૯. છત્તુપાહનવગ્ગો

૨૨૬. છત્તુપાહનં ધારેન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? છબ્બગ્ગિયા ભિક્ખુનિયો આરબ્ભ. કિસ્મિં વત્થુસ્મિન્તિ? છબ્બગ્ગિયા ભિક્ખુનિયો છત્તુપાહનં ધારેસું, તસ્મિં વત્થુસ્મિં. એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

યાનેન યાયન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? છબ્બગ્ગિયા ભિક્ખુનિયો આરબ્ભ. કિસ્મિં વત્થુસ્મિન્તિ? છબ્બગ્ગિયા ભિક્ખુનિયો યાનેન યાયિંસુ, તસ્મિં વત્થુસ્મિં. એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

સઙ્ઘાણિં ધારેન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? અઞ્ઞતરં ભિક્ખુનિં આરબ્ભ. કિસ્મિં વત્થુસ્મિન્તિ? અઞ્ઞતરા ભિક્ખુની સઙ્ઘાણિં ધારેસિ, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

ઇત્થાલઙ્કારં ધારેન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? છબ્બગ્ગિયા ભિક્ખુનિયો આરબ્ભ. કિસ્મિં વત્થુસ્મિન્તિ? છબ્બગ્ગિયા ભિક્ખુનિયો ઇત્થાલઙ્કારં ધારેસું, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

ગન્ધવણ્ણકેન નહાયન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? છબ્બગ્ગિયા ભિક્ખુનિયો આરબ્ભ. કિસ્મિં વત્થુસ્મિન્તિ? છબ્બગ્ગિયા ભિક્ખુનિયો ગન્ધવણ્ણકેન નહાયિંસુ, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

વાસિતકેન પિઞ્ઞાકેન નહાયન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? છબ્બગ્ગિયા ભિક્ખુનિયો આરબ્ભ. કિસ્મિં વત્થુસ્મિન્તિ? છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયિંસુ, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

ભિક્ખુનિયા ઉમ્મદ્દાપેન્તિયા પરિમદ્દાપેન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? સમ્બહુલા ભિક્ખુનિયો આરબ્ભ. કિસ્મિં વત્થુસ્મિન્તિ? સમ્બહુલા ભિક્ખુનિયો ભિક્ખુનિયા ઉમ્મદ્દાપેસું પરિમદ્દાપેસું, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

સિક્ખમાના ઉમ્મદ્દાપેન્તિયા પરિમદ્દાપેન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? સમ્બહુલા ભિક્ખુનિયો આરબ્ભ. કિસ્મિં વત્થુસ્મિન્તિ? સમ્બહુલા ભિક્ખુનિયો સિક્ખમાનાય ઉમ્મદ્દાપેસું પરિમદ્દાપેસું, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

સામણેરિયા ઉમ્મદ્દાપેન્તિયા પરિમદ્દાપેન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? સમ્બહુલા ભિક્ખુનિયો આરબ્ભ. કિસ્મિં વત્થુસ્મિન્તિ? સમ્બહુલા ભિક્ખુનિયો સામણેરિયા ઉમ્મદ્દાપેસું પરિમદ્દાપેસું, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

ગિહિનિયા ઉમ્મદ્દાપેન્તિયા પરિમદ્દાપેન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? સમ્બહુલા ભિક્ખુનિયો આરબ્ભ. કિસ્મિં વત્થુસ્મિન્તિ? સમ્બહુલા ભિક્ખુનિયો ગિહિનિયા ઉમ્મદ્દાપેસું પરિમદ્દાપેસું, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – એળકલોમકે…પે….

ભિક્ખુસ્સ પુરતો અનાપુચ્છા આસને નિસીદન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? સમ્બહુલા ભિક્ખુનિયો આરબ્ભ. કિસ્મિં વત્થુસ્મિન્તિ? સમ્બહુલા ભિક્ખુનિયો ભિક્ખુસ્સ પુરતો અનાપુચ્છા આસને નિસીદિંસુ, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – કથિનકે…પે….

અનોકાસકતં ભિક્ખું પઞ્હં પુચ્છન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? સમ્બહુલા ભિક્ખુનિયો આરબ્ભ. કિસ્મિં વત્થુસ્મિન્તિ? સમ્બહુલા ભિક્ખુનિયો અનોકાસકતં ભિક્ખું પઞ્હં પુચ્છિંસુ, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – પદસોધમ્મે…પે….

અસઙ્કચ્ચિકાય [અસઙ્કચ્છિકાય (સ્યા.)] ગામં પવિસન્તિયા પાચિત્તિયં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? અઞ્ઞતરં ભિક્ખુનિં આરબ્ભ. કિસ્મિં વત્થુસ્મિન્તિ? અઞ્ઞતરા ભિક્ખુની અસઙ્કચ્ચિકા ગામં પાવિસિ, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં દ્વીહિ સમુટ્ઠાનેહિ સમુટ્ઠાતિ – સિયા કાયતો સમુટ્ઠાતિ, ન વાચતો ન ચિત્તતો; સિયા કાયતો ચ ચિત્તતો ચ સમુટ્ઠાતિ, ન વાચતો…પે….

છત્તુપાહનવગ્ગો નવમો.

નવવગ્ગખુદ્દકા નિટ્ઠિતા.

તસ્સુદ્દાનં –

લસુણં સંહરે લોમં, તલમટ્ઠઞ્ચ સુદ્ધિકં;

ભુઞ્જન્તામકધઞ્ઞાનં, દ્વે વિઘાસેન દસ્સના.

અન્ધકારે પટિચ્છન્ને, અજ્ઝોકાસે રથિકાય ચ;

પુરે પચ્છા વિકાલે ચ, દુગ્ગહિ નિરયે વધિ.

નગ્ગોદકા વિસિબ્બેત્વા, પઞ્ચાહિકં સઙ્કમનીયં;

ગણં વિભઙ્ગસમણં, દુબ્બલં કથિનેન ચ.

એકમઞ્ચત્થરણેન, સઞ્ચિચ્ચ સહજીવિની;

દત્વા સંસટ્ઠઅન્તો ચ, તિરોવસ્સં ન પક્કમે.

રાજા આસન્દિ સુત્તઞ્ચ, ગિહિ વૂપસમેન ચ;

દદે ચીવરાવસથં, પરિયાપુણઞ્ચ વાચયે.

આરામક્કોસચણ્ડી ચ, ભુઞ્જેય્ય કુલમચ્છરી;

વાસે પવારણોવાદં, દ્વે ધમ્મા પસાખેન ચ.

ગબ્ભી પાયન્તી છ ધમ્મે, અસમ્મતૂનદ્વાદસ;

પરિપુણ્ણઞ્ચ સઙ્ઘેન, સહ વુટ્ઠા છ પઞ્ચ ચ.

કુમારી દ્વે ચ સઙ્ઘેન, દ્વાદસ સમ્મતેન ચ;

અલં સચે ચ દ્વેવસ્સં, સંસટ્ઠા સામિકેન ચ.

પારિવાસિકાનુવસ્સં, દુવે વુટ્ઠાપનેન ચ;

છત્તયાનેન સઙ્ઘાણિ, ઇત્થાલઙ્કારવણ્ણકે.

પિઞ્ઞાકભિક્ખુની ચેવ, સિક્ખા ચ સામણેરિકા;

ગિહિ ભિક્ખુસ્સ પુરતો, અનોકાસં સઙ્કચ્ચિકાતિ.

તેસં વગ્ગાનં ઉદ્દાનં –

લસુણન્ધકારા ન્હાના, તુવટ્ટા ચિત્તગારકા;

આરામં ગબ્ભિની ચેવ, કુમારી છત્તુપાહનાતિ.