૧૧૧. સત્તન્નં અપ્પહિતેપિ અનુજાનના

૧૯૮. તેન ખો પન સમયેન અઞ્ઞતરસ્સ ભિક્ખુનો માતા ગિલાના હોતિ. સા પુત્તસ્સ સન્તિકે દૂતં પાહેસિ – ‘‘અહઞ્હિ ગિલાના, આગચ્છતુ મે પુત્તો, ઇચ્છામિ પુત્તસ્સ આગત’’ન્તિ. અથ ખો તસ્સ ભિક્ખુનો એતદહોસિ – ‘‘ભગવતા પઞ્ઞત્તં સત્તન્નં સત્તાહકરણીયેન પહિતે ગન્તું, ન ત્વેવ અપ્પહિતે; પઞ્ચન્નં સત્તાહકરણીયેન અપ્પહિતેપિ ગન્તું, પગેવ પહિતેતિ. અયઞ્ચ મે માતા ગિલાના, સા ચ અનુપાસિકા, કથં નુ ખો મયા પટિપજ્જિતબ્બ’’ન્તિ? ભગવતો એતમત્થં આરોચેસું. અનુજાનામિ, ભિક્ખવે, સત્તન્નં સત્તાહકરણીયેન અપ્પહિતેપિ ગન્તું, પગેવ પહિતે. ભિક્ખુસ્સ, ભિક્ખુનિયા, સિક્ખમાનાય, સામણેરસ્સ, સામણેરિયા, માતુયા ચ પિતુસ્સ ચ – અનુજાનામિ, ભિક્ખવે, ઇમેસં સત્તન્નં સત્તાહકરણીયેન અપ્પહિતેપિ ગન્તું, પગેવ પહિતે. સત્તાહં સન્નિવત્તો કાતબ્બો.

ઇધ પન, ભિક્ખવે, ભિક્ખુસ્સ માતા ગિલાના હોતિ. સા ચે પુત્તસ્સ સન્તિકે દૂતં પહિણેય્ય – ‘‘અહઞ્હિ ગિલાના, આગચ્છતુ મે પુત્તો, ઇચ્છામિ પુત્તસ્સ આગત’’ન્તિ, ગન્તબ્બં, ભિક્ખવે, સત્તાહકરણીયેન, અપ્પહિતેપિ, પગેવ પહિતે – ‘‘ગિલાનભત્તં વા પરિયેસિસ્સામિ, ગિલાનુપટ્ઠાકભત્તં વા પરિયેસિસ્સામિ, ગિલાનભેસજ્જં વા પરિયેસિસ્સામિ, પુચ્છિસ્સામિ વા, ઉપટ્ઠહિસ્સામિ વા’’તિ. સત્તાહં સન્નિવત્તો કાતબ્બો.

ઇધ પન, ભિક્ખવે, ભિક્ખુસ્સ પિતા ગિલાનો હોતિ. સો ચે પુત્તસ્સ સન્તિકે દૂતં પહિણેય્ય – ‘‘અહઞ્હિ ગિલાનો, આગચ્છતુ મે પુત્તો, ઇચ્છામિ પુત્તસ્સ આગત’’ન્તિ, ગન્તબ્બં, ભિક્ખવે, સત્તાહકરણીયેન, અપ્પહિતેપિ, પગેવ પહિતે – ‘‘ગિલાનભત્તં વા પરિયેસિસ્સામિ, ગિલાનુપટ્ઠાકભત્તં વા પરિયેસિસ્સામિ, ગિલાનભેસજ્જં વા પરિયેસિસ્સામિ, પુચ્છિસ્સામિ વા, ઉપટ્ઠહિસ્સામિ વા’’તિ. સત્તાહં સન્નિવત્તો કાતબ્બો.

સત્તન્નં અપ્પહિતેપિ અનુજાનના નિટ્ઠિતા.