૧૧૩. અન્તરાયે અનાપત્તિવસ્સચ્છેદવારો

૨૦૦. તેન ખો પન સમયેન કોસલેસુ જનપદે અઞ્ઞતરસ્મિં આવાસે વસ્સૂપગતા ભિક્ખૂ વાળેહિ ઉબ્બાળ્હા હોન્તિ. ગણ્હિંસુપિ પરિપાતિંસુપિ. ભગવતો એતમત્થં આરોચેસું.

ઇધ પન, ભિક્ખવે, વસ્સૂપગતા ભિક્ખૂ વાળેહિ ઉબ્બાળ્હા હોન્તિ. ગણ્હન્તિપિ પરિપાતેન્તિપિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતા ભિક્ખૂ સરીસપેહિ ઉબ્બાળ્હા હોન્તિ. ડંસન્તિપિ પરિપાતેન્તિપિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતા ભિક્ખૂ ચોરેહિ ઉબ્બાળ્હા હોન્તિ. વિલુમ્પન્તિપિ આકોટેન્તિપિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતા ભિક્ખૂ પિસાચેહિ ઉબ્બાળ્હા હોન્તિ. આવિસન્તિપિ હનન્તિપિ [ઓજમ્પિ હરન્તિ (સી.), હરન્તિપિ (સ્યા.)]. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતાનં ભિક્ખૂનં ગામો અગ્ગિના દડ્ઢો હોતિ. ભિક્ખૂ પિણ્ડકેન કિલમન્તિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતાનં ભિક્ખૂનં સેનાસનં અગ્ગિના દડ્ઢં હોતિ. ભિક્ખૂ સેનાસનેન કિલમન્તિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતાનં ભિક્ખૂનં ગામો ઉદકેન વૂળ્હો હોતિ. ભિક્ખૂ પિણ્ડકેન કિલમન્તિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતાનં ભિક્ખૂનં સેનાસનં ઉદકેન વૂળ્હં હોતિ. ભિક્ખૂ સેનાસનેન કિલમન્તિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સાતિ.

૨૦૧. તેન ખો પન સમયેન અઞ્ઞતરસ્મિં આવાસે વસ્સૂપગતાનં ભિક્ખૂનં ગામો ચોરેહિ વુટ્ઠાસિ. ભગવતો એતમત્થં આરોચેસું. અનુજાનામિ, ભિક્ખવે, યેન ગામો તેન ગન્તુન્તિ.

ગામો દ્વેધા ભિજ્જિત્થ. ભગવતો એતમત્થં આરોચેસું. અનુજાનામિ, ભિક્ખવે, યેન બહુતરા તેન ગન્તુન્તિ.

બહુતરા અસ્સદ્ધા હોન્તિ અપ્પસન્ના. ભગવતો એતમત્થં આરોચેસું. અનુજાનામિ, ભિક્ખવે, યેન સદ્ધા પસન્ના તેન ગન્તુન્તિ.

તેન ખો પન સમયેન કોસલેસુ જનપદે અઞ્ઞતરસ્મિં આવાસે વસ્સૂપગતા ભિક્ખૂ ન લભિંસુ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. ભગવતો એતમત્થં આરોચેસું.

ઇધ પન, ભિક્ખવે, વસ્સૂપગતા ભિક્ખૂ ન લભન્તિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતા ભિક્ખૂ લભન્તિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં, ન લભન્તિ સપ્પાયાનિ ભોજનાનિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતા ભિક્ખૂ લભન્તિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં, લભન્તિ સપ્પાયાનિ ભોજનાનિ, ન લભન્તિ સપ્પાયાનિ ભેસજ્જાનિ. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતા ભિક્ખૂ લભન્તિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં, લભન્તિ સપ્પાયાનિ ભોજનાનિ, લભન્તિ સપ્પાયાનિ ભેસજ્જાનિ, ન લભન્તિ પતિરૂપં ઉપટ્ઠાકં. એસેવ અન્તરાયોતિ પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતં ભિક્ખું ઇત્થી નિમન્તેતિ – ‘‘એહિ, ભન્તે, હિરઞ્ઞં વા તે દેમિ, સુવણ્ણં વા તે દેમિ, ખેત્તં વા તે દેમિ, વત્થું વા તે દેમિ, ગાવું વા તે દેમિ, ગાવિં વા તે દેમિ, દાસં વા તે દેમિ, દાસિં વા તે દેમિ, ધીતરં વા તે દેમિ ભરિયત્થાય, અહં વા તે ભરિયા હોમિ, અઞ્ઞં વા તે ભરિયં આનેમી’’તિ. તત્ર ચે ભિક્ખુનો એવં હોતિ, ‘લહુપરિવત્તં ખો ચિત્તં વુત્તં ભગવતા, સિયાપિ મે બ્રહ્મચરિયસ્સ અન્તરાયો’તિ, પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતં ભિક્ખું વેસી નિમન્તેતિ…પે… થુલ્લકુમારી નિમન્તેતિ… પણ્ડકો નિમન્તેતિ… ઞાતકા નિમન્તેન્તિ… રાજાનો નિમન્તેન્તિ… ચોરા નિમન્તેન્તિ… ધુત્તા નિમન્તેન્તિ – ‘‘એહિ, ભન્તે, હિરઞ્ઞં વા તે દેમ, સુવણ્ણં વા તે દેમ, ખેત્તં વા તે દેમ, વત્થું વા તે દેમ, ગાવું વા તે દેમ, ગાવિં વા તે દેમ, દાસં વા તે દેમ, દાસિં વા તે દેમ, ધીતરં વા તે દેમ ભરિયત્થાય, અઞ્ઞં વા તે ભરિયં આનેમા’’તિ. તત્ર ચે ભિક્ખુનો એવં હોતિ, ‘લહુપરિવત્તં ખો ચિત્તં વુત્તં ભગવતા, સિયાપિ મે બ્રહ્મચરિયસ્સ અન્તરાયો’તિ, પક્કમિતબ્બં. અનાપત્તિ વસ્સચ્છેદસ્સ.

ઇધ પન, ભિક્ખવે, વસ્સૂપગતો ભિક્ખુ અસ્સામિકં નિધિં પસ્સતિ. તત્ર ચે ભિક્ખુનો એવં હોતિ, ‘લહુપરિવત્તં ખો ચિત્તં વુત્તં ભગવતા, સિયાપિ મે બ્રહ્મચરિયસ્સ અન્તરાયો’તિ, પક્કમિતબ્બં. અનાપત્તિ વસ્સચ્છેદસ્સ.

અન્તરાયે અનાપત્તિવસ્સચ્છેદવારો નિટ્ઠિતો.