૧૨. દ્વાદસમસિક્ખાપદં

૭૮૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન થુલ્લનન્દા ભિક્ખુની બહુસ્સુતા હોતિ ભાણિકા વિસારદા પટ્ટા ધમ્મિં કથં કાતું. અથ ખો રાજા પસેનદિ કોસલો ઉણ્હકાલે મહગ્ઘં ખોમં પારુપિત્વા યેન થુલ્લનન્દા ભિક્ખુની તેનુપસઙ્કમિ; ઉપસઙ્કમિત્વા થુલ્લનન્દં ભિક્ખુનિં અભિવાદેત્વા એકમન્તં નિસીદિ. એકમન્તં નિસિન્નં ખો રાજાનં પસેનદિં કોસલં થુલ્લનન્દા ભિક્ખુની ધમ્મિયા કથાય સન્દસ્સેસિ સમાદપેસિ સમુત્તેજેસિ સમ્પહંસેસિ. અથ ખો રાજા પસેનદિ કોસલો થુલ્લનન્દાય ભિક્ખુનિયા ધમ્મિયા કથાય સન્દસ્સિતો સમાદપિતો સમુત્તેજિતો સમ્પહંસિતો થુલ્લનન્દં ભિક્ખુનિં એતદવોચ – ‘‘વદેય્યાસિ, અય્યે, યેન અત્થો’’તિ. ‘‘સચે મે ત્વં, મહારાજ, દાતુકામોસિ, ઇમં ખોમં દેહી’’તિ. અથ ખો રાજા પસેનદિ કોસલો થુલ્લનન્દાય ભિક્ખુનિયા ખોમં દત્વા ઉટ્ઠાયાસના થુલ્લનન્દં ભિક્ખુનિં અભિવાદેત્વા પદક્ખિણં કત્વા પક્કામિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘મહિચ્છા ઇમા ભિક્ખુનિયો અસન્તુટ્ઠા. કથઞ્હિ નામ રાજાનં ખોમં વિઞ્ઞાપેસ્સન્તી’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા રાજાનં ખોમં વિઞ્ઞાપેસ્સતી’’તિ…પે… સચ્ચં કિર, ભિક્ખવે, થુલ્લનન્દા ભિક્ખુની રાજાનં ખોમં વિઞ્ઞાપેતીતિ [વિઞ્ઞાપેસીતિ (ક.)]? ‘‘સચ્ચં, ભગવાતિ’’. વિગરહિ બુદ્ધો ભગવા…પે… કથઞ્હિ નામ, ભિક્ખવે, થુલ્લનન્દા ભિક્ખુની રાજાનં ખોમં વિઞ્ઞાપેસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૭૮૯. ‘‘લહુપાવુરણં પન ભિક્ખુનિયા ચેતાપેન્તિયા અડ્ઢતેય્યકંસપરમં ચેતાપેતબ્બં. તતો ચે ઉત્તરિ ચેતાપેય્ય, નિસ્સગ્ગિયં પાચિત્તિય’’ન્તિ.

૭૯૦. લહુપાવુરણં નામ યં કિઞ્ચિ ઉણ્હકાલે પાવુરણં.

ચેતાપેન્તિયાતિ વિઞ્ઞાપેન્તિયા.

અડ્ઢતેય્યકંસપરમં ચેતાપેતબ્બન્તિ દસકહાપણગ્ઘનકં ચેતાપેતબ્બં.

તતો ચે ઉત્તરિ ચેતાપેય્યાતિ તતુત્તરિ વિઞ્ઞાપેતિ, પયોગે દુક્કટં. પટિલાભેન નિસ્સગ્ગિયં હોતિ. નિસ્સજ્જિતબ્બં સઙ્ઘસ્સ વા ગણસ્સ વા એકભિક્ખુનિયા વા. એવઞ્ચ પન, ભિક્ખવે, નિસ્સજ્જિતબ્બં…પે… ઇદં મે, અય્યે, લહુપાવુરણં અતિરેકઅડ્ઢતેય્યકંસપરમં ચેતાપિતં નિસ્સગ્ગિયં, ઇમાહં સઙ્ઘસ્સ નિસ્સજ્જામીતિ…પે… દદેય્યાતિ…પે… દદેય્યુન્તિ…પે… અય્યાય દમ્મીતિ.

૭૯૧. અતિરેકઅડ્ઢતેય્યકંસે અતિરેકસઞ્ઞા ચેતાપેતિ, નિસ્સગ્ગિયં પાચિત્તિયં. અતિરેકઅડ્ઢતેય્યકંસે વેમતિકા ચેતાપેતિ, નિસ્સગ્ગિયં પાચિત્તિયં. અતિરેકઅડ્ઢતેય્યકંસે ઊનકસઞ્ઞા ચેતાપેતિ, નિસ્સગ્ગિયં પાચિત્તિયં.

ઊનકઅડ્ઢતેય્યકંસે અતિરેકસઞ્ઞા, આપત્તિ દુક્કટસ્સ. ઊનકઅડ્ઢતેય્યકંસે વેમતિકા, આપત્તિ દુક્કટસ્સ. ઊનકઅડ્ઢતેય્યકંસે ઊનકસઞ્ઞા, અનાપત્તિ.

૭૯૨. અનાપત્તિ અડ્ઢતેય્યકંસપરમં ચેતાપેતિ, ઊનકઅડ્ઢતેય્યકંસપરમં ચેતાપેતિ, ઞાતકાનં, પવારિતાનં, અઞ્ઞસ્સત્થાય, અત્તનો ધનેન, મહગ્ઘં ચેતાપેતુકામસ્સ અપ્પગ્ઘં ચેતાપેતિ, ઉમ્મત્તિકાય, આદિકમ્મિકાયાતિ.

દ્વાદસમસિક્ખાપદં નિટ્ઠિતં.

ઉદ્દિટ્ઠા ખો, અય્યાયો, તિંસ નિસ્સગ્ગિયા પાચિત્તિયા ધમ્મા. તત્થાય્યાયો પુચ્છામિ – ‘‘કચ્ચિત્થ પરિસુદ્ધા’’? દુતિયમ્પિ પુચ્છામિ – ‘‘કચ્ચિત્થ પરિસુદ્ધા’’? તતિયમ્પિ પુચ્છામિ – ‘‘કચ્ચિત્થ પરિસુદ્ધા’’? પરિસુદ્ધેત્થાય્યાયો, તસ્મા તુણ્હી, એવમેતં ધારયામીતિ.

ભિક્ખુનિવિભઙ્ગે નિસ્સગ્ગિયકણ્ડં નિટ્ઠિતં.