૨૨૩. ઉપનન્દસક્યપુત્તવત્થુ

૩૬૪. તેન ખો પન સમયેન આયસ્મા ઉપનન્દો સક્યપુત્તો સાવત્થિયં વસ્સંવુટ્ઠો અઞ્ઞતરં ગામકાવાસં અગમાસિ. તત્થ ચ ભિક્ખૂ ચીવરં ભાજેતુકામા સન્નિપતિંસુ. તે એવમાહંસુ – ‘‘ઇમાનિ ખો, આવુસો, સઙ્ઘિકાનિ ચીવરાનિ ભાજિયિસ્સન્તિ, સાદિયિસ્સસિ ભાગ’’ન્તિ? ‘‘આમાવુસો, સાદિયિસ્સામી’’તિ. તતો ચીવરભાગં ગહેત્વા અઞ્ઞં આવાસં અગમાસિ. તત્થપિ ભિક્ખૂ ચીવરં ભાજેતુકામા સન્નિપતિંસુ. તેપિ એવમાહંસુ – ‘‘ઇમાનિ ખો, આવુસો, સઙ્ઘિકાનિ ચીવરાનિ ભાજિયિસ્સન્તિ, સાદિયિસ્સસિ ભાગ’’ન્તિ? ‘‘આમાવુસો, સાદિયિસ્સામી’’તિ. તતોપિ ચીવરભાગં ગહેત્વા અઞ્ઞં આવાસં અગમાસિ. તત્થપિ ભિક્ખૂ ચીવરં ભાજેતુકામા સન્નિપતિંસુ. તેપિ એવમાહંસુ – ‘‘ઇમાનિ ખો, આવુસો, સઙ્ઘિકાનિ ચીવરાનિ ભાજિયિસ્સન્તિ, સાદિયિસ્સસિ ભાગ’’ન્તિ? ‘‘આમાવુસો, સાદિયિસ્સામી’’તિ. તતોપિ ચીવરભાગં ગહેત્વા મહન્તં ચીવરભણ્ડિકં આદાય પુનદેવ સાવત્થિં પચ્ચાગઞ્છિ. ભિક્ખૂ એવમાહંસુ – ‘‘મહાપુઞ્ઞોસિ ત્વં, આવુસો ઉપનન્દ, બહું તે ચીવરં ઉપ્પન્ન’’ન્તિ. ‘‘કુતો મે, આવુસો, પુઞ્ઞં? ઇધાહં, આવુસો, સાવત્થિયં વસ્સંવુટ્ઠો અઞ્ઞતરં ગામકાવાસં અગમાસિં. તત્થ ભિક્ખૂ ચીવરં ભાજેતુકામા સન્નિપતિંસુ. તે મં એવમાહંસુ – ‘ઇમાનિ ખો, આવુસો, સઙ્ઘિકાનિ ચીવરાનિ ભાજિયિસ્સન્તિ, સાદિયિસ્સસિ ભાગ’ન્તિ? ‘આમાવુસો, સાદિયિસ્સામી’તિ. તતો ચીવરભાગં ગહેત્વા અઞ્ઞં આવાસં અગમાસિં. તત્થપિ ભિક્ખૂ ચીવરં ભાજેતુકામા સન્નિપતિંસુ. તેપિ મં એવમાહંસુ – ‘ઇમાનિ ખો, આવુસો, સઙ્ઘિકાનિ ચીવરાનિ ભાજિયિસ્સન્તિ, સાદિયિસ્સસિ ભાગ’’’ન્તિ? ‘આમાવુસો, સાદિયિસ્સામી’તિ. તતોપિ ચીવરભાગં ગહેત્વા અઞ્ઞં આવાસં અગમાસિં. તત્થપિ ભિક્ખૂ ચીવરં ભાજેતુકામા સન્નિપતિંસુ. તેપિ મં એવમાહંસુ – ‘ઇમાનિ ખો, આવુસો, સઙ્ઘિકાનિ ચીવરાનિ ભાજિયિસ્સન્તિ, સાદિયિસ્સસિ ભાગ’ન્તિ? ‘આમાવુસો, સાદિયિસ્સામી’તિ. તતોપિ ચીવરભાગં અગ્ગહેસિં. એવં મે બહું ચીવરં ઉપ્પન્નન્તિ. ‘‘કિં પન ત્વં, આવુસો ઉપનન્દ, અઞ્ઞત્ર વસ્સંવુટ્ઠો અઞ્ઞત્ર ચીવરભાગં સાદિયી’’તિ? ‘‘એવમાવુસો’’તિ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ આયસ્મા ઉપનન્દો સક્યપુત્તો અઞ્ઞત્ર વસ્સંવુટ્ઠો અઞ્ઞત્ર ચીવરભાગં સાદિયિસ્સતી’’તિ. ભગવતો એતમત્થં આરોચેસું…પે… ‘‘સચ્ચં કિર ત્વં, ઉપનન્દ, અઞ્ઞત્ર વસ્સંવુટ્ઠો અઞ્ઞત્ર ચીવરભાગં સાદિયી’’તિ? ‘‘સચ્ચં ભગવા’’તિ. વિગરહિ બુદ્ધો ભગવા…પે… કથઞ્હિ નામ ત્વં, મોઘપુરિસ, અઞ્ઞત્ર વસ્સંવુટ્ઠો અઞ્ઞત્ર ચીવરભાગં સાદિયિસ્સસિ. નેતં, મોઘપુરિસ, અપ્પસન્નાનં વા પસાદાય…પે… વિગરહિત્વા…પે… ધમ્મિં કથં કત્વા ભિક્ખૂ આમન્તેસિ – ‘‘ન, ભિક્ખવે, અઞ્ઞત્ર વસ્સંવુટ્ઠેન અઞ્ઞત્ર ચીવરભાગો સાદિતબ્બો. યો સાદિયેય્ય, આપત્તિ દુક્કટસ્સા’’તિ.

તેન ખો પન સમયેન આયસ્મા ઉપનન્દો સક્યપુત્તો એકો દ્વીસુ આવાસેસુ વસ્સં વસિ – ‘‘એવં મે બહું ચીવરં ઉપ્પજ્જિસ્સતી’’તિ. અથ ખો તેસં ભિક્ખૂનં એતદહોસિ – ‘‘કથં નુ ખો આયસ્મતો ઉપનન્દસ્સ સક્યપુત્તસ્સ ચીવરપટિવીસો દાતબ્બો’’તિ? ભગવતો એતમત્થં આરોચેસું. દેથ, ભિક્ખવે, મોઘપુરિસસ્સ એકાધિપ્પાયં. ઇધ પન, ભિક્ખવે, ભિક્ખુ એકો દ્વીસુ આવાસેસુ વસ્સં વસતિ – ‘‘એવં મે બહું ચીવરં ઉપ્પજ્જિસ્સતી’’તિ. સચે અમુત્ર ઉપડ્ઢં અમુત્ર ઉપડ્ઢં વસતિ, અમુત્ર ઉપડ્ઢો અમુત્ર ઉપડ્ઢો ચીવરપટિવીસો દાતબ્બો. યત્થ વા પન બહુતરં વસતિ, તતો ચીવરપટિવીસો દાતબ્બોતિ.

ઉપનન્દસક્યપુત્તવત્થુ નિટ્ઠિતં.