૧૫૦. ઓમુક્કગુણઙ્ગુણૂપાહનાનુજાનના

૨૪૭. અથ ખો ભગવા પુબ્બણ્હસમયં નિવાસેત્વા પત્તચીવરમાદાય રાજગહં પિણ્ડાય પાવિસિ, અઞ્ઞતરેન ભિક્ખુના પચ્છાસમણેન. અથ ખો સો ભિક્ખુ ખઞ્જમાનો ભગવન્તં પિટ્ઠિતો પિટ્ઠિતો અનુબન્ધિ. અદ્દસા ખો અઞ્ઞતરો ઉપાસકો ગુણઙ્ગુણૂપાહના આરોહિત્વા ભગવન્તં દૂરતોવ આગચ્છન્તં; દિસ્વા ઉપાહના આરોહિત્વા યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા યેન સો ભિક્ખુ તેનુપસઙ્કમિ; ઉપસઙ્કમિત્વા તં ભિક્ખું અભિવાદેત્વા એતદવોચ – ‘‘કિસ્સ, ભન્તે, અય્યો ખઞ્જતી’’તિ? ‘‘પાદા મે, આવુસો, ફલિતા’’તિ [ફાલિતાતિ (ક.)]. ‘‘હન્દ, ભન્તે, ઉપાહનાયો’’તિ. ‘‘અલં, આવુસો, પટિક્ખિત્તા ભગવતા ગુણઙ્ગુણૂપાહના’’તિ. ‘‘ગણ્હાહેતા, ભિક્ખુ, ઉપાહનાયો’’તિ. અથ ખો ભગવા એતસ્મિં નિદાને એતસ્મિં પકરણે ધમ્મિં કથં કત્વા ભિક્ખૂ આમન્તેસિ – ‘‘અનુજાનામિ, ભિક્ખવે, ઓમુક્કં ગુણઙ્ગુણૂપાહનં. ન, ભિક્ખવે, નવા ગુણઙ્ગુણૂપાહના ધારેતબ્બા. યો ધારેય્ય, આપત્તિ દુક્કટસ્સા’’તિ.

ઓમુક્કગુણઙ્ગુણૂપાહનાનુજાનના નિટ્ઠિતા.