૨. ચોદકાદિપટિપત્તિ

૩૬૩. ચોદકેન કથં પટિપજ્જિતબ્બં? ચુદિતકેન કથં પટિપજ્જિતબ્બં? સઙ્ઘેન કથં પટિપજ્જિતબ્બં? અનુવિજ્જકેન કથં પટિપજ્જિતબ્બં? ચોદકેન કથં પટિપજ્જિતબ્બન્તિ? ચોદકેન પઞ્ચસુ ધમ્મેસુ પતિટ્ઠાય પરો ચોદેતબ્બો. કાલેન વક્ખામિ નો અકાલેન, ભૂતેન વક્ખામિ નો અભૂતેન, સણ્હેન વક્ખામિ નો ફરુસેન, અત્થસંહિતેન વક્ખામિ નો અનત્થસંહિતેન, મેત્તાચિત્તો વક્ખામિ નો દોસન્તરોતિ – ચોદકેન એવં પટિપજ્જિતબ્બં. ચુદિતકેન કથં પટિપજ્જિતબ્બન્તિ? ચુદિતકેન દ્વીસુ ધમ્મેસુ પટિપજ્જિતબ્બં. સચ્ચે ચ અકુપ્પે ચ – ચુદિતકેન એવં પટિપજ્જિતબ્બં. સઙ્ઘેન કથં પટિપજ્જિતબ્બન્તિ? સઙ્ઘેન ઓતિણ્ણાનોતિણ્ણં જાનિતબ્બં. સઙ્ઘેન એવં પટિપજ્જિતબ્બં. અનુવિજ્જકેન કથં પટિપજ્જિતબ્બન્તિ? અનુવિજ્જકેન યેન ધમ્મેન યેન વિનયેન યેન સત્થુસાસનેન તં અધિકરણં વૂપસમ્મતિ તથા તં અધિકરણં વૂપસમેતબ્બં. અનુવિજ્જકેન એવં પટિપજ્જિતબ્બં.

૩૬૪. ઉપોસથો કિમત્થાય, પવારણા કિસ્સ કારણા;

પરિવાસો કિમત્થાય, મૂલાયપટિકસ્સના કિસ્સ કારણા;

માનત્તં કિમત્થાય, અબ્ભાનં કિસ્સ કારણા.

ઉપોસથો સામગ્ગત્થાય, વિસુદ્ધત્થાય પવારણા;

પરિવાસો માનત્તત્થાય, મૂલાયપટિકસ્સના નિગ્ગહત્થાય;

માનત્તં અબ્ભાનત્થાય, વિસુદ્ધત્થાય અબ્ભાનં.

છન્દા દોસા ભયા મોહા, થેરે ચ પરિભાસતિ;

કાયસ્સ ભેદા દુપ્પઞ્ઞો, ખતો ઉપહતિન્દ્રિયો;

નિરયં ગચ્છતિ દુમ્મેધો, ન ચ સિક્ખાય ગારવો.

ન ચ આમિસં નિસ્સાય;

ન ચ નિસ્સાય પુગ્ગલં;

ઉભો એતે વિવજ્જેત્વા;

યથાધમ્મો તથા કરે.