૨૧૦. વરયાચનાકથા

૩૩૭. અથ ખો ભગવતો કાયો નચિરસ્સેવ પકતત્તો અહોસિ. અથ ખો જીવકો કોમારભચ્ચો તં સિવેય્યકં દુસ્સયુગં આદાય યેન ભગવા તેનુપસઙ્કમિ, ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો જીવકો કોમારભચ્ચો ભગવન્તં એતદવોચ – ‘‘એકાહં, ભન્તે, ભગવન્તં વરં યાચામી’’તિ. ‘‘અતિક્કન્તવરા ખો, જીવક, તથાગતા’’તિ. ‘‘યઞ્ચ, ભન્તે, કપ્પતિ યઞ્ચ અનવજ્જ’’ન્તિ. ‘‘વદેહિ, જીવકા’’તિ. ‘‘ભગવા, ભન્તે, પંસુકૂલિકો, ભિક્ખુસઙ્ઘો ચ. ઇદં મે, ભન્તે, સિવેય્યકં દુસ્સયુગં રઞ્ઞા પજ્જોતેન પહિતં – બહૂનં દુસ્સાનં બહૂનં દુસ્સયુગાનં બહૂનં દુસ્સયુગસતાનં બહૂનં દુસ્સયુગસહસ્સાનં બહૂનં દુસ્સયુગસતસહસ્સાનં અગ્ગઞ્ચ સેટ્ઠઞ્ચ મોક્ખઞ્ચ ઉત્તમઞ્ચ પવરઞ્ચ. પટિગ્ગણ્હાતુ મે, ભન્તે, ભગવા સિવેય્યકં દુસ્સયુગં; ભિક્ખુસઙ્ઘસ્સ ચ ગહપતિચીવરં અનુજાનાતૂ’’તિ. પટિગ્ગહેસિ ભગવા સિવેય્યકં દુસ્સયુગં. અથ ખો ભગવા જીવકં કોમારભચ્ચં ધમ્મિયા કથાય સન્દસ્સેસિ સમાદપેસિ સમુત્તેજેસિ સમ્પહંસેસિ. અથ ખો જીવકો કોમારભચ્ચો ભગવતા ધમ્મિયા કથાય સન્દસ્સિતો સમાદપિતો સમુત્તેજિતો સમ્પહંસિતો ઉટ્ઠાયાસના ભગવન્તં અભિવાદેત્વા પદક્ખિણં કત્વા પક્કામિ. અથ ખો ભગવા એતસ્મિં નિદાને એતસ્મિં પકરણે ધમ્મિં કથં કત્વા ભિક્ખૂ આમન્તેસિ – ‘‘અનુજાનામિ, ભિક્ખવે, ગહપતિચીવરં. યો ઇચ્છતિ, પંસુકૂલિકો હોતુ. યો ઇચ્છતિ, ગહપતિચીવરં સાદિયતુ. ઇતરીતરેનપાહં [પહં (સી.), ચાહં (સ્યા.)], ભિક્ખવે, સન્તુટ્ઠિં વણ્ણેમી’’તિ.

અસ્સોસું ખો રાજગહે મનુસ્સા – ‘‘ભગવતા કિર ભિક્ખૂનં ગહપતિચીવરં અનુઞ્ઞાત’’ન્તિ. તે ચ મનુસ્સા હટ્ઠા અહેસું ઉદગ્ગા ‘‘ઇદાનિ ખો મયં દાનાનિ દસ્સામ પુઞ્ઞાનિ કરિસ્સામ, યતો ભગવતા ભિક્ખૂનં ગહપતિચીવરં અનુઞ્ઞાત’’ન્તિ. એકાહેનેવ રાજગહે બહૂનિ ચીવરસહસ્સાનિ ઉપ્પજ્જિંસુ.

અસ્સોસું ખો જાનપદા મનુસ્સા – ‘‘ભગવતા કિર ભિક્ખૂનં ગહપતિચીવરં અનુઞ્ઞાત’’ન્તિ. તે ચ મનુસ્સા હટ્ઠા અહેસું ઉદગ્ગા – ‘‘ઇદાનિ ખો મયં દાનાનિ દસ્સામ પુઞ્ઞાનિ કરિસ્સામ, યતો ભગવતા ભિક્ખૂનં ગહપતિચીવરં અનુઞ્ઞાત’’ન્તિ. જનપદેપિ એકાહેનેવ બહૂનિ ચીવરસહસ્સાનિ ઉપ્પજ્જિંસુ.

તેન ખો પન સમયેન સઙ્ઘસ્સ પાવારો ઉપ્પન્નો હોતિ. ભગવતો એતમત્થં આરોચેસું. અનુજાનામિ, ભિક્ખવે, પાવારન્તિ.

કોસેય્યપાવારો ઉપ્પન્નો હોતિ. ભગવતો એતમત્થં આરોચેસું. અનુજાનામિ, ભિક્ખવે, કોસેય્યપાવારન્તિ.

કોજવં ઉપ્પન્નં હોતિ. ભગવતો એતમત્થં આરોચેસું. અનુજાનામિ, ભિક્ખવે, કોજવન્તિ.

વરયાચનાકથા નિટ્ઠિતા.

પઠમભાણવારો નિટ્ઠિતો.