૧૧૭. અધમ્મિકકતિકા

૨૦૫. તેન ખો પન સમયેન સાવત્થિયા સઙ્ઘેન એવરૂપા કતિકા કતા હોતિ – અન્તરાવસ્સં ન પબ્બાજેતબ્બન્તિ. વિસાખાય મિગારમાતુયા નત્તા ભિક્ખૂ ઉપસઙ્કમિત્વા પબ્બજ્જં યાચિ. ભિક્ખૂ એવમાહંસુ – ‘‘સઙ્ઘેન ખો, આવુસો, એવરૂપા કતિકા કતા ‘અન્તરાવસ્સં ન પબ્બાજેતબ્બ’ન્તિ. આગમેહિ, આવુસો, યાવ ભિક્ખૂ વસ્સં વસન્તિ. વસ્સંવુટ્ઠા પબ્બાજેસ્સન્તી’’તિ. અથ ખો તે ભિક્ખૂ વસ્સંવુટ્ઠા વિસાખાય મિગારમાતુયા નત્તારં એતદવોચું – ‘‘એહિ, દાનિ, આવુસો, પબ્બજાહી’’તિ. સો એવમાહ – ‘‘સચાહં, ભન્તે, પબ્બજિતો અસ્સં, અભિરમેય્યામહં [અભિરમેય્યં ચાહં (સી.)]. ન દાનાહં, ભન્તે, પબ્બજિસ્સામી’’તિ. વિસાખા મિગારમાતા ઉજ્ઝાયતિ ખિય્યતિ વિપાચેતિ – ‘‘કથઞ્હિ નામ અય્યા એવરૂપં કતિકં કરિસ્સન્તિ ‘ન અન્તરાવસ્સં પબ્બાજેતબ્બ’ન્તિ. કં કાલં ધમ્મો ન ચરિતબ્બો’’તિ? અસ્સોસું ખો ભિક્ખૂ વિસાખાય મિગારમાતુયા ઉજ્ઝાયન્તિયા ખિય્યન્તિયા વિપાચેન્તિયા. અથ ખો તે ભિક્ખૂ ભગવતો એતમત્થં આરોચેસું. ન, ભિક્ખવે, એવરૂપા કતિકા કાતબ્બા – ‘ન અન્તરાવસ્સં પબ્બાજેતબ્બ’ન્તિ. યો કરેય્ય, આપત્તિ દુક્કટસ્સાતિ.

અધમ્મિકકતિકા નિટ્ઠિતા.