૧૦૫. વજ્જનીયપુગ્ગલસન્દસ્સના

૧૮૩. ન, ભિક્ખવે, ભિક્ખુનિયા નિસિન્નપરિસાય પાતિમોક્ખં ઉદ્દિસિતબ્બં. યો ઉદ્દિસેય્ય, આપત્તિ દુક્કટસ્સ. ન સિક્ખમાનાય…પે… ન સામણેરસ્સ …પે… ન સામણેરિયા…પે… ન સિક્ખાપચ્ચક્ખાતકસ્સ…પે… ન અન્તિમવત્થું અજ્ઝાપન્નકસ્સ નિસિન્નપરિસાય પાતિમોક્ખં ઉદ્દિસિતબ્બં. યો ઉદ્દિસેય્ય, આપત્તિ દુક્કટસ્સ.

ન આપત્તિયા અદસ્સને ઉક્ખિત્તકસ્સ નિસિન્નપરિસાય પાતિમોક્ખં ઉદ્દિસિતબ્બં. યો ઉદ્દિસેય્ય, યથાધમ્મો કારેતબ્બો. ન આપત્તિયા અપ્પટિકમ્મે ઉક્ખિત્તકસ્સ નિસિન્નપરિસાય…પે… ન પાપિકાય દિટ્ઠિયા અપ્પટિનિસ્સગ્ગે ઉક્ખિત્તકસ્સ નિસિન્નપરિસાય પાતિમોક્ખં ઉદ્દિસિતબ્બં. યો ઉદ્દિસેય્ય, યથાધમ્મો કારેતબ્બો.

ન પણ્ડકસ્સ નિસિન્નપરિસાય પાતિમોક્ખં ઉદ્દિસિતબ્બં. યો ઉદ્દિસેય્ય, આપત્તિ દુક્કટસ્સ. ન થેય્યસંવાસકસ્સ…પે… ન તિત્થિયપક્કન્તકસ્સ…પે… ન તિરચ્છાનગતસ્સ…પે… ન માતુઘાતકસ્સ…પે… ન પિતુઘાતકસ્સ…પે… ન અરહન્તઘાતકસ્સ…પે… ન ભિક્ખુનિદૂસકસ્સ…પે… ન સઙ્ઘભેદકસ્સ…પે… ન લોહિતુપ્પાદકસ્સ…પે… ન ઉભતોબ્યઞ્જનકસ્સ નિસિન્નપરિસાય પાતિમોક્ખં ઉદ્દિસિતબ્બં. યો ઉદ્દિસેય્ય, આપત્તિ દુક્કટસ્સ.

ન, ભિક્ખવે, પારિવાસિકપારિસુદ્ધિદાનેન ઉપોસથો કાતબ્બો, અઞ્ઞત્ર અવુટ્ઠિતાય પરિસાય. ન ચ, ભિક્ખવે, અનુપોસથે ઉપોસથો કાતબ્બો, અઞ્ઞત્ર સઙ્ઘસામગ્ગિયાતિ.

વજ્જનીયપુગ્ગલસન્દસ્સના નિટ્ઠિતા.

તતિયભાણવારો નિટ્ઠિતો.

ઉપોસથક્ખન્ધકો દુતિયો.