૧૧૨. પહિતેયેવ અનુજાનના

૧૯૯. ઇધ પન, ભિક્ખવે, ભિક્ખુસ્સ ભાતા ગિલાનો હોતિ. સો ચે ભાતુનો સન્તિકે દૂતં પહિણેય્ય – ‘‘અહઞ્હિ ગિલાનો, આગચ્છતુ મે ભાતા, ઇચ્છામિ ભાતુનો આગત’’ન્તિ, ગન્તબ્બં, ભિક્ખવે, સત્તાહકરણીયેન, પહિતે, ન ત્વેવ અપ્પહિતે. સત્તાહં સન્નિવત્તો કાતબ્બો.

ઇધ પન, ભિક્ખવે, ભિક્ખુસ્સ ભગિની ગિલાના હોતિ. સા ચે ભાતુનો સન્તિકે દૂતં પહિણેય્ય – ‘‘અહઞ્હિ ગિલાના, આગચ્છતુ મે ભાતા, ઇચ્છામિ ભાતુનો આગત’’ન્તિ, ગન્તબ્બં, ભિક્ખવે, સત્તાહકરણીયેન, પહિતે, ન ત્વેવ અપ્પહિતે. સત્તાહં સન્નિવત્તો કાતબ્બો.

ઇધ પન, ભિક્ખવે, ભિક્ખુસ્સ ઞાતકો ગિલાનો હોતિ. સો ચે ભિક્ખુસ્સ સન્તિકે દૂતં પહિણેય્ય – ‘‘અહઞ્હિ ગિલાનો, આગચ્છતુ ભદન્તો, ઇચ્છામિ ભદન્તસ્સ આગત’’ન્તિ, ગન્તબ્બં, ભિક્ખવે, સત્તાહકરણીયેન, પહિતે, ન ત્વેવ અપ્પહિતે. સત્તાહં સન્નિવત્તો કાતબ્બો.

ઇધ પન, ભિક્ખવે, ભિક્ખુગતિકો ગિલાનો હોતિ. સો ચે ભિક્ખૂનં સન્તિકે દૂતં પહિણેય્ય – ‘‘અહઞ્હિ ગિલાનો, આગચ્છન્તુ ભદન્તા, ઇચ્છામિ ભદન્તાનં આગત’’ન્તિ, ગન્તબ્બં, ભિક્ખવે, સત્તાહકરણીયેન, પહિતે, ન ત્વેવ અપ્પહિતે. સત્તાહં સન્નિવત્તો કાતબ્બો.

તેન ખો પન સમયેન સઙ્ઘસ્સ વિહારો ઉન્દ્રિયતિ. અઞ્ઞતરેન ઉપાસકેન અરઞ્ઞે ભણ્ડં છેદાપિતં હોતિ. સો ભિક્ખૂનં સન્તિકે દૂતં પાહેસિ – ‘‘સચે ભદન્તા તં ભણ્ડં આવહાપેય્યું, દજ્જાહં તં ભણ્ડ’’ન્તિ. ભગવતો એતમત્થં આરોચેસું. અનુજાનામિ, ભિક્ખવે, સઙ્ઘકરણીયેન ગન્તું. સત્તાહં સન્નિવત્તો કાતબ્બોતિ.

પહિતેયેવ અનુજાનના નિટ્ઠિતા.

વસ્સાવાસભાણવારો નિટ્ઠિતો.