૨૨૫. મતસન્તકકથા

૩૬૭. તેન ખો પન સમયેન દ્વે ભિક્ખૂ કોસલેસુ જનપદે અદ્ધાનમગ્ગપ્પટિપન્ના હોન્તિ. તે અઞ્ઞતરં આવાસં ઉપગચ્છિંસુ. તત્થ અઞ્ઞતરો ભિક્ખુ ગિલાનો હોતિ. અથ ખો તેસં ભિક્ખૂનં એતદહોસિ – ‘‘ભગવતા ખો, આવુસો, ગિલાનુપટ્ઠાનં વણ્ણિતં. હન્દ, મયં, આવુસો, ઇમં ભિક્ખું ઉપટ્ઠહેમા’’તિ. તે તં ઉપટ્ઠહિંસુ. સો તેહિ ઉપટ્ઠહિયમાનો કાલમકાસિ. અથ ખો તે ભિક્ખૂ તસ્સ ભિક્ખુનો પત્તચીવરમાદાય સાવત્થિં ગન્ત્વા ભગવતો એતમત્થં આરોચેસું. ‘‘ભિક્ખુસ્સ, ભિક્ખવે, કાલઙ્કતે સઙ્ઘો સામી પત્તચીવરે, અપિચ ગિલાનુપટ્ઠાકા બહૂપકારા. અનુજાનામિ, ભિક્ખવે, સઙ્ઘેન તિચીવરઞ્ચ પત્તઞ્ચ ગિલાનુપટ્ઠાકાનં દાતું. એવઞ્ચ પન, ભિક્ખવે, દાતબ્બં. તેન ગિલાનુપટ્ઠાકેન ભિક્ખુના સઙ્ઘં ઉપસઙ્કમિત્વા એવમસ્સ વચનીયો – ‘ઇત્થન્નામો, ભન્તે, ભિક્ખુ કાલઙ્કતો. ઇદં તસ્સ તિચીવરઞ્ચ પત્તો ચા’’’તિ. બ્યત્તેન ભિક્ખુના પટિબલેન સઙ્ઘો ઞાપેતબ્બો –

‘‘સુણાતુ મે, ભન્તે, સઙ્ઘો. ઇત્થન્નામો ભિક્ખુ કાલઙ્કતો. ઇદં તસ્સ તિચીવરઞ્ચ પત્તો ચ. યદિ સઙ્ઘસ્સ પત્તકલ્લં, સઙ્ઘો ઇમં તિચીવરઞ્ચ પત્તઞ્ચ ગિલાનુપટ્ઠાકાનં દદેય્ય. એસા ઞત્તિ.

‘‘સુણાતુ મે, ભન્તે, સઙ્ઘો. ઇત્થન્નામો ભિક્ખુ કાલઙ્કતો. ઇદં તસ્સ તિચીવરઞ્ચ પત્તો ચ. સઙ્ઘો ઇમં તિચીવરઞ્ચ પત્તઞ્ચ ગિલાનુપટ્ઠાકાનં દેતિ. યસ્સાયસ્મતો ખમતિ ઇમસ્સ તિચીવરસ્સ ચ પત્તસ્સ ચ ગિલાનુપટ્ઠાકાનં દાનં, સો તુણ્હસ્સ; યસ્સ નક્ખમતિ, સો ભાસેય્ય.

‘‘દિન્નં ઇદં સઙ્ઘેન તિચીવરઞ્ચ પત્તો ચ ગિલાનુપટ્ઠાકાનં. ખમતિ સઙ્ઘસ્સ, તસ્મા તુણ્હી, એવમેતં ધારયામી’’તિ.

૩૬૮. તેન ખો પન સમયેન અઞ્ઞતરો સામણેરો કાલઙ્કતો હોતિ. ભગવતો એતમત્થં આરોચેસું. સામણેરસ્સ, ભિક્ખવે, કાલઙ્કતે સઙ્ઘો સામી પત્તચીવરે, અપિ ચ ગિલાનુપટ્ઠાકા બહૂપકારા. અનુજાનામિ, ભિક્ખવે, સઙ્ઘેન ચીવરઞ્ચ પત્તઞ્ચ ગિલાનુપટ્ઠાકાનં દાતું. એવઞ્ચ પન, ભિક્ખવે, દાતબ્બં. તેન ગિલાનુપટ્ઠાકેન ભિક્ખુના સઙ્ઘં ઉપસઙ્કમિત્વા એવમસ્સ વચનીયો – ‘‘ઇત્થન્નામો, ભન્તે, સામણેરો કાલઙ્કતો, ઇદં તસ્સ ચીવરઞ્ચ પત્તો ચા’’તિ. બ્યત્તેન ભિક્ખુના પટિબલેન સઙ્ઘો ઞાપેતબ્બો –

‘‘સુણાતુ મે, ભન્તે, સઙ્ઘો. ઇત્થન્નામો સામણેરો કાલઙ્કતો. ઇદં તસ્સ ચીવરઞ્ચ પત્તો ચ. યદિ સઙ્ઘસ્સ પત્તકલ્લં, સઙ્ઘો ઇમં ચીવરઞ્ચ પત્તઞ્ચ ગિલાનુપટ્ઠાકાનં દદેય્ય. એસા ઞત્તિ.

‘‘સુણાતુ મે, ભન્તે, સઙ્ઘો. ઇત્થન્નામો સામણેરો કાલઙ્કતો. ઇદં તસ્સ ચીવરઞ્ચ પત્તો ચ. સઙ્ઘો ઇમં ચીવરઞ્ચ પત્તઞ્ચ ગિલાનુપટ્ઠાકાનં દેતિ. યસ્સાયસ્મતો ખમતિ ઇમસ્સ ચીવરસ્સ ચ પત્તસ્સ ચ ગિલાનુપટ્ઠાકાનં દાનં, સો તુણ્હસ્સ; યસ્સ નક્ખમતિ, સો ભાસેય્ય.

‘‘દિન્નં ઇદં સઙ્ઘેન ચીવરઞ્ચ પત્તો ચ ગિલાનુપટ્ઠાકાનં. ખમતિ સઙ્ઘસ્સ, તસ્મા તુણ્હી, એવમેતં ધારયામી’’તિ.

૩૬૯. તેન ખો પન સમયેન અઞ્ઞતરો ભિક્ખુ ચ સામણેરો ચ ગિલાનં ઉપટ્ઠહિંસુ. સો તેહિ ઉપટ્ઠહિયમાનો કાલમકાસિ. અથ ખો તસ્સ ગિલાનુપટ્ઠાકસ્સ ભિક્ખુનો એતદહોસિ – ‘‘કથં નુ ખો ગિલાનુપટ્ઠાકસ્સ સામણેરસ્સ ચીવરપટિવીસો દાતબ્બો’’તિ? ભગવતો એતમત્થં આરોચેસું. અનુજાનામિ, ભિક્ખવે, ગિલાનુપટ્ઠાકસ્સ સામણેરસ્સ સમકં પટિવીસં દાતુન્તિ.

તેન ખો પન સમયેન અઞ્ઞતરો ભિક્ખુ બહુભણ્ડો બહુપરિક્ખારો કાલઙ્કતો હોતિ. ભગવતો એતમત્થં આરોચેસું. ભિક્ખુસ્સ, ભિક્ખવે, કાલઙ્કતે સઙ્ઘો સામી પત્તચીવરે, અપિ ચ ગિલાનુપટ્ઠાકા બહૂપકારા. અનુજાનામિ, ભિક્ખવે, સઙ્ઘેન તિચીવરઞ્ચ પત્તઞ્ચ ગિલાનુપટ્ઠાકાનં દાતું. યં તત્થ લહુભણ્ડં લહુપરિક્ખારં તં સમ્મુખીભૂતેન સઙ્ઘેન ભાજેતું. યં તત્થ ગરુભણ્ડં ગરુપરિક્ખારં તં આગતાનાગતસ્સ ચાતુદ્દિસસ્સ સઙ્ઘસ્સ અવિસ્સજ્જિકં અવેભઙ્ગિકન્તિ.

મતસન્તકકથા નિટ્ઠિતા.