૧૮૫. ચતુમહાપદેસકથા

૩૦૫. તેન ખો પન સમયેન ભિક્ખૂનં કિસ્મિઞ્ચિ કિસ્મિઞ્ચિ ઠાને કુક્કુચ્ચં ઉપ્પજ્જતિ – ‘‘કિં નુ ખો ભગવતા અનુઞ્ઞાતં, કિં અનનુઞ્ઞાત’’ન્તિ? ભગવતો એતમત્થં આરોચેસું. ‘‘યં, ભિક્ખવે, મયા ‘ઇદં ન કપ્પતી’તિ અપ્પટિક્ખિત્તં તઞ્ચે અકપ્પિયં અનુલોમેતિ, કપ્પિયં પટિબાહતિ, તં વો ન કપ્પતિ. યં, ભિક્ખવે, મયા ‘ઇદં ન કપ્પતી’તિ અપ્પટિક્ખિત્તં તઞ્ચે કપ્પિયં અનુલોમેતિ, અકપ્પિયં પટિબાહતિ, તં વો કપ્પતિ. યં, ભિક્ખવે, મયા ‘ઇદં કપ્પતી’તિ અનનુઞ્ઞાતં તઞ્ચે અકપ્પિયં અનુલોમેતિ, કપ્પિયં પટિબાહતિ, તં વો ન કપ્પતિ. યં, ભિક્ખવે, મયા ‘ઇદં કપ્પતી’તિ અનનુઞ્ઞાતં, તઞ્ચે કપ્પિયં અનુલોમેતિ, અકપ્પિયં પટિબાહતિ, તં વો કપ્પતી’’તિ.

અથ ખો ભિક્ખૂનં એતદહોસિ – ‘‘કપ્પતિ નુ ખો યાવકાલિકેન યામકાલિકં, ન નુ ખો કપ્પતિ? કપ્પતિ નુ ખો યાવકાલિકેન સત્તાહકાલિકં, ન નુ ખો કપ્પતિ? કપ્પતિ નુ ખો યાવકાલિકેન યાવજીવિકં, ન નુ ખો કપ્પતિ? કપ્પતિ નુ ખો યામકાલિકેન સત્તાહકાલિકં, ન નુ ખો કપ્પતિ? કપ્પતિ નુ ખો યામકાલિકેન યાવજીવિકં, ન નુ ખો કપ્પતિ? કપ્પતિ નુ ખો સત્તાહકાલિકેન યાવજીવિકં, ન નુ ખો કપ્પતી’’તિ? ભગવતો એતમત્થં આરોચેસું. ‘‘યાવકાલિકેન, ભિક્ખવે, યામકાલિકં, તદહુ પટિગ્ગહિતં કાલે કપ્પતિ, વિકાલે ન કપ્પતિ. યાવકાલિકેન, ભિક્ખવે, સત્તાહકાલિકં, તદહુ પટિગ્ગહિતં કાલે કપ્પતિ, વિકાલે ન કપ્પતિ. યાવકાલિકેન, ભિક્ખવે, યાવજીવિકં, તદહુ પટિગ્ગહિતં કાલે કપ્પતિ, વિકાલે ન કપ્પતિ. યામકાલિકેન, ભિક્ખવે, સત્તાહકાલિકં, તદહુ પટિગ્ગહિતં યામે કપ્પતિ, યામાતિક્કન્તે ન કપ્પતિ. યામકાલિકેન, ભિક્ખવે, યાવજીવિકં, તદહુ પટિગ્ગહિતં યામે કપ્પતિ, યામાતિક્કન્તે ન કપ્પતિ. સત્તાહકાલિકેન, ભિક્ખવે, યાવજીવિકં પટિગ્ગહિતં, સત્તાહં કપ્પતિ, સત્તાહાતિક્કન્તે ન કપ્પતી’’તિ.

ચતુમહાપદેસકથા નિટ્ઠિતા.

ભેસજ્જક્ખન્ધકો છટ્ઠો.