૯. દુતિયદુટ્ઠદોસસિક્ખાપદં

૩૯૧. તેન સમયેન બુદ્ધો ભગવા રાજગહે વિહરતિ વેળુવને કલન્દકનિવાપે. તેન ખો પન સમયેન મેત્તિયભૂમજકા ભિક્ખૂ ગિજ્ઝકૂટા પબ્બતા ઓરોહન્તા અદ્દસંસુ છગલકં [છકલકં (સ્યા.)] અજિકાય વિપ્પટિપજ્જન્તં. દિસ્વાન એવમાહંસુ – ‘‘હન્દ મયં, આવુસો, ઇમં છગલકં દબ્બં મલ્લપુત્તં નામ કરોમ. ઇમં અજિકં મેત્તિયં નામ ભિક્ખુનિં કરોમ. એવં મયં વોહરિસ્સામ. પુબ્બે મયં, આવુસો, દબ્બં મલ્લપુત્તં સુતેન અવોચુમ્હા. ઇદાનિ પન અમ્હેહિ સામં દિટ્ઠો મેત્તિયાય ભિક્ખુનિયા વિપ્પટિપજ્જન્તો’’તિ. તે તં છગલકં દબ્બં મલ્લપુત્તં નામ અકંસુ. તં અજિકં મેત્તિયં નામ ભિક્ખુનિં અકંસુ. તે ભિક્ખૂનં આરોચેસું – ‘‘પુબ્બે મયં, આવુસો, દબ્બં મલ્લપુત્તં સુતેન અવોચુમ્હા. ઇદાનિ પન અમ્હેહિ સામં દિટ્ઠો મેત્તિયાય ભિક્ખુનિયા વિપ્પટિપજ્જન્તો’’તિ. ભિક્ખૂ એવમાહંસુ – ‘‘માવુસો, એવં અવચુત્થ. નાયસ્મા દબ્બો મલ્લપુત્તો એવં કરિસ્સતી’’તિ.

અથ ખો તે ભિક્ખૂ ભગવતો એતમત્થં આરોચેસું. અથ ખો ભગવા એતસ્મિં નિદાને એતસ્મિં પકરણે ભિક્ખુસઙ્ઘં સન્નિપાતાપેત્વા આયસ્મન્તં દબ્બં મલ્લપુત્તં પટિપુચ્છિ – ‘‘સરસિ ત્વં, દબ્બ, એવરૂપં કત્તા યથયિમે ભિક્ખૂ આહંસૂ’’તિ? ‘‘યથા મં, ભન્તે, ભગવા જાનાતી’’તિ. દુતિયમ્પિ ખો ભગવા…પે… તતિયમ્પિ ખો ભગવા આયસ્મન્તં દબ્બં મલ્લપુત્તં એતદવોચ – ‘‘સરસિ ત્વં, દબ્બ, એવરૂપં કત્તા યથયિમે ભિક્ખૂ આહંસૂ’’તિ? ‘‘યથા મં, ભન્તે, ભગવા જાનાતી’’તિ. ‘‘ન ખો, દબ્બ, દબ્બા એવં નિબ્બેઠેન્તિ. સચે તયા કતં કતન્તિ વદેહિ, સચે તયા અકતં અકતન્તિ વદેહી’’તિ. ‘‘યતો અહં, ભન્તે, જાતો નાભિજાનામિ સુપિનન્તેનપિ મેથુનધમ્મં પટિસેવિતા, પગેવ જાગરો’’તિ! અથ ખો ભગવા ભિક્ખૂ આમન્તેસિ – ‘‘તેન હિ, ભિક્ખુવે, ઇમે ભિક્ખૂ અનુયુઞ્જથા’’તિ. ઇદં વત્વા ભગવા ઉટ્ઠાયાસના વિહારં પાવિસિ.

અથ ખો તે ભિક્ખૂ મેત્તિયભૂમજકે ભિક્ખૂ અનુયુઞ્જિંસુ. તે ભિક્ખૂહિ અનુયુઞ્જીયમાના ભિક્ખૂનં એતમત્થં આરોચેસું – ‘‘કિં પન તુમ્હે, આવુસો, આયસ્મન્તં દબ્બં મલ્લપુત્તં અઞ્ઞભાગિયસ્સ અધિકરણસ્સ કિઞ્ચિદેસં લેસમત્તં ઉપાદાય પારાજિકેન ધમ્મેન અનુદ્ધંસેથા’’તિ? ‘‘એવમાવુસો’’તિ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ મેત્તિયભૂમજકા ભિક્ખૂ આયસ્મન્તં દબ્બં મલ્લપુત્તં અઞ્ઞભાગિયસ્સ અધિકરણસ્સ કિઞ્ચિ દેસં લેસમત્તં ઉપાદાય પારાજિકેન ધમ્મેન અનુદ્ધંસેસ્સન્તી’’તિ! અથ ખો તે ભિક્ખૂ મેત્તિયભૂમજકે ભિક્ખૂ અનેકપરિયાયેન વિગરહિત્વા ભગવતો એતમત્થં આરોચેસું…પે… ‘‘સચ્ચં કિર તુમ્હે, ભિક્ખવે, દબ્બં મલ્લપુત્તં અઞ્ઞભાગિયસ્સ અધિકરણસ્સ કિઞ્ચિ દેસં લેસમત્તં ઉપાદાય પારાજિકેન ધમ્મેન અનુદ્ધંસેથા’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… ‘‘કથઞ્હિ નામ તુમ્હે, મોઘપુરિસા, દબ્બં મલ્લપુત્તં અઞ્ઞભાગિયસ્સ અધિકરણસ્સ કિઞ્ચિ દેસં લેસમત્તં ઉપાદાય પારાજિકેન ધમ્મેન અનુદ્ધંસેસ્સથ! નેતં, મોઘપુરિસા, અપ્પસન્નાનં વા પસાદાય…પે… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –

૩૯૨. ‘‘યો પન ભિક્ખુ ભિક્ખું દુટ્ઠો દોસો અપ્પતીતો અઞ્ઞભાગિયસ્સ અધિકરણસ્સ કિઞ્ચિદેસં લેસમત્તં ઉપાદાય પારાજિકેન ધમ્મેન અનુદ્ધંસેય્ય – ‘અપ્પેવ નામ નં ઇમમ્હા બ્રહ્મચરિયા ચાવેય્ય’ન્તિ. તતો અપરેન સમયેન સમનુગ્ગાહીયમાનો વા અસમનુગ્ગાહીયમાનો વા અઞ્ઞભાગિયઞ્ચેવ તં અધિકરણં હોતિ કોચિદેસો લેસમત્તો ઉપાદિન્નો, ભિક્ખુ ચ દોસં પતિટ્ઠાતિ, સઙ્ઘાદિસેસો’’તિ.

૩૯૩. યો પનાતિ યો યાદિસો…પે… ભિક્ખૂતિ…પે… અયં ઇમસ્મિં અત્થે અધિપ્પેતો ભિક્ખૂતિ.

ભિક્ખુન્તિ અઞ્ઞં ભિક્ખું.

દુટ્ઠો દોસોતિ કુપિતો અનત્તમનો અનભિરદ્ધો આહતચિત્તો ખિલજાતો.

અપ્પતીતોતિ તેન ચ કોપેન, તેન ચ દોસેન, તાય ચ અનત્તમનતાય, તાય ચ અનભિરદ્ધિયા અપ્પતીતો હોતિ.

અઞ્ઞભાગિયસ્સ અધિકરણસ્સાતિ આપત્તઞ્ઞભાગિયં વા હોતિ અધિકરણઞ્ઞભાગિયં વા. કથં અધિકરણં અધિકરણસ્સ અઞ્ઞભાગિયં? વિવાદાધિકરણં અનુવાદાધિકરણસ્સ આપત્તાધિકરણસ્સ કિચ્ચાધિકરણસ્સ અઞ્ઞભાગિયં. અનુવાદાધિકરણં આપત્તાધિકરણસ્સ કિચ્ચાધિકરણસ્સ વિવાદાધિકરણસ્સ અઞ્ઞભાગિયં. આપત્તાધિકરણં કિચ્ચાધિકરણસ્સ વિવાદાધિકરણસ્સ અનુવાદાધિકરણસ્સ અઞ્ઞભાગિયં. કિચ્ચાધિકરણં વિવાદાધિકરણસ્સ અનુવાદાધિકરણસ્સ આપત્તાધિકરણસ્સ અઞ્ઞભાગિયં. એવં અધિકરણં અધિકરણસ્સ અઞ્ઞભાગિયં.

કથં અધિકરણં અધિકરણસ્સ તબ્ભાગિયં? વિવાદાધિકરણં વિવાદાધિકરણસ્સ તબ્ભાગિયં. અનુવાદાધિકરણં અનુવાદાધિકરણસ્સ તબ્ભાગિયં. આપત્તાધિકરણં આપત્તાધિકરણસ્સ સિયા તબ્ભાગિયં સિયા અઞ્ઞભાગિયં.

કથં આપત્તાધિકરણં આપત્તાધિકરણસ્સ અઞ્ઞભાગિયં? મેથુનધમ્મપારાજિકાપત્તિ અદિન્નાદાનપારાજિકાપત્તિયા મનુસ્સવિગ્ગહપારાજિકાપત્તિયા ઉત્તરિમનુસ્સધમ્મપારાજિકાપત્તિયા અઞ્ઞભાગિયા. અદિન્નાદાનપારાજિકાપત્તિ મનુસ્સવિગ્ગહપારાજિકાપત્તિયા ઉત્તરિમનુસ્સધમ્મપારાજિકાપત્તિયા મેથુનધમ્મપારાજિકાપત્તિયા અઞ્ઞભાગિયા. મનુસ્સવિગ્ગહપારાજિકાપત્તિ ઉત્તરિમનુસ્સધમ્મપારાજિકાપત્તિયા મેથુનધમ્મપારાજિકાપત્તિયા અદિન્નાદાનપારાજિકાપત્તિયા અઞ્ઞભાગિયા. ઉત્તરિમનુસ્સધમ્મપારાજિકાપત્તિ મેથુનધમ્મપારાજિકાપત્તિયા અદિન્નાદાનપારાજિકાપત્તિયા મનુસ્સવિગ્ગહપારાજિકાપત્તિયા અઞ્ઞભાગિયા. એવં આપત્તાધિકરણં આપત્તાધિકરણસ્સ અઞ્ઞભાગિયં.

કથં આપત્તાધિકરણં આપત્તાધિકરણસ્સ તબ્ભાગિયં? મેથુનધમ્મપારાજિકાપત્તિ મેથુનધમ્મપારાજિકાપત્તિયા તબ્ભાગિયા. અદિન્નાદાનપારાજિકાપત્તિ અદિન્નાદાનપારાજિકાપત્તિયા તબ્ભાગિયા. મનુસ્સવિગ્ગહપારાજિકાપત્તિ મનુસ્સવિગ્ગહપારાજિકાપત્તિયા તબ્ભાગિયા. ઉત્તરિમનુસ્સધમ્મપારાજિકાપત્તિ ઉત્તરિમનુસ્સધમ્મપારાજિકાપત્તિયા તબ્ભાગિયા. એવં આપત્તાધિકરણં આપત્તાધિકરણસ્સ તબ્ભાગિયં.

કિચ્ચાધિકરણં કિચ્ચાધિકરણસ્સ તબ્ભાગિયં. એવં અધિકરણં અધિકરણસ્સ તબ્ભાગિયં.

૩૯૪. કિઞ્ચિ દેસં લેસમત્તં ઉપાદાયાતિ લેસો નામ દસ લેસા – જાતિલેસો, નામલેસો, ગોત્તલેસો, લિઙ્ગલેસો, આપત્તિલેસો, પત્તલેસો, ચીવરલેસો, ઉપજ્ઝાયલેસો, આચરિયલેસો, સેનાસનલેસો.

૩૯૫. જાતિલેસો નામ ખત્તિયો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં ખત્તિયં પસ્સિત્વા ચોદેતિ – ‘‘ખત્તિયો મયા દિટ્ઠો [એત્થ ‘‘પારાજિકં ધમ્મં અજ્ઝાપજ્જન્તો’’તિ પાઠો ઊનો મઞ્ઞે, અટ્ઠકથાયં હિ ‘‘ખત્તિયો મયા દિટ્ઠો પારાજિકં ધમ્મં અજ્ઝાપજ્જન્તો’’તિ દિસ્સતિ]. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ, નત્થિ તયા સદ્ધિં ઉપોસથો વા પવારણા વા સઙ્ઘકમ્મં વા’’તિ, આપત્તિ વાચાય, વાચાય સઙ્ઘાદિસેસસ્સ.

બ્રાહ્મણો દિટ્ઠો હોતિ…પે… વેસ્સો દિટ્ઠો હોતિ…પે… સુદ્દો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં સુદ્દં પસ્સિત્વા ચોદેતિ – ‘‘સુદ્દો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૩૯૬. નામલેસો નામ બુદ્ધરક્ખિતો દિટ્ઠો હોતિ…પે… ધમ્મરક્ખિતો દિટ્ઠો હોતિ…પે… સઙ્ઘરક્ખિતો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં સઙ્ઘરક્ખિતં પસ્સિત્વા ચોદેતિ – ‘‘સઙ્ઘરક્ખિતો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૩૯૭. ગોત્તલેસો નામ ગોતમો દિટ્ઠો હોતિ…પે… મોગ્ગલ્લાનો દિટ્ઠો હોતિ…પે… કચ્ચાયનો દિટ્ઠો હોતિ…પે… વાસિટ્ઠો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં વાસિટ્ઠં પસ્સિત્વા ચોદેતિ – ‘‘વાસિટ્ઠો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૩૯૮. લિઙ્ગલેસો નામ દીઘો દિટ્ઠો હોતિ…પે… રસ્સો દિટ્ઠો હોતિ…પે… કણ્હો દિટ્ઠો હોતિ…પે… ઓદાતો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં ઓદાતં પસ્સિત્વા ચોદેતિ – ‘‘ઓદાતો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૩૯૯. આપત્તિલેસો નામ લહુકં આપત્તિં આપજ્જન્તો દિટ્ઠો હોતિ. તઞ્ચે પારાજિકેન ચોદેતિ – ‘‘અસ્સમણોસિ, અસક્યપુત્તિયોસિ…પે… આપત્તિ વાચાય, વાચાય સઙ્ઘાદિસેસસ્સ.

૪૦૦. પત્તલેસો નામ લોહપત્તધરો દિટ્ઠો હોતિ…પે… સાટકપત્તધરો દિટ્ઠો હોતિ…પે… સુમ્ભકપત્તધરો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં સુમ્ભકપત્તધરં પસ્સિત્વા ચોદેતિ – ‘‘સુમ્ભકપત્તધરો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૪૦૧. ચીવરલેસો નામ પંસુકૂલિકો દિટ્ઠો હોતિ…પે… ગહપતિચીવરધરો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં ગહપતિચીવરધરં પસ્સિત્વા ચોદેતિ – ‘‘ગહપતિચીવરધરો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૪૦૨. ઉપજ્ઝાયલેસો નામ ઇત્થન્નામસ્સ સદ્ધિવિહારિકો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં ઇત્થન્નામસ્સ સદ્ધિવિહારિકં પસ્સિત્વા ચોદેતિ – ‘‘ઇત્થન્નામસ્સ સદ્ધિવિહારિકો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૪૦૩. આચરિયલેસો નામ ઇત્થન્નામસ્સ અન્તેવાસિકો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં ઇત્થન્નામસ્સ અન્તેવાસિકં પસ્સિત્વા ચોદેતિ – ‘‘ઇત્થન્નામસ્સ અન્તેવાસિકો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ’’…પે… આપત્તિ વાચાય, વાચાય સઙ્ઘાદિસેસસ્સ.

૪૦૪. સેનાસનલેસો નામ ઇત્થન્નામસેનાસનવાસિકો દિટ્ઠો હોતિ પારાજિકં ધમ્મં અજ્ઝાપજ્જન્તો. અઞ્ઞં ઇત્થન્નામસેનાસનવાસિકં પસ્સિત્વા ચોદેતિ – ‘‘ઇત્થન્નામસેનાસનવાસિકો મયા દિટ્ઠો. પારાજિકં ધમ્મં અજ્ઝાપન્નોસિ, અસ્સમણોસિ, અસક્યપુત્તિયોસિ, નત્થિ તયા સદ્ધિં ઉપોસથો વા પવારણા વા સઙ્ઘકમ્મં વા’’તિ, આપત્તિ વાચાય, વાચાય સઙ્ઘાદિસેસસ્સ.

૪૦૫. પારાજિકેન ધમ્મેનાતિ ચતુન્નં અઞ્ઞતરેન.

અનુદ્ધંસેય્યાતિ ચોદેતિ વા ચોદાપેતિ વા.

અપ્પેવ નામ નં ઇમમ્હા બ્રહ્મચરિયાચાવેય્યન્તિ ભિક્ખુભાવા ચાવેય્યં, સમણધમ્મા ચાવેય્યં, સીલક્ખન્ધા ચાવેય્યં, તપોગુણા ચાવેય્યં.

તતો અપરેન સમયેનાતિ યસ્મિં ખણે અનુદ્ધંસિતો હોતિ, તં ખણં તં લયં તં મુહુત્તં વીતિવત્તે.

સમનુગ્ગાહીયમાનોતિ યેન વત્થુના અનુદ્ધંસિતો હોતિ તસ્મિં વત્થુસ્મિં સમનુગ્ગાહીયમાનો.

અસમનુગ્ગાહીયમાનોતિ ન કેનચિ વુચ્ચમાનો.

અધિકરણં નામ ચત્તારિ અધિકરણાનિ – વિવાદાધિકરણં, અનુવાદાધિકરણં, આપત્તાધિકરણં, કિચ્ચાધિકરણં.

કોચિ દેસો લેસમત્તો ઉપાદિન્નોતિ તેસં દસન્નં લેસાનં અઞ્ઞતરો લેસો ઉપાદિન્નો હોતિ.

ભિક્ખુ ચ દોસં પતિટ્ઠાતીતિ તુચ્છકં મયા ભણિતં, મુસા મયા ભણિતં, અભૂતં મયા ભણિતં, અજાનન્તેન મયા ભણિતં.

સઙ્ઘાદિસેસોતિ …પે… તેનપિ વુચ્ચતિ સઙ્ઘાદિસેસોતિ.

૪૦૬. ભિક્ખુ સઙ્ઘાદિસેસં અજ્ઝાપજ્જન્તો દિટ્ઠો હોતિ, સઙ્ઘાદિસેસે સઙ્ઘાદિસેસદિટ્ઠિ હોતિ. તઞ્ચે પારાજિકેન ચોદેતિ – ‘‘અસ્સમણોસિ, અસક્યપુત્તિયોસિ, નત્થિ તયા સદ્ધિં ઉપોસથો વા પવારણા વા સઙ્ઘકમ્મં વા’’તિ, એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

ભિક્ખુ સઙ્ઘાદિસેસં અજ્ઝાપજ્જન્તો દિટ્ઠો હોતિ, સઙ્ઘાદિસેસે થુલ્લચ્ચયદિટ્ઠિ હોતિ…પે… પાચિત્તિયદિટ્ઠિ હોતિ… પાટિદેસનીયદિટ્ઠિ હોતિ… દુક્કટદિટ્ઠિ હોતિ… દુબ્ભાસિતદિટ્ઠિ હોતિ. તઞ્ચે પારાજિકેન ચોદેતિ – ‘‘અસ્સમણોસિ’’…પે… એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

ભિક્ખુ થુલ્લચ્ચયં અજ્ઝાપજ્જન્તો દિટ્ઠો હોતિ થુલ્લચ્ચયે થુલ્લચ્ચયદિટ્ઠિ હોતિ…પે… થુલ્લચ્ચયે પાચિત્તિયદિટ્ઠિ હોતિ… પાટિદેસનીયદિટ્ઠિ હોતિ… દુક્કટદિટ્ઠિ હોતિ… દુબ્ભાસિતદિટ્ઠિ હોતિ… સઙ્ઘાદિસેસદિટ્ઠિ હોતિ. તઞ્ચે પારાજિકેન ચોદેતિ – ‘‘અસ્સમણોસિ’’ …પે… એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

ભિક્ખુ પાચિત્તિયં…પે… પાટિદેસનીયં… દુક્કટં… દુબ્ભાસિતં અજ્ઝાપજ્જન્તો દિટ્ઠો હોતિ, દુબ્ભાસિતે દુબ્ભાસિતદિટ્ઠિ હોતિ…પે… દુબ્ભાસિતે સઙ્ઘાદિસેસદિટ્ઠિ હોતિ… થુલ્લચ્ચયદિટ્ઠિ હોતિ… પાચિત્તિયદિટ્ઠિ હોતિ… પાટિદેસનીયદિટ્ઠિ હોતિ… દુક્કટદિટ્ઠિ હોતિ. તઞ્ચે પારાજિકેન ચોદેતિ – ‘‘અસ્સમણોસિ, અસક્યપુત્તિયોસિ, નત્થિ તયા સદ્ધિં ઉપોસથો વા પવારણા વા સઙ્ઘકમ્મં વા’’તિ, એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

એકેકં મૂલં કાતુન ચક્કં બન્ધિતબ્બં.

૪૦૭. ભિક્ખુ સઙ્ઘાદિસેસં અજ્ઝાપજ્જન્તો દિટ્ઠો હોતિ સઙ્ઘાદિસેસે સઙ્ઘાદિસેસદિટ્ઠિ હોતિ. તઞ્ચે પારાજિકેન ચોદાપેતિ – ‘‘અસ્સમણોસિ’’…પે… એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

ભિક્ખુ સઙ્ઘાદિસેસં અજ્ઝાપજ્જન્તો દિટ્ઠો હોતિ, સઙ્ઘાદિસેસે થુલ્લચ્ચયદિટ્ઠિ હોતિ…પે… પાચિત્તિયદિટ્ઠિ હોતિ… પાટિદેસનીયદિટ્ઠિ હોતિ… દુક્કટદિટ્ઠિ હોતિ… દુબ્ભાસિતદિટ્ઠિ હોતિ. તઞ્ચે પારાજિકેન ચોદાપેતિ – ‘‘અસ્સમણોસિ’’…પે… એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

ભિક્ખુ થુલ્લચ્ચયં અજ્ઝાપજ્જન્તો દિટ્ઠો હોતિ થુલ્લચ્ચયે થુલ્લચ્ચયદિટ્ઠિ હોતિ…પે… થુલ્લચ્ચયે પાચિત્તિયદિટ્ઠિ હોતિ… પાટિદેસનીયદિટ્ઠિ હોતિ… દુક્કટદિટ્ઠિ હોતિ… દુબ્ભાસિતદિટ્ઠિ હોતિ… સઙ્ઘાદિસેસદિટ્ઠિ હોતિ. તઞ્ચે પારાજિકેન ચોદાપેતિ – ‘‘અસ્સમણોસિ’’…પે… એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

ભિક્ખુ પાચિત્તિયં…પે… પાટિદેસનીયં… દુક્કટં… દુબ્ભાસિતં અજ્ઝાપજ્જન્તો દિટ્ઠો હોતિ દુબ્ભાસિતે દુબ્ભાસિતદિટ્ઠિ હોતિ…પે… દુબ્ભાસિતે સઙ્ઘાદિસેસદિટ્ઠિ હોતિ… થુલ્લચ્ચયદિટ્ઠિ હોતિ… પાચિત્તિયદિટ્ઠિ હોતિ… પાટિદેસનીયદિટ્ઠિ હોતિ… દુક્કટદિટ્ઠિ હોતિ. તઞ્ચે પારાજિકેન ચોદાપેતિ – ‘‘અસ્સમણોસિ, અસક્યપુત્તિયોસિ, નત્થિ તયા સદ્ધિં ઉપોસથો વા પવારણા વા સઙ્ઘકમ્મં વા’’તિ, એવમ્પિ આપત્તઞ્ઞભાગિયં હોતિ લેસો ચ ઉપાદિન્નો, આપત્તિ વાચાય, વાચાય સઙ્ઘાદિસેસસ્સ.

૪૦૮. અનાપત્તિ તથાસઞ્ઞી ચોદેતિ વા ચોદાપેતિ વા, ઉમ્મત્તકસ્સ, આદિકમ્મિકસ્સાતિ.

દુતિયદુટ્ઠદોસસિક્ખાપદં નિટ્ઠિતં નવમં.