૬૪. ચત્તારો નિસ્સયા

૧૨૮. તાવદેવ છાયા મેતબ્બા, ઉતુપ્પમાણં આચિક્ખિતબ્બં, દિવસભાગો આચિક્ખિતબ્બો, સઙ્ગીતિ આચિક્ખિતબ્બા, ચત્તારો નિસ્સયા આચિક્ખિતબ્બા [આચિક્ખિતબ્બા, ચત્તારિ અકરણીયાનિ આચિક્ખિતબ્બાનિ. (ક.)] –

‘‘પિણ્ડિયાલોપભોજનં નિસ્સાય પબ્બજ્જા. તત્થ તે યાવજીવં ઉસ્સાહો કરણીયો. અતિરેકલાભો – સઙ્ઘભત્તં, ઉદ્દેસભત્તં, નિમન્તનં, સલાકભત્તં, પક્ખિકં, ઉપોસથિકં, પાટિપદિકં.

‘‘પંસુકૂલચીવરં નિસ્સાય પબ્બજ્જા. તત્થ તે યાવજીવં ઉસ્સાહો કરણીયો. અતિરેકલાભો – ખોમં, કપ્પાસિકં, કોસેય્યં, કમ્બલં, સાણં, ભઙ્ગં.

‘‘રુક્ખમૂલસેનાસનં નિસ્સાય પબ્બજ્જા. તત્થ તે યાવજીવં ઉસ્સાહો કરણીયો. અતિરેકલાભો – વિહારો, અડ્ઢયોગો, પાસાદો, હમ્મિયં, ગુહા.

‘‘પૂતિમુત્તભેસજ્જં નિસ્સાય પબ્બજ્જા. તત્થ તે યાવજીવં ઉસ્સાહો કરણીયો. અતિરેકલાભો – સપ્પિ, નવનીતં, તેલં, મધુ, ફાણિત’’ન્તિ.

ચત્તારો નિસ્સયા નિટ્ઠિતા.