૨૧૫. ચીવરરજનકથા

૩૪૪. તેન ખો પન સમયેન ભિક્ખૂ છકણેનપિ પણ્ડુમત્તિકાયપિ ચીવરં રજન્તિ. ચીવરં દુબ્બણ્ણં હોતિ. ભગવતો એતમત્થં આરોચેસું. અનુજાનામિ, ભિક્ખવે, છ રજનાનિ – મૂલરજનં, ખન્ધરજનં, તચરજનં, પત્તરજનં, પુપ્ફરજનં, ફલરજનન્તિ.

તેન ખો પન સમયેન ભિક્ખૂ સીતુદકાય [સીતુન્દિકાય (સી.), સીતૂદકાય (સ્યા.)] ચીવરં રજન્તિ. ચીવરં દુગ્ગન્ધં હોતિ. ભગવતો એતમત્થં આરોચેસું. અનુજાનામિ, ભિક્ખવે, રજનં પચિતું ચુલ્લં રજનકુમ્ભિન્તિ. રજનં ઉત્તરિયતિ. ભગવતો એતમત્થં આરોચેસું. અનુજાનામિ, ભિક્ખવે, ઉત્તરાળુમ્પં [ઉત્તરાળુપં (યોજના), ઉત્તરાળુપં (સ્યા.)] બન્ધિતુન્તિ.

તેન ખો પન સમયેન ભિક્ખૂ ન જાનન્તિ રજનં પક્કં વા અપક્કં વા. ભગવતો એતમત્થં આરોચેસું. અનુજાનામિ, ભિક્ખવે, ઉદકે વા નખપિટ્ઠિકાય વા થેવકં દાતુન્તિ.

તેન ખો પન સમયેન ભિક્ખૂ રજનં ઓરોપેન્તા કુમ્ભિં આવિઞ્છન્તિ [આવિઞ્જન્તિ (સી.), આવટ્ટન્તિ (સ્યા.)]. કુમ્ભી ભિજ્જતિ. ભગવતો એતમત્થં આરોચેસું. અનુજાનામિ, ભિક્ખવે, રજનુળુઙ્કં [રજનાળુઙ્કં (યોજના)] દણ્ડકથાલકન્તિ.

તેન ખો પન સમયેન ભિક્ખૂનં રજનભાજનં ન સંવિજ્જતિ. ભગવતો એતમત્થં આરોચેસું. અનુજાનામિ, ભિક્ખવે, રજનકોલમ્બં રજનઘટન્તિ.

તેન ખો પન સમયેન ભિક્ખૂ પાતિયાપિ પત્તેપિ ચીવરં ઓમદ્દન્તિ. ચીવરં પરિભિજ્જતિ. ભગવતો એતમત્થં આરોચેસું. અનુજાનામિ, ભિક્ખવે, રજનદોણિકન્તિ.

તેન ખો પન સમયેન ભિક્ખૂ છમાય ચીવરં પત્થરન્તિ. ચીવરં પંસુકિતં હોતિ. ભગવતો એતમત્થં આરોચેસું. અનુજાનામિ, ભિક્ખવે, તિણસન્થારકન્તિ.

તિણસન્થારકો ઉપચિકાહિ ખજ્જતિ. ભગવતો એતમત્થં આરોચેસું. અનુજાનામિ, ભિક્ખવે, ચીવરવંસં ચીવરરજ્જુન્તિ.

મજ્ઝેન લગ્ગેન્તિ. રજનં ઉભતો ગલતિ. ભગવતો એતમત્થં આરોચેસું. અનુજાનામિ, ભિક્ખવે, કણ્ણે બન્ધિતુન્તિ.

કણ્ણો જીરતિ. ભગવતો એતમત્થં આરોચેસું. અનુજાનામિ, ભિક્ખવે, કણ્ણસુત્તકન્તિ.

રજનં એકતો ગલતિ. ભગવતો એતમત્થં આરોચેસું. અનુજાનામિ, ભિક્ખવે, સમ્પરિવત્તકં સમ્પરિવત્તકં રજેતું, ન ચ અચ્છિન્ને થેવે પક્કમિતુન્તિ.

તેન ખો પન સમયેન ચીવરં પત્થિન્નં હોતિ. ભગવતો એતમત્થં આરોચેસું. અનુજાનામિ, ભિક્ખવે, ઉદકે ઓસારેતુન્તિ.

તેન ખો પન સમયેન ચીવરં ફરુસં હોતિ. ભગવતો એતમત્થં આરોચેસું. અનુજાનામિ, ભિક્ખવે, પાણિના આકોટેતુન્તિ.

તેન ખો પન સમયેન ભિક્ખૂ અચ્છિન્નકાનિ ચીવરાનિ ધારેન્તિ દન્તકાસાવાનિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – સેય્યથાપિ નામ [સેય્યથાપિ (?)] ગિહી કામભોગિનોતિ. ભગવતો એતમત્થં આરોચેસું. ન, ભિક્ખવે, અચ્છિન્નકાનિ ચીવરાનિ ધારેતબ્બાનિ. યો ધારેય્ય, આપત્તિ દુક્કટસ્સાતિ.

ચીવરરજનકથા નિટ્ઠિતા.