૨૩૧. દુગ્ગહિતસુગ્ગહિતાદિકથા

૩૭૭. તેન ખો પન સમયેન આયસ્મા રેવતો અઞ્ઞતરસ્સ ભિક્ખુનો હત્થે આયસ્મતો સારિપુત્તસ્સ ચીવરં પાહેસિ – ‘‘ઇમં ચીવરં થેરસ્સ દેહી’’તિ. અથ ખો સો ભિક્ખુ અન્તરામગ્ગે આયસ્મતો રેવતસ્સ વિસ્સાસા તં ચીવરં અગ્ગહેસિ. અથ ખો આયસ્મા રેવતો આયસ્મતા સારિપુત્તેન સમાગન્ત્વા પુચ્છિ – ‘‘અહં, ભન્તે, થેરસ્સ ચીવરં પાહેસિં. સમ્પત્તં તં ચીવર’’ન્તિ? ‘‘નાહં તં, આવુસો, ચીવરં પસ્સામી’’તિ. અથ ખો આયસ્મા રેવતો તં ભિક્ખું એતદવોચ – ‘‘અહં, આવુસો, આયસ્મતો હત્થે થેરસ્સ ચીવરં પાહેસિં. કહં તં ચીવર’’ન્તિ? ‘‘અહં, ભન્તે, આયસ્મતો વિસ્સાસા તં ચીવરં અગ્ગહેસિ’’ન્તિ. ભગવતો એતમત્થં આરોચેસું.

૩૭૮. ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દેહી’’તિ. સો અન્તરામગ્ગે યો પહિણતિ તસ્સ વિસ્સાસા ગણ્હાતિ. સુગ્ગહિતં. યસ્સ પહિય્યતિ તસ્સ વિસ્સાસા ગણ્હાતિ. દુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દેહી’’તિ. સો અન્તરામગ્ગે યસ્સ પહિય્યતિ તસ્સ વિસ્સાસા ગણ્હાતિ. દુગ્ગહિતં. યો પહિણતિ તસ્સ વિસ્સાસા ગણ્હાતિ. સુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દેહી’’તિ. સો અન્તરામગ્ગે સુણાતિ – યો પહિણતિ સો કાલઙ્કતોતિ. તસ્સ મતકચીવરં અધિટ્ઠાતિ. સ્વાધિટ્ઠિતં. યસ્સ પહિય્યતિ તસ્સ વિસ્સાસા ગણ્હાતિ. દુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દેહી’’તિ. સો અન્તરામગ્ગે સુણાતિ – યસ્સ પહિય્યતિ સો કાલઙ્કતોતિ. તસ્સ મતકચીવરં અધિટ્ઠાતિ. દ્વાધિટ્ઠિતં. યો પહિણતિ તસ્સ વિસ્સાસા ગણ્હાતિ. સુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દેહી’’તિ. સો અન્તરામગ્ગે સુણાતિ – ઉભો કાલઙ્કતાતિ. યો પહિણતિ તસ્સ મતકચીવરં અધિટ્ઠાતિ. સ્વાધિટ્ઠિતં. યસ્સ પહિય્યતિ તસ્સ મતકચીવરં અધિટ્ઠાતિ. દ્વાધિટ્ઠિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દમ્મી’’તિ. સો અન્તરામગ્ગે યો પહિણતિ તસ્સ વિસ્સાસા ગણ્હાતિ. દુગ્ગહિતં. યસ્સ પહિય્યતિ તસ્સ વિસ્સાસા ગણ્હાતિ. સુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દમ્મી’’તિ. સો અન્તરામગ્ગે યસ્સ પહિય્યતિ તસ્સ વિસ્સાસા ગણ્હાતિ. સુગ્ગહિતં. યો પહિણતિ તસ્સ વિસ્સાસા ગણ્હાતિ. દુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દમ્મી’’તિ. સો અન્તરામગ્ગે સુણાતિ – ‘‘યો પહિણતિ સો કાલઙ્કતો’’તિ. તસ્સ મતકચીવરં અધિટ્ઠાતિ. દ્વાધિટ્ઠિતં. યસ્સ પહિય્યતિ તસ્સ વિસ્સાસા ગણ્હાતિ. સુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દમ્મી’’તિ. સો અન્તરામગ્ગે સુણાતિ – ‘‘યસ્સ પહિય્યતિ સો કાલઙ્કતો’’તિ. તસ્સ મતકચીવરં અધિટ્ઠાતિ. સ્વાધિટ્ઠિતં. યો પહિણતિ તસ્સ વિસ્સાસા ગણ્હાતિ. દુગ્ગહિતં.

ઇધ પન, ભિક્ખવે, ભિક્ખુ ભિક્ખુસ્સ હત્થે ચીવરં પહિણતિ – ‘‘ઇમં ચીવરં ઇત્થન્નામસ્સ દમ્મી’’તિ. સો અન્તરામગ્ગે સુણાતિ ‘‘ઉભો કાલઙ્કતા’’તિ. યો પહિણતિ તસ્સ મતકચીવરં અધિટ્ઠાતિ. દ્વાધિટ્ઠિતં. યસ્સ પહિય્યતિ તસ્સ મતકચીવરં અધિટ્ઠાતિ. સ્વાધિટ્ઠિતં.

દુગ્ગહિતસુગ્ગહિતાદિકથા નિટ્ઠિતા.