાનં નિદાનં જાનિતબ્બં.

૩૭૩. આકારો જાનિતબ્બોતિ સઙ્ઘો આકારતો જાનિતબ્બો, ગણો આકારતો જાનિતબ્બો, પુગ્ગલો આકારતો જાનિતબ્બો, ચોદકો આકારતો જાનિતબ્બો, ચુદિતકો આકારતો જાનિતબ્બો. સઙ્ઘો આકારતો જાનિતબ્બોતિ પટિબલો નુ ખો અયં સઙ્ઘો ઇમં અધિકરણં વૂપસમેતું ધમ્મેન વિનયેન સત્થુસાસનેન ઉદાહુ નોતિ, એવં સઙ્ઘો આકારતો જાનિતબ્બો. ગણો આકારતો જાનિતબ્બોતિ પટિબલો નુ ખો અયં ગણો ઇમં અધિકરણં વૂપસમેતું ધમ્મેન વિનયેન સત્થુસાસનેન ઉદાહુ નોતિ, એવં ગણો આકારતો જાનિતબ્બો. પુગ્ગલો આકારતો જાનિતબ્બોતિ પટિબલો નુ ખો અયં પુગ્ગલો ઇમં અધિકરણં વૂપસમેતું ધમ્મેન વિનયેન સત્થુસાસનેન ઉદાહુ નોતિ, એવં પુગ્ગલો આકારતો જાનિતબ્બો. ચોદકો આકારતો જાનિતબ્બોતિ કચ્ચિ નુ ખો અયમાયસ્મા પઞ્ચસુ ધમ્મેસુ પતિટ્ઠાય પરં ચોદેતિ ઉદાહુ નોતિ, એવં ચોદકો આકારતો જાનિતબ્બો. ચુદિતકો આકારતો જાનિતબ્બોતિ કચ્ચિ નુ ખો અયમાયસ્મા દ્વીસુ ધમ્મેસુ પતિટ્ઠિતો સચ્ચે ચ અકુપ્પે ચ ઉદાહુ નોતિ, એવં ચુદિતકો આકારતો જાનિતબ્બો.

૩૭૪. પુબ્બાપરં જાનિતબ્બન્તિ કચ્ચિ નુ ખો અયમાયસ્મા વત્થુતો વા વત્થું સઙ્કમતિ, વિપત્તિતો વા વિપત્તિં સઙ્કમતિ, આપત્તિતો વા આપત્તિં સઙ્કમતિ, અવજાનિત્વા વા પટિજાનાતિ, પટિજાનિત્વા વા અવજાનાતિ, અઞ્ઞેન વા અઞ્ઞં પટિચરતિ, ઉદાહુ નોતિ, એવં પુબ્બાપરં જાનિતબ્બં.

૩૭૫. કતાકતં જાનિતબ્બન્તિ મેથુનધમ્મો જાનિતબ્બો, મેથુનધમ્મસ્સ અનુલોમં જાનિતબ્બં, મેથુનધમ્મસ્સ પુબ્બભાગો જાનિતબ્બો. મેથુનધમ્મો જાનિતબ્બોતિ દ્વયંદ્વયસમાપત્તિ જાનિતબ્બા. મેથુનધમ્મસ્સ અનુલોમં જાનિતબ્બન્તિ ભિક્ખુ અત્તનો મુખેન પરસ્સ અઙ્ગજાતં ગણ્હાતિ. મેથુનધમ્મસ્સ પુબ્બભાગો જાનિતબ્બોતિ વણ્ણાવણ્ણો [વણ્ણો અવણ્ણો (સ્યા.)], કાયસંસગ્ગો, દુટ્ઠુલ્લવાચા, અત્તકામપારિચરિયા, વચનમનુપ્પદાનં [ધનમનુપ્પદાનં (ક.)].

૩૭૬. કમ્મં જાનિતબ્બન્તિ સોળસકમ્માનિ જાનિતબ્બાનિ – ચત્તારિ અપલોકનકમ્માનિ જાનિતબ્બાનિ, ચત્તારિ ઞત્તિકમ્માનિ જાનિતબ્બાનિ, ચત્તારિ ઞત્તિદુતિયકમ્માનિ જાનિતબ્બાનિ, ચત્તારિ ઞત્તિચતુત્થકમ્માનિ જાનિતબ્બાનિ.

૩૭૭. અધિકરણં જાનિતબ્બન્તિ ચત્તારિ અધિકરણાનિ જાનિતબ્બાનિ – વિવાદાધિકરણં જાનિતબ્બં, અનુવાદાધિકરણં જાનિતબ્બં, આપત્તાધિકરણં જાનિતબ્બં, કિચ્ચાધિકરણં જાનિતબ્બં.

૩૭૮. સમથો જાનિતબ્બોતિ સત્ત સમથા જાનિતબ્બા – સમ્મુખાવિનયો જાનિતબ્બો, સતિવિનયો જાનિતબ્બો, અમૂળ્હવિનયો જાનિતબ્બો, પટિઞ્ઞાતકરણં જાનિતબ્બં, યેભુય્યસિકા જાનિતબ્બા, તસ્સપાપિયસિકા જાનિતબ્બા, તિણવત્થારકો જાનિતબ્બો.