૬૫. ચત્તારિ અકરણીયાનિ

૧૨૯. તેન ખો પન સમયેન ભિક્ખૂ અઞ્ઞતરં ભિક્ખું ઉપસમ્પાદેત્વા એકકં ઓહાય પક્કમિંસુ. સો પચ્છા એકકોવ આગચ્છન્તો અન્તરામગ્ગે પુરાણદુતિયિકાય સમાગઞ્છિ. સા એવમાહ – ‘‘કિંદાનિ પબ્બજિતોસી’’તિ? ‘‘આમ, પબ્બજિતોમ્હી’’તિ. ‘‘દુલ્લભો ખો પબ્બજિતાનં મેથુનો ધમ્મો; એહિ, મેથુનં ધમ્મં પટિસેવા’’તિ. સો તસ્સા મેથુનં ધમ્મં પટિસેવિત્વા ચિરેન અગમાસિ. ભિક્ખૂ એવમાહંસુ – ‘‘કિસ્સ ત્વં, આવુસો, એવં ચિરં અકાસી’’તિ? અથ ખો સો ભિક્ખુ ભિક્ખૂનં એતમત્થં આરોચેસિ. ભિક્ખૂ ભગવતો એતમત્થં આરોચેસું. અનુજાનામિ, ભિક્ખવે, ઉપસમ્પાદેત્વા દુતિયં દાતું, ચત્તારિ ચ અકરણીયાનિ આચિક્ખિતું –

‘‘ઉપસમ્પન્નેન ભિક્ખુના મેથુનો ધમ્મો ન પટિસેવિતબ્બો, અન્તમસો તિરચ્છાનગતાયપિ. યો ભિક્ખુ મેથુનં ધમ્મં પટિસેવતિ, અસ્સમણો હોતિ અસક્યપુત્તિયો. સેય્યથાપિ નામ પુરિસો સીસચ્છિન્નો અભબ્બો તેન સરીરબન્ધનેન જીવિતું, એવમેવ ભિક્ખુ મેથુનં ધમ્મં પટિસેવિત્વા અસ્સમણો હોતિ અસક્યપુત્તિયો. તં તે યાવજીવં અકરણીયં.

‘‘ઉપસમ્પન્નેન ભિક્ખુના અદિન્નં થેય્યસઙ્ખાતં ન આદાતબ્બં, અન્તમસો તિણસલાકં ઉપાદાય. યો ભિક્ખુ પાદં વા પાદારહં વા અતિરેકપાદં વા અદિન્નં થેય્યસઙ્ખાતં આદિયતિ, અસ્સમણો હોતિ અસક્યપુત્તિયો. સેય્યથાપિ નામ પણ્ડુપલાસો બન્ધના પમુત્તો અભબ્બો હરિતત્થાય, એવમેવ ભિક્ખુ પાદં વા પાદારહં વા અતિરેકપાદં વા અદિન્નં થેય્યસઙ્ખાતં આદિયિત્વા અસ્સમણો હોતિ અસક્યપુત્તિયો. તં તે યાવજીવં અકરણીયં.

‘‘ઉપસમ્પન્નેન ભિક્ખુના સઞ્ચિચ્ચ પાણો જીવિતા ન વોરોપેતબ્બો, અન્તમસો કુન્થકિપિલ્લિકં ઉપાદાય. યો ભિક્ખુ સઞ્ચિચ્ચ મનુસ્સવિગ્ગહં જીવિતા વોરોપેતિ, અન્તમસો ગબ્ભપાતનં ઉપાદાય, અસ્સમણો હોતિ અસક્યપુત્તિયો. સેય્યથાપિ નામ પુથુસિલા દ્વેધા ભિન્ના અપ્પટિસન્ધિકા હોતિ, એવમેવ ભિક્ખુ સઞ્ચિચ્ચ મનુસ્સવિગ્ગહં જીવિતા વોરોપેત્વા અસ્સમણો હોતિ અસક્યપુત્તિયો. તં તે યાવજીવં અકરણીયં.

‘‘ઉપસમ્પન્નેન ભિક્ખુના ઉત્તરિમનુસ્સધમ્મો ન ઉલ્લપિતબ્બો, અન્તમસો ‘સુઞ્ઞાગારે અભિરમામી’તિ. યો ભિક્ખુ પાપિચ્છો ઇચ્છાપકતો અસન્તં અભૂતં ઉત્તરિમનુસ્સધમ્મં ઉલ્લપતિ ઝાનં વા વિમોક્ખં વા સમાધિં વા સમાપત્તિં વા મગ્ગં વા ફલં વા, અસ્સમણો હોતિ અસક્યપુત્તિયો. સેય્યથાપિ નામ તાલો મત્થકચ્છિન્નો અભબ્બો પુન વિરુળ્હિયા, એવમેવ ભિક્ખુ પાપિચ્છો ઇચ્છાપકતો અસન્તં અભૂતં ઉત્તરિમનુસ્સધમ્મં ઉલ્લપિત્વા અસ્સમણો હોતિ અસક્યપુત્તિયો. તં તે યાવજીવં અકરણીય’’ન્તિ.

ચત્તારિ અકરણીયાનિ નિટ્ઠિતાનિ.