૭૬. ગામસીમાદિ

૧૪૭. અસમ્મતાય, ભિક્ખવે, સીમાય અટ્ઠપિતાય, યં ગામં વા નિગમં વા ઉપનિસ્સાય વિહરતિ, યા તસ્સ વા ગામસ્સ ગામસીમા, નિગમસ્સ વા નિગમસીમા, અયં તત્થ સમાનસંવાસા એકુપોસથા. અગામકે ચે, ભિક્ખવે, અરઞ્ઞે સમન્તા સત્તબ્ભન્તરા, અયં તત્થ સમાનસંવાસા એકુપોસથા. સબ્બા, ભિક્ખવે, નદી અસીમા; સબ્બો સમુદ્દો અસીમો; સબ્બો જાતસ્સરો અસીમો. નદિયા વા, ભિક્ખવે, સમુદ્દે વા જાતસ્સરે વા યં મજ્ઝિમસ્સ પુરિસસ્સ સમન્તા ઉદકુક્ખેપા, અયં તત્થ સમાનસંવાસા એકુપોસથાતિ.

૧૪૮. તેન ખો પન સમયેન છબ્બગ્ગિયા ભિક્ખૂ સીમાય સીમં સમ્ભિન્દન્તિ. ભગવતો એતમત્થં આરોચેસું. યેસં, ભિક્ખવે, સીમા પઠમં સમ્મતા તેસં તં કમ્મં ધમ્મિકં અકુપ્પં ઠાનારહં. યેસં, ભિક્ખવે, સીમા પચ્છા સમ્મતા તેસં તં કમ્મં અધમ્મિકં કુપ્પં અટ્ઠાનારહં. ન, ભિક્ખવે, સીમાય સીમા સમ્ભિન્દિતબ્બા. યો સમ્ભિન્દેય્ય, આપત્તિ દુક્કટસ્સાતિ.

તેન ખો પન સમયેન છબ્બગ્ગિયા ભિક્ખૂ સીમાય સીમં અજ્ઝોત્થરન્તિ. ભગવતો એતમત્થં આરોચેસું. યેસં, ભિક્ખવે, સીમા પઠમં સમ્મતા તેસં તં કમ્મં ધમ્મિકં અકુપ્પં ઠાનારહં. યેસં, ભિક્ખવે, સીમા પચ્છા સમ્મતા તેસં તં કમ્મં અધમ્મિકં કુપ્પં અટ્ઠાનારહં. ન, ભિક્ખવે, સીમાય સીમા અજ્ઝોત્થરિતબ્બા. યો અજ્ઝોત્થરેય્ય, આપત્તિ દુક્કટસ્સાતિ. અનુજાનામિ, ભિક્ખવે, સીમં સમ્મન્નન્તેન સીમન્તરિકં ઠપેત્વા સીમં સમ્મન્નિતુન્તિ.