૬. છટ્ઠસિક્ખાપદં

૭૫૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ઉપાસકા ભિક્ખુનિસઙ્ઘસ્સ ચીવરત્થાય છન્દકં સઙ્ઘરિત્વા અઞ્ઞતરસ્સ પાવારિકસ્સ ઘરે પરિક્ખારં નિક્ખિપિત્વા ભિક્ખુનિયો ઉપસઙ્કમિત્વા એતદવોચું – ‘‘અમુકસ્સ, અય્યે, પાવારિકસ્સ ઘરે ચીવરત્થાય પરિક્ખારો નિક્ખિત્તો, તતો ચીવરં આહરાપેત્વા ભાજેથા’’તિ. ભિક્ખુનિયો તેન પરિક્ખારેન ભેસજ્જં ચેતાપેત્વા પરિભુઞ્જિંસુ. ઉપાસકા જાનિત્વા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો અઞ્ઞદત્થિકેન પરિક્ખારેન અઞ્ઞુદ્દિસિકેન સઙ્ઘિકેન અઞ્ઞં ચેતાપેસ્સન્તી’’તિ! અસ્સોસું ખો ભિક્ખુનિયો તેસં ઉપાસકાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા …પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો અઞ્ઞદત્થિકેન પરિક્ખારેન અઞ્ઞુદ્દિસિકેન સઙ્ઘિકેન અઞ્ઞં ચેતાપેસ્સન્તી’’તિ…પે… સચ્ચં કિર, ભિક્ખવે, ભિક્ખુનિયો અઞ્ઞદત્થિકેન પરિક્ખારેન અઞ્ઞુદ્દિસિકેન સઙ્ઘિકેન અઞ્ઞં ચેતાપેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો અઞ્ઞદત્થિકેન પરિક્ખારેન અઞ્ઞુદ્દિસિકેન સઙ્ઘિકેન અઞ્ઞં ચેતાપેસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૭૫૯. ‘‘યા પન ભિક્ખુની અઞ્ઞદત્થિકેન પરિક્ખારેન અઞ્ઞુદ્દિસિકેન સઙ્ઘિકેન અઞ્ઞં ચેતાપેય્ય, નિસ્સગ્ગિયં પાચિત્તિય’’ન્તિ.

૭૬૦. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અઞ્ઞદત્થિકેન પરિક્ખારેન અઞ્ઞુદ્દિસિકેનાતિ અઞ્ઞસ્સત્થાય દિન્નેન.

સઙ્ઘિકેનાતિ સઙ્ઘસ્સ, ન ગણસ્સ, ન એકભિક્ખુનિયા.

અઞ્ઞં ચેતાપેય્યાતિ યંઅત્થાય દિન્નં, તં ઠપેત્વા અઞ્ઞં ચેતાપેતિ, પયોગે દુક્કટં. પટિલાભેન નિસ્સગ્ગિયં હોતિ. નિસ્સજ્જિતબ્બં સઙ્ઘસ્સ વા ગણસ્સ વા એકભિક્ખુનિયા વા. એવઞ્ચ પન, ભિક્ખવે, નિસ્સજ્જિતબ્બં…પે… ‘‘ઇદં મે, અય્યે, અઞ્ઞદત્થિકેન પરિક્ખારેન અઞ્ઞુદ્દિસિકેન સઙ્ઘિકેન અઞ્ઞં ચેતાપિતં નિસ્સગ્ગિયં, ઇમાહં સઙ્ઘસ્સ નિસ્સજ્જામી’’તિ.…પે… દદેય્યાતિ…પે… દદેય્યુન્તિ…પે… અય્યાય દમ્મીતિ.

૭૬૧. અઞ્ઞદત્થિકે અઞ્ઞદત્થિકસઞ્ઞા અઞ્ઞં ચેતાપેતિ, નિસ્સગ્ગિયં પાચિત્તિયં. અઞ્ઞદત્થિકે વેમતિકા અઞ્ઞં ચેતાપેતિ, નિસ્સગ્ગિયં પાચિત્તિયં. અઞ્ઞદત્થિકે અનઞ્ઞદત્થિકસઞ્ઞા અઞ્ઞં ચેતાપેતિ, નિસ્સગ્ગિયં પાચિત્તિયં. નિસ્સટ્ઠં પટિલભિત્વા યથાદાને ઉપનેતબ્બં.

અનઞ્ઞદત્થિકે અઞ્ઞદત્થિકસઞ્ઞા, આપત્તિ દુક્કટસ્સ. અનઞ્ઞદત્થિકે વેમતિકા, આપત્તિ દુક્કટસ્સ. અનઞ્ઞદત્થિકે અનઞ્ઞદત્થિકસઞ્ઞા, અનાપત્તિ.

૭૬૨. અનાપત્તિ સેસકં ઉપનેતિ, સામિકે અપલોકેત્વા ઉપનેતિ, આપદાસુ, ઉમ્મત્તિકાય, આદિકમ્મિકાયાતિ.

છટ્ઠસિક્ખાપદં નિટ્ઠિતં.