૧૧૮. પટિસ્સવદુક્કટાપત્તિ

૨૦૬. તેન ખો પન સમયેન આયસ્મતા ઉપનન્દેન સક્યપુત્તેન રઞ્ઞો પસેનદિસ્સ કોસલસ્સ વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો અદ્દસ અન્તરામગ્ગે દ્વે આવાસે બહુચીવરકે. તસ્સ એતદહોસિ – ‘‘યંનૂનાહં ઇમેસુ દ્વીસુ આવાસેસુ વસ્સં વસેય્યં. એવં મે બહું ચીવરં [બહુચીવરં (ક.)] ઉપ્પજ્જિસ્સતી’’તિ. સો તેસુ દ્વીસુ આવાસેસુ વસ્સં વસિ. રાજા પસેનદિ કોસલો ઉજ્ઝાયતિ ખિય્યતિ વિપાચેતિ – ‘‘કથઞ્હિ નામ અય્યો ઉપનન્દો સક્યપુત્તો અમ્હાકં વસ્સાવાસં પટિસ્સુણિત્વા વિસંવાદેસ્સતિ. નનુ ભગવતા અનેકપરિયાયેન મુસાવાદો ગરહિતો, મુસાવાદા વેરમણી પસત્થા’’તિ. અસ્સોસું ખો ભિક્ખૂ રઞ્ઞો પસેનદિસ્સ કોસલસ્સ ઉજ્ઝાયન્તસ્સ ખિય્યન્તસ્સ વિપાચેન્તસ્સ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ આયસ્મા ઉપનન્દો સક્યપુત્તો રઞ્ઞો પસેનદિસ્સ કોસલસ્સ વસ્સાવાસં પટિસ્સુણિત્વા વિસંવાદેસ્સતિ. નનુ ભગવતા અનેકપરિયાયેન મુસાવાદો ગરહિતો, મુસાવાદા વેરમણી પસત્થા’’તિ. અથ ખો તે ભિક્ખૂ ભગવતો એતમત્થં આરોચેસું…પે… અથ ખો ભગવા એતસ્મિં નિદાને એતસ્મિં પકરણે ભિક્ખુસઙ્ઘં સન્નિપાતાપેત્વા આયસ્મન્તં ઉપનન્દં સક્યપુત્તં પટિપુચ્છિ – ‘‘સચ્ચં કિર ત્વં, ઉપનન્દ, રઞ્ઞો પસેનદિસ્સ કોસલસ્સ વસ્સાવાસં પટિસ્સુણિત્વા વિસંવાદેસી’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ ત્વં, મોઘપુરિસ, રઞ્ઞો પસેનદિસ્સ કોસલસ્સ વસ્સાવાસં પટિસ્સુણિત્વા વિસંવાદેસ્સસિ. નનુ મયા, મોઘપુરિસ, અનેકપરિયાયેન મુસાવાદો ગરહિતો, મુસાવાદા વેરમણી પસત્થા. નેતં, મોઘપુરિસ, અપ્પસન્નાનં વા પસાદાય…પે… વિગરહિત્વા…પે… ધમ્મિં કથં કત્વા ભિક્ખૂ આમન્તેસિ –

૨૦૭. ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો પસ્સતિ અન્તરામગ્ગે દ્વે આવાસે બહુચીવરકે. તસ્સ એવં હોતિ – ‘‘યંનૂનાહં ઇમેસુ દ્વીસુ આવાસેસુ વસ્સં વસેય્યં. એવં મે બહું ચીવરં ઉપ્પજ્જિસ્સતી’’તિ. સો તેસુ દ્વીસુ આવાસેસુ વસ્સં વસતિ. તસ્સ, ભિક્ખવે, ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે [પાટિપદેન (ક.)] વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો તદહેવ અકરણીયો પક્કમતિ. તસ્સ, ભિક્ખવે, ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો તદહેવ સકરણીયો પક્કમતિ. તસ્સ, ભિક્ખવે, ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા અકરણીયો પક્કમતિ. તસ્સ, ભિક્ખવે, ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા સકરણીયો પક્કમતિ. તસ્સ, ભિક્ખવે, ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં બહિદ્ધા વીતિનામેતિ. તસ્સ, ભિક્ખવે, ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં અન્તો સન્નિવત્તં કરોતિ. તસ્સ, ભિક્ખવે, ભિક્ખુનો પુરિમિકા ચ પઞ્ઞાયતિ, પટિસ્સવે ચ અનાપત્તિ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો સત્તાહં અનાગતાય પવારણાય સકરણીયો પક્કમતિ. આગચ્છેય્ય વા સો, ભિક્ખવે, ભિક્ખુ તં આવાસં ન વા આગચ્છેય્ય, તસ્સ, ભિક્ખવે, ભિક્ખુનો પુરિમિકા ચ પઞ્ઞાયતિ, પટિસ્સવે ચ અનાપત્તિ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પુરિમિકાય. સો તં આવાસં ગન્ત્વા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો તદહેવ સકરણીયો પક્કમતિ…પે… સો દ્વીહતીહં વસિત્વા અકરણીયો પક્કમતિ…પે… સો દ્વીહતીહં વસિત્વા સકરણીયો પક્કમતિ…પે… સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં બહિદ્ધા વીતિનામેતિ. તસ્સ, ભિક્ખવે, ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ…પે… સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં અન્તો સન્નિવત્તં કરોતિ. તસ્સ, ભિક્ખવે, ભિક્ખુનો પુરિમિકા ચ પઞ્ઞાયતિ, પટિસ્સવે ચ અનાપત્તિ…પે… સો સત્તાહં અનાગતાય પવારણાય સકરણીયો પક્કમતિ. આગચ્છેય્ય વા સો, ભિક્ખવે, ભિક્ખુ તં આવાસં ન વા આગચ્છેય્ય, તસ્સ, ભિક્ખવે, ભિક્ખુનો પુરિમિકા ચ પઞ્ઞાયતિ, પટિસ્સવે ચ અનાપત્તિ.

૨૦૮. ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો તદહેવ અકરણીયો પક્કમતિ. તસ્સ, ભિક્ખવે, ભિક્ખુનો પચ્છિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો તદહેવ સકરણીયો પક્કમતિ. તસ્સ, ભિક્ખવે, ભિક્ખુનો પચ્છિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા અકરણીયો પક્કમતિ. તસ્સ, ભિક્ખવે, ભિક્ખુનો પચ્છિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા સકરણીયો પક્કમતિ. તસ્સ, ભિક્ખવે, ભિક્ખુનો પચ્છિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં બહિદ્ધા વીતિનામેતિ. તસ્સ, ભિક્ખવે, ભિક્ખુનો પચ્છિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં અન્તો સન્નિવત્તં કરોતિ. તસ્સ, ભિક્ખવે, ભિક્ખુનો પચ્છિમિકા ચ પઞ્ઞાયતિ, પટિસ્સવે ચ અનાપત્તિ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગચ્છન્તો બહિદ્ધા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો સત્તાહં અનાગતાય કોમુદિયા ચાતુમાસિનિયા સકરણીયો પક્કમતિ. આગચ્છેય્ય વા સો, ભિક્ખવે, ભિક્ખુ તં આવાસં ન વા આગચ્છેય્ય, તસ્સ, ભિક્ખવે, ભિક્ખુનો પચ્છિમિકા ચ પઞ્ઞાયતિ, પટિસ્સવે ચ અનાપત્તિ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગન્ત્વા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો તદહેવ સકરણીયો પક્કમતિ…પે… સો દ્વીહતીહં વસિત્વા અકરણીયો પક્કમતિ …પે… સો દ્વીહતીહં વસિત્વા સકરણીયો પક્કમતિ…પે… સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં બહિદ્ધા વીતિનામેતિ. તસ્સ, ભિક્ખવે, ભિક્ખુનો પચ્છિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સ…પે… સો દ્વીહતીહં વસિત્વા સત્તાહકરણીયેન પક્કમતિ. સો તં સત્તાહં અન્તો સન્નિવત્તં કરોતિ. તસ્સ ભિક્ખવે, ભિક્ખુનો પચ્છિમિકા ચ પઞ્ઞાયતિ, પટિસ્સવે ચ અનાપત્તિ.

ઇધ પન, ભિક્ખવે, ભિક્ખુના વસ્સાવાસો પટિસ્સુતો હોતિ પચ્છિમિકાય. સો તં આવાસં ગન્ત્વા ઉપોસથં કરોતિ, પાટિપદે વિહારં ઉપેતિ, સેનાસનં પઞ્ઞપેતિ, પાનીયં પરિભોજનીયં ઉપટ્ઠાપેતિ, પરિવેણં સમ્મજ્જતિ. સો સત્તાહં અનાગતાય કોમુદિયા ચાતુમાસિનિયા સકરણીયો પક્કમતિ. આગચ્છેય્ય વા સો, ભિક્ખવે, ભિક્ખુ તં આવાસં ન વા આગચ્છેય્ય, તસ્સ, ભિક્ખવે, ભિક્ખુનો પચ્છિમિકા ચ પઞ્ઞાયતિ, પટિસ્સવે ચ અનાપત્તીતિ.

પટિસ્સવદુક્કટાપત્તિ નિટ્ઠિતા.

વસ્સૂપનાયિકક્ખન્ધકો તતિયો.