૨૨૧. પચ્છિમવિકપ્પનુપગચીવરાદિકથા

૩૫૮. અથ ખો ભિક્ખૂનં એતદહોસિ – ‘‘યાનિ તાનિ ભગવતા અનુઞ્ઞાતાનિ તિચીવરન્તિ વા વસ્સિકસાટિકાતિ વા નિસીદનન્તિ વા પચ્ચત્થરણન્તિ વા કણ્ડુપ્પટિચ્છાદીતિ વા મુખપુઞ્છનચોળન્તિ વા પરિક્ખારચોળન્તિ વા, સબ્બાનિ તાનિ અધિટ્ઠાતબ્બાનિ નુ ખો, ઉદાહુ, વિકપ્પેતબ્બાની’’તિ? ભગવતો એતમત્થં આરોચેસું. અનુજાનામિ, ભિક્ખવે, તિચીવરં અધિટ્ઠાતું ન વિકપ્પેતું; વસ્સિકસાટિકં વસ્સાનં ચાતુમાસં અધિટ્ઠાતું, તતો પરં વિકપ્પેતું; નિસીદનં અધિટ્ઠાતું ન વિકપ્પેતું; પચ્ચત્થરણં અધિટ્ઠાતું ન વિકપ્પેતું; કણ્ડુપ્પટિચ્છાદિં યાવઆબાધા અધિટ્ઠાતું તતો પરં વિકપ્પેતું; મુખપુઞ્છનચોળં અધિટ્ઠાતું ન વિકપ્પેતું; પરિક્ખારચોળં અધિટ્ઠાતું ન વિકપ્પેતુન્તિ.

અથ ખો ભિક્ખૂનં એતદહોસિ – ‘‘કિત્તકં પચ્છિમં નુ ખો ચીવરં વિકપ્પેતબ્બ’’ન્તિ? ભગવતો એતમત્થં આરોચેસું. અનુજાનામિ, ભિક્ખવે, આયામેન અટ્ઠઙ્ગુલં સુગતઙ્ગુલેન ચતુરઙ્ગુલવિત્થતં પચ્છિમં ચીવરં વિકપ્પેતુન્તિ.

૩૫૯. તેન ખો પન સમયેન આયસ્મતો મહાકસ્સપસ્સ પંસુકૂલકતો ગરુકો હોતિ. ભગવતો એતમત્થં આરોચેસું. અનુજાનામિ, ભિક્ખવે, સુત્તલૂખં કાતુન્તિ. વિકણ્ણો હોતિ. ભગવતો એતમત્થં આરોચેસું. અનુજાનામિ, ભિક્ખવે, વિકણ્ણં ઉદ્ધરિતુન્તિ. સુત્તા ઓકિરિયન્તિ. ભગવતો એતમત્થં આરોચેસું. અનુજાનામિ, ભિક્ખવે, અનુવાતં પરિભણ્ડં આરોપેતુન્તિ.

તેન ખો પન સમયેન સઙ્ઘાટિયા પત્તા લુજ્જન્તિ. ભગવતો એતમત્થં આરોચેસું. અનુજાનામિ, ભિક્ખવે, અટ્ઠપદકં કાતુન્તિ.

૩૬૦. તેન ખો પન સમયેન અઞ્ઞતરસ્સ ભિક્ખુનો તિચીવરે કયિરમાને સબ્બં છિન્નકં નપ્પહોતિ. ભગવતો એતમત્થં આરોચેસું. અનુજાનામિ, ભિક્ખવે, દ્વે છિન્નકાનિ એકં અચ્છિન્નકન્તિ.

દ્વે છિન્નકાનિ એકં અચ્છિન્નકં નપ્પહોતિ. ભગવતો એતમત્થં આરોચેસું. અનુજાનામિ, ભિક્ખવે, દ્વે અચ્છિન્નકાનિ એકં છિન્નકન્તિ.

દ્વે અચ્છિન્નકાનિ એકં છિન્નકં નપ્પહોતિ. ભગવતો એતમત્થં આરોચેસું. અનુજાનામિ, ભિક્ખવે, અન્વાધિકમ્પિ આરોપેતું, ન ચ, ભિક્ખવે, સબ્બં અચ્છિન્નકં ધારેતબ્બં. યો ધારેય્ય, આપત્તિ દુક્કટસ્સાતિ.

૩૬૧. તેન ખો પન સમયેન અઞ્ઞતરસ્સ ભિક્ખુનો બહું ચીવરં ઉપ્પન્નં હોતિ. સો ચ તં ચીવરં માતાપિતૂનં દાતુકામો હોતિ. ભગવતો એતમત્થં આરોચેસું. માતાપિતરોતિ [માતાપિતૂનં ખો (સી.)] ખો, ભિક્ખવે, દદમાને [વદમાનો (ક.), વદમાને (?)] કિં વદેય્યામ? અનુજાનામિ, ભિક્ખવે, માતાપિતૂનં દાતું. ન ચ, ભિક્ખવે, સદ્ધાદેય્યં વિનિપાતેતબ્બં. યો વિનિપાતેય્ય, આપત્તિ દુક્કટસ્સાતિ.

૩૬૨. તેન ખો પન સમયેન અઞ્ઞતરો ભિક્ખુ અન્ધવને ચીવરં નિક્ખિપિત્વા સન્તરુત્તરેન ગામં પિણ્ડાય પાવિસિ. ચોરા તં ચીવરં અવહરિંસુ. સો ભિક્ખુ દુચ્ચોળો હોતિ લૂખચીવરો. ભિક્ખૂ એવમાહંસુ – ‘‘કિસ્સ ત્વં, આવુસો, દુચ્ચોળો લૂખચીવરોસી’’તિ? ‘‘ઇધાહં [સો અહં (કત્થચિ)], આવુસો, અન્ધવને ચીવરં નિક્ખિપિત્વા સન્તરુત્તરેન ગામં પિણ્ડાય પાવિસિં. ચોરા તં ચીવરં અવહરિંસુ. તેનાહં દુચ્ચોળો લૂખચીવરો’’તિ. ભગવતો એતમત્થં આરોચેસું. ન, ભિક્ખવે, સન્તરુત્તરેન ગામો પવિસિતબ્બો. યો પવિસેય્ય, આપત્તિ દુક્કટસ્સાતિ.

તેન ખો પન સમયેન આયસ્મા આનન્દો અસ્સતિયા સન્તરુત્તરેન ગામં પિણ્ડાય પાવિસિ. ભિક્ખૂ આયસ્મન્તં આનન્દં એતદવોચું – ‘‘નનુ, આવુસો આનન્દ, ભગવતા પઞ્ઞત્તં – ‘ન સન્તરુત્તરેન ગામો પવિસિતબ્બો’તિ? કિસ્સ ત્વં, આવુસો આનન્દ, સન્તરુત્તરેન ગામં પવિટ્ઠો’’તિ? ‘‘સચ્ચં, આવુસો, ભગવતા પઞ્ઞત્તં – ‘ન સન્તરુત્તરેન ગામો પવિસિતબ્બો’તિ. અપિ ચાહં અસ્સતિયા પવિટ્ઠો’’તિ. ભગવતો એતમત્થં આરોચેસું.

પઞ્ચિમે, ભિક્ખવે, પચ્ચયા સઙ્ઘાટિયા નિક્ખેપાય – ગિલાનો વા હોતિ, વસ્સિકસઙ્કેતં વા હોતિ, નદીપારં ગન્તું વા હોતિ, અગ્ગળગુત્તિવિહારો વા હોતિ, અત્થતકથિનં વા હોતિ. ઇમે ખો, ભિક્ખવે, પઞ્ચ પચ્ચયા સઙ્ઘાટિયા નિક્ખેપાય.

પઞ્ચિમે, ભિક્ખવે, પચ્ચયા ઉત્તરાસઙ્ગસ્સ નિક્ખેપાય…પે… અન્તરવાસકસ્સ નિક્ખેપાય – ગિલાનો વા હોતિ, વસ્સિકસઙ્કેતં વા હોતિ, નદીપારં ગન્તું વા હોતિ, અગ્ગળગુત્તિવિહારો વા હોતિ, અત્થતકથિનં વા હોતિ. ઇમે ખો, ભિક્ખવે, પઞ્ચ પચ્ચયા ઉત્તરાસઙ્ગસ્સ અન્તરવાસકસ્સ નિક્ખેપાય.

પઞ્ચિમે, ભિક્ખવે, પચ્ચયા વસ્સિકસાટિકાય નિક્ખેપાય – ગિલાનો વા હોતિ, નિસ્સીમં ગન્તું વા હોતિ, નદીપારં ગન્તું વા હોતિ, અગ્ગળગુત્તિવિહારો વા હોતિ, વસ્સિકસાટિકા અકતા વા હોતિ વિપ્પકતા વા. ઇમે ખો, ભિક્ખવે, પઞ્ચ પચ્ચયા વસ્સિકસાટિકાય નિક્ખેપાયાતિ.

પચ્છિમવિકપ્પનુપગચીવરાદિકથા નિટ્ઠિતા.