૧૫૩. યાનાદિપટિક્ખેપો

૨૫૩. તેન ખો પન સમયેન છબ્બગ્ગિયા ભિક્ખૂ યાનેન યાયન્તિ, ઇત્થિયુત્તેનપિ પુરિસન્તરેન, પુરિસયુત્તેનપિ ઇત્થન્તરેન. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘સેય્યથાપિ ગઙ્ગામહિયાયા’’તિ. ભગવતો એતમત્થં આરોચેસું. ન, ભિક્ખવે, યાનેન યાયિતબ્બં. યો યાયેય્ય, આપત્તિ દુક્કટસ્સાતિ. તેન ખો પન સમયેન અઞ્ઞતરો ભિક્ખુ કોસલેસુ જનપદે સાવત્થિં ગચ્છન્તો ભગવન્તં દસ્સનાય અન્તરામગ્ગે ગિલાનો હોતિ. અથ ખો સો ભિક્ખુ મગ્ગા ઓક્કમ્મ અઞ્ઞતરસ્મિં રુક્ખમૂલે નિસીદિ. મનુસ્સા તં ભિક્ખું દિસ્વા એતદવોચું – ‘‘કહં, ભન્તે, અય્યો ગમિસ્સતી’’તિ? ‘‘સાવત્થિં ખો અહં, આવુસો, ગમિસ્સામિ ભગવન્તં દસ્સનાયા’’તિ. ‘‘એહિ, ભન્તે, ગમિસ્સામા’’તિ. ‘‘નાહં, આવુસો, સક્કોમિ, ગિલાનોમ્હી’’તિ. ‘‘એહિ, ભન્તે, યાનં અભિરુહા’’તિ. ‘‘અલં, આવુસો, પટિક્ખિત્તં ભગવતા યાન’’ન્તિ કુક્કુચ્ચાયન્તો યાનં નાભિરુહિ. અથ ખો સો ભિક્ખુ સાવત્થિં ગન્ત્વા ભિક્ખૂનં એતમત્થં આરોચેસિ. ભિક્ખૂ ભગવતો એતમત્થં આરોચેસું. અનુજાનામિ, ભિક્ખવે, ગિલાનસ્સ યાનન્તિ. અથ ખો ભિક્ખૂનં એતદહોસિ – ‘‘ઇત્થિયુત્તં નુ ખો પુરિસયુત્તં નુ ખો’’તિ? ભગવતો એતમત્થં આરોચેસું. અનુજાનામિ, ભિક્ખવે, પુરિસયુત્તં હત્થવટ્ટકન્તિ.

તેન ખો પન સમયેન અઞ્ઞતરસ્સ ભિક્ખુનો યાનુગ્ઘાતેન બાળ્હતરં અફાસુ અહોસિ. ભગવતો એતમત્થં આરોચેસું. અનુજાનામિ, ભિક્ખવે, સિવિકં પાટઙ્કિન્તિ.

યાનાદિપટિક્ખેપો નિટ્ઠિતો.