૨૨૭. કુસચીરાદિપટિક્ખેપકથા

૩૭૧. તેન ખો પન સમયેન અઞ્ઞતરો ભિક્ખુ કુસચીરં નિવાસેત્વા…પે… વાકચીરં નિવાસેત્વા…પે… ફલકચીરં નિવાસેત્વા…પે… કેસકમ્બલં નિવાસેત્વા…પે… વાળકમ્બલં નિવાસેત્વા…પે… ઉલૂકપક્ખં નિવાસેત્વા…પે… અજિનક્ખિપં નિવાસેત્વા યેન ભગવા તેનુપસઙ્કમિ; ઉપસઙ્કમિત્વા ભગવન્તં એતદવોચ – ‘‘ભગવા, ભન્તે, અનેકપરિયાયેન અપ્પિચ્છસ્સ સન્તુટ્ઠસ્સ સલ્લેખસ્સ ધુતસ્સ પાસાદિકસ્સ અપચયસ્સ વીરિયારમ્ભસ્સ વણ્ણવાદી. ઇદં, ભન્તે, અજિનક્ખિપં અનેકપરિયાયેન અપ્પિચ્છતાય સન્તુટ્ઠિતાય સલ્લેખાય ધુતતાય પાસાદિકતાય અપચયાય વીરિયારમ્ભાય સંવત્તતિ. સાધુ, ભન્તે, ભગવા ભિક્ખૂનં અજિનક્ખિપં અનુજાનાતૂ’’તિ. વિગરહિ બુદ્ધો ભગવા – ‘‘અનનુચ્છવિકં, મોઘપુરિસ, અનનુલોમિકં અપ્પતિરૂપં અસ્સામણકં અકપ્પિયં અકરણીયં. કથઞ્હિ નામ ત્વં, મોઘપુરિસ, અજિનક્ખિપં તિત્થિયધજં ધારેસ્સસિ. નેતં, મોઘપુરિસ, અપ્પસન્નાનં વા પસાદાય…પે… વિગરહિત્વા…પે… ધમ્મિં કથં કત્વા ભિક્ખૂ આમન્તેસિ – ‘‘ન, ભિક્ખવે, અજિનક્ખિપં તિત્થિયધજં ધારેતબ્બં. યો ધારેય્ય, આપત્તિ થુલ્લચ્ચયસ્સા’’તિ.

તેન ખો પન સમયેન અઞ્ઞતરો ભિક્ખુ અક્કનાળં નિવાસેત્વા…પે… પોત્થકં નિવાસેત્વા યેન ભગવા તેનુપસઙ્કમિ, ઉપસઙ્કમિત્વા ભગવન્તં એતદવોચ – ‘‘ભગવા, ભન્તે, અનેકપરિયાયેન અપ્પિચ્છસ્સ સન્તુટ્ઠસ્સ સલ્લેખસ્સ ધુતસ્સ પાસાદિકસ્સ અપચયસ્સ વીરિયારમ્ભસ્સ, વણ્ણવાદી. અયં, ભન્તે, પોત્થકો અનેકપરિયાયેન અપ્પિચ્છતાય સન્તુટ્ઠિતાય સલ્લેખાય ધુતતાય પાસાદિકતાય અપચયાય વીરિયારમ્ભાય સંવત્તતિ. સાધુ, ભન્તે, ભગવા ભિક્ખૂનં પોત્થકં અનુજાનાતૂ’’તિ. વિગરહિ બુદ્ધો ભગવા – ‘‘અનનુચ્છવિકં, મોઘપુરિસ, અનનુલોમિકં અપ્પતિરૂપં અસ્સામણકં અકપ્પિયં અકરણીયં. કથઞ્હિ નામ ત્વં, મોઘપુરિસ, પોત્થકં નિવાસેસ્સસિ. નેતં, મોઘપુરિસ, અપ્પસન્નાનં વા પસાદાય…પે… વિગરહિત્વા…પે… ધમ્મિં કથં કત્વા ભિક્ખૂ આમન્તેસિ – ‘‘ન, ભિક્ખવે, પોત્થકો નિવાસેતબ્બો. યો નિવાસેય્ય, આપત્તિ દુક્કટસ્સા’’તિ.

કુસચીરાદિપટિક્ખેપકથા નિટ્ઠિતા.