૪૭. પણ્ડકવત્થુ

૧૦૯. તેન ખો પન સમયેન અઞ્ઞતરો પણ્ડકો ભિક્ખૂસુ પબ્બજિતો હોતિ. સો દહરે દહરે ભિક્ખૂ ઉપસઙ્કમિત્વા એવં વદેતિ – ‘‘એથ, મં આયસ્મન્તો દૂસેથા’’તિ. ભિક્ખૂ અપસાદેન્તિ – ‘‘નસ્સ, પણ્ડક, વિનસ્સ, પણ્ડક, કો તયા અત્થો’’તિ. સો ભિક્ખૂહિ અપસાદિતો મહન્તે મહન્તે મોળિગલ્લે સામણેરે ઉપસઙ્કમિત્વા એવં વદેતિ – ‘‘એથ, મં આવુસો દૂસેથા’’તિ. સામણેરા અપસાદેન્તિ – ‘‘નસ્સ, પણ્ડક, વિનસ્સ, પણ્ડક, કો તયા અત્થો’’તિ. સો સામણેરેહિ અપસાદિતો હત્થિભણ્ડે અસ્સભણ્ડે ઉપસઙ્કમિત્વા એવં વદેતિ – ‘‘એથ, મં, આવુસો, દૂસેથા’’તિ. હત્થિભણ્ડા અસ્સભણ્ડા દૂસેસું. તે ઉજ્ઝાયન્તિ ખિય્યન્તિ વિપાચેન્તિ – ‘‘પણ્ડકા ઇમે સમણા સક્યપુત્તિયા. યેપિ ઇમેસં ન પણ્ડકા, તેપિ ઇમે પણ્ડકે દૂસેન્તિ. એવં ઇમે સબ્બેવ અબ્રહ્મચારિનો’’તિ. અસ્સોસું ખો ભિક્ખૂ તેસં હત્થિભણ્ડાનં અસ્સભણ્ડાનં ઉજ્ઝાયન્તાનં ખિય્યન્તાનં વિપાચેન્તાનં. અથ ખો તે ભિક્ખૂ ભગવતો એતમત્થં આરોચેસું. પણ્ડકો, ભિક્ખવે, અનુપસમ્પન્નો ન ઉપસમ્પાદેતબ્બો, ઉપસમ્પન્નો નાસેતબ્બોતિ.