૪. પાતિમોક્ખસવનારહો

૩૮૬. અથ ખો ભગવા ભિક્ખૂ આમન્તેસિ – ‘‘નદાનાહં, ભિક્ખવે, ઇતો પરં ઉપોસથં કરિસ્સામિ, પાતિમોક્ખં ઉદ્દિસિસ્સામિ. તુમ્હેવદાનિ, ભિક્ખવે, ઇતો પરં ઉપોસથં કરેય્યાથ, પાતિમોક્ખં ઉદ્દિસેય્યાથ. અટ્ઠાનમેતં, ભિક્ખવે, અનવકાસો યં તથાગતો અપરિસુદ્ધાય પરિસાય ઉપોસથં કરેય્ય, પાતિમોક્ખં ઉદ્દિસેય્ય. ન ચ, ભિક્ખવે [ન ચ ભિક્ખવે ભિક્ખુના (સ્યા. કં.)], સાપત્તિકેન પાતિમોક્ખં સોતબ્બં. યો સુણેય્ય, આપત્તિ દુક્કટસ્સ. અનુજાનામિ, ભિક્ખવે, યો સાપત્તિકો પાતિમોક્ખં સુણાતિ, તસ્સ પાતિમોક્ખં ઠપેતું. એવઞ્ચ પન, ભિક્ખવે, ઠપેતબ્બં. તદહુપોસથે ચાતુદ્દસે વા પન્નરસે વા તસ્મિં પુગ્ગલે સમ્મુખીભૂતે સઙ્ઘમજ્ઝે ઉદાહરિતબ્બં –

‘સુણાતુ મે ભન્તે, સઙ્ઘો. ઇત્થન્નામો પુગ્ગલો સાપત્તિકો, તસ્સ પાતિમોક્ખં ઠપેમિ, ન તસ્મિં સમ્મુખીભૂતે પાતિમોક્ખં ઉદ્દિસિતબ્બ’ન્તિ ઠપિતં હોતિ પાતિમોક્ખ’’ન્તિ.

તેન ખો પન સમયેન છબ્બગ્ગિયા ભિક્ખૂ ‘નામ્હે કોચિ જાનાતી’તિ સાપત્તિકાવ પાતિમોક્ખં સુણન્તિ. થેરા ભિક્ખૂ પરચિત્તવિદુનો ભિક્ખૂનં આરોચેન્તિ – ‘‘ઇત્થન્નામો ચ ઇત્થન્નામો ચ, આવુસો, છબ્બગ્ગિયા ભિક્ખૂ ‘નામ્હે કોચિ જાનાતી’તિ સાપત્તિકાવ પાતિમોક્ખં સુણન્તી’’તિ. અસ્સોસું ખો છબ્બગ્ગિયા ભિક્ખૂ – ‘‘થેરા કિર ભિક્ખૂ પરચિત્તવિદુનો અમ્હે ભિક્ખૂનં આરોચેન્તિ – ઇત્થન્નામો ચ ઇત્થન્નામો ચ, આવુસો, છબ્બગ્ગિયા ભિક્ખૂ ‘નામ્હે કોચિ જાનાતી’તિ સાપત્તિકાવ પાતિમોક્ખં સુણન્તી’’તિ.

તે – પુરમ્હાકં પેસલા ભિક્ખૂ પાતિમોક્ખં ઠપેન્તીતિ – પટિકચ્ચેવ સુદ્ધાનં ભિક્ખૂનં અનાપત્તિકાનં અવત્થુસ્મિં અકારણે પાતિમોક્ખં ઠપેન્તિ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખૂ સુદ્ધાનં ભિક્ખૂનં અનાપત્તિકાનં અવત્થુસ્મિં અકારણે પાતિમોક્ખં ઠપેસ્સન્તી’’તિ! અથ ખો તે ભિક્ખૂ ભગવતો એતમત્થં આરોચેસું…પે… ‘‘સચ્ચં કિર, ભિક્ખવે, છબ્બગ્ગિયા ભિક્ખૂ સુદ્ધાનં ભિક્ખૂનં અનાપત્તિકાનં અવત્થુસ્મિં અકારણે પાતિમોક્ખં ઠપેન્તી’’તિ? ‘‘સચ્ચં ભગવા’’તિ…પે… વિગરહિત્વા…પે… ધમ્મિં કથં કત્વા ભિક્ખૂ આમન્તેસિ – ‘‘ન, ભિક્ખવે, સુદ્ધાનં ભિક્ખૂનં અનાપત્તિકાનં અવત્થુસ્મિં અકારણે પાતિમોક્ખં ઠપેતબ્બં. યો ઠપેય્ય, આપત્તિ દુક્કટસ્સ’’.