૧૪૩. વત્થુઠપનાદિ

૨૩૯. ઇધ પન, ભિક્ખવે, ભિક્ખુ તદહુ પવારણાય સઙ્ઘમજ્ઝે ઉદાહરેય્ય – ‘‘સુણાતુ મે, ભન્તે, સઙ્ઘો. ઇદં વત્થુ પઞ્ઞાયતિ, ન પુગ્ગલો. યદિ સઙ્ઘસ્સ પત્તકલ્લં, વત્થું ઠપેત્વા સઙ્ઘો પવારેય્યા’’તિ. સો એવમસ્સ વચનીયો – ‘‘ભગવતા ખો, આવુસો, વિસુદ્ધાનં પવારણા પઞ્ઞત્તા. સચે વત્થુ પઞ્ઞાયતિ, ન પુગ્ગલો, ઇદાનેવ નં વદેહી’’તિ.

ઇધ પન, ભિક્ખવે, ભિક્ખુ તદહુ પવારણાય સઙ્ઘમજ્ઝે ઉદાહરેય્ય – ‘‘સુણાતુ મે, ભન્તે, સઙ્ઘો. અયં પુગ્ગલો પઞ્ઞાયતિ, ન વત્થુ. યદિ સઙ્ઘસ્સ પત્તકલ્લં, પુગ્ગલં ઠપેત્વા સઙ્ઘો પવારેય્યા’’તિ. સો એવમસ્સ વચનીયો – ‘‘ભગવતા ખો, આવુસો, સમગ્ગાનં પવારણા પઞ્ઞત્તા. સચે પુગ્ગલો પઞ્ઞાયતિ, ન વત્થુ, ઇદાનેવ નં વદેહી’’તિ.

ઇધ પન, ભિક્ખવે, ભિક્ખુ તદહુ પવારણાય સઙ્ઘમજ્ઝે ઉદાહરેય્ય – ‘‘સુણાતુ મે, ભન્તે, સઙ્ઘો. ઇદં વત્થુ ચ પુગ્ગલો ચ પઞ્ઞાયતિ. યદિ સઙ્ઘસ્સ પત્તકલ્લં, વત્થુઞ્ચ પુગ્ગલઞ્ચ ઠપેત્વા સઙ્ઘો પવારેય્યા’’તિ. સો એવમસ્સ વચનીયો – ‘‘ભગવતા ખો, આવુસો, વિસુદ્ધાનઞ્ચ સમગ્ગાનઞ્ચ પવારણા પઞ્ઞત્તા. સચે વત્થુ ચ પુગ્ગલો ચ પઞ્ઞાયતિ, ઇદાનેવ નં વદેહી’’તિ.

પુબ્બે ચે, ભિક્ખવે, પવારણાય વત્થુ પઞ્ઞાયતિ, પચ્છા પુગ્ગલો, કલ્લં વચનાય. પુબ્બે ચે, ભિક્ખવે, પવારણાય પુગ્ગલો પઞ્ઞાયતિ, પચ્છા વત્થુ, કલ્લં વચનાય. પુબ્બે ચે, ભિક્ખવે, પવારણાય વત્થુ ચ પુગ્ગલો ચ પઞ્ઞાયતિ, તં ચે કતાય પવારણાય ઉક્કોટેતિ, ઉક્કોટનકં પાચિત્તિયન્તિ.

વત્થુઠપનાદિ નિટ્ઠિતા.