૧૪૬. તસ્સુદ્દાનં

વસ્સંવુટ્ઠા કોસલેસુ, અગમું સત્થુ દસ્સનં;

અફાસું પસુસંવાસં, અઞ્ઞમઞ્ઞાનુલોમતા.

પવારેન્તા પણામઞ્ચ [પવારેન્તાસને દ્વે ચ (સી. સ્યા.)], કમ્મં ગિલાનઞાતકા;

રાજા ચોરા ચ ધુત્તા ચ, ભિક્ખુપચ્ચત્થિકા તથા.

પઞ્ચ ચતુતયો દ્વેકો, આપન્નો વેમતી સરિ;

સબ્બો સઙ્ઘો વેમતિકો, બહૂ સમા ચ થોકિકા.

આવાસિકા ચાતુદ્દસ, લિઙ્ગસંવાસકા ઉભો;

ગન્તબ્બં ન નિસિન્નાય, છન્દદાને પવારણા [છન્દદાનપવારણા (ક.)].

સવરેહિ ખેપિતા મેઘો, અન્તરા ચ પવારણા;

ન ઇચ્છન્તિ પુરમ્હાકં, અટ્ઠપિતા ચ ભિક્ખુનો.

કિમ્હિ વાતિ કતમઞ્ચ, દિટ્ઠેન સુતસઙ્કાય;

ચોદકો ચુદિતકો ચ, થુલ્લચ્ચયં વત્થુ ભણ્ડનં;

પવારણાસઙ્ગહો ચ, અનિસ્સરો પવારયેતિ.

ઇમમ્હિ ખન્ધકે વત્થૂનિ છચત્તારીસાતિ.

પવારણાક્ખન્ધકો નિટ્ઠિતો.