૩. નિસ્સગ્ગિયકણ્ડં (ભિક્ખુનીવિભઙ્ગવણ્ણના)

૭૩૩. નિસ્સગ્ગિયેસુ પઠમં ઉત્તાનમેવ.

૭૪૦. દુતિયે ‘‘અય્યાય દમ્મીતિ એવં પટિલદ્ધન્તિ નિસ્સટ્ઠપટિલદ્ધં. તેનેવ માતિકાટ્ઠકથાયમ્પિ ‘‘નિસ્સટ્ઠં પટિલભિત્વાપિ યથાદાનેયેવ ઉપનેતબ્બ’’ન્તિ વુત્તં. યથાદાનેયેવ ઉપનેતબ્બન્તિ યથા દાયકેન દિન્નં, તથા ઉપનેતબ્બં, અકાલચીવરપક્ખેયેવ ઠપેતબ્બન્તિ વુત્તં હોતિ. એત્થ ચ ભાજાપિતાય લદ્ધચીવરમેવ નિસ્સગ્ગિયં હોતિ, તં વિનયકમ્મં કત્વાપિ અત્તના ન લભતિ. સેસમેત્થ ઉત્તાનમેવ. અકાલચીવરતા, તથાસઞ્ઞિતા, કાલચીવરન્તિ અધિટ્ઠાય લેસેન ભાજાપનં, પટિલાભોતિ ઇમાનિ પનેત્થ ચત્તારિ અઙ્ગાનિ.

૭૪૩. તતિયે મેતન્તિ મે એતં. સકસઞ્ઞાય ગહિતત્તા પાચિત્તિયં દુક્કટઞ્ચ વુત્તં. ઇતરથા ભણ્ડગ્ઘેન કારેતબ્બં. ઉપસમ્પન્નતા, પરિવત્તિતચીવરસ્સ વિકપ્પનુપગતા, સકસઞ્ઞાય અચ્છિન્દનં વા અચ્છિન્દાપનં વાતિ ઇમાનિ પનેત્થ તીણિ અઙ્ગાનિ.

૭૪૮-૭૫૨. ચતુત્થે આહટસપ્પિં દત્વાતિ અત્તનો દત્વા. યમકં પચિતબ્બન્તિ સપ્પિઞ્ચ તેલઞ્ચ એકતો કત્વા પચિતબ્બં. લેસેન ગહેતુકામતા, અઞ્ઞસ્સ વિઞ્ઞાપનં, પટિલાભોતિ ઇમાનિ પનેત્થ તીણિ અઙ્ગાનિ.

૭૫૩. પઞ્ચમે સાતિ થુલ્લનન્દા. અયન્તિ અયં સિક્ખમાના. ચેતાપેત્વાતિ જાનાપેત્વા ઇચ્ચેવ અત્થોતિ ઇધ વુત્તં, માતિકાટ્ઠકથાયં (કઙ્ખા. અટ્ઠ. અઞ્ઞચેતાપનસિક્ખાપદવણ્ણના) પન ‘‘અઞ્ઞં ચેતાપેત્વાતિ અત્તનો કપ્પિયભણ્ડેન ઇદં નામ આહરાતિ અઞ્ઞં પરિવત્તાપેત્વા’’તિ વુત્તં, તસ્મા ‘‘ચેતાપેત્વા’’તિ ઇમસ્સ પરિવત્તાપેત્વાતિપિ અત્થો દટ્ઠબ્બો. અઞ્ઞં ચેતાપેય્યાતિ ‘‘એવં મે ઇદં દત્વા અઞ્ઞમ્પિ આહરિસ્સતી’’તિ મઞ્ઞમાના ‘‘ન મે ઇમિના અત્થો, ઇદં નામ મે આહરા’’તિ તતો અઞ્ઞં ચેતાપેય્ય.

૭૫૮. છટ્ઠે ધમ્મકિચ્ચન્તિ પુઞ્ઞકમ્મં. પાવારિકસ્સાતિ દુસ્સવાણિજકસ્સ. યાય ચેતાપિતં, તસ્સાયેવ નિસ્સગ્ગિયં નિસ્સટ્ઠપટિલાભો ચ, તસ્મા તાય ભિક્ખુનિયા નિસ્સટ્ઠં પટિલભિત્વા યથાદાને ઉપનેતબ્બં, ન અત્તના ગહેતબ્બં. અઞ્ઞસ્સત્થાયાતિ ચીવરાદીસુ અઞ્ઞતરસ્સત્થાય. અઞ્ઞુદ્દિસિકેનાતિ પુરિમસ્સેવત્થદીપનં. પરિક્ખારેનાતિ કપ્પિયભણ્ડેન.

૭૬૪. સત્તમે સયં યાચિતકેનાતિ સયં યાચિતકેનાપીતિ અત્થો. તેનેવ પાળિયં ‘‘તેન ચ પરિક્ખારેન સયમ્પિ યાચિત્વા’’તિ વુત્તં, તતોયેવ માતિકાટ્ઠકથાયં ‘‘સઞ્ઞાચિકેનાતિ સયં યાચિતકેનાપી’’તિ અત્થો વુત્તો.

૭૬૮-૭૭૩. અટ્ઠમનવમદસમાનિ ઉત્તાનત્થાનેવ.

૭૮૪. એકાદસમે યસ્મા પવારિતટ્ઠાને વિઞ્ઞત્તિ નામ ન પટિસેધેતબ્બા, તસ્મા ભગવા ધમ્મનિમન્તનવસેન પવારિતટ્ઠાને ‘‘વદેય્યાસિ યેનત્થો’’તિ વુત્તાય ‘‘ચતુક્કંસપરમં વિઞ્ઞાપેતબ્બ’’ન્તિ પરિચ્છેદં દસ્સેતીતિ વેદિતબ્બં. તેનેવ માતિકાટ્ઠકથાયં (કઙ્ખા. અટ્ઠ. ગરુપાવુરણસિક્ખાપદવણ્ણના) ‘‘ચેતાપેતબ્બન્તિ ઠપેત્વા સહધમ્મિકે ચ ઞાતકપવારિતે ચ અઞ્ઞેન કિસ્મિઞ્ચિદેવ ગુણે પરિતુટ્ઠેન વદેય્યાસિ યેનત્થોતિ વુત્તાય વિઞ્ઞાપેતબ્બ’’ન્તિ વુત્તં.

૭૮૮. દ્વાદસમં ઉત્તાનત્થમેવ.

ભિક્ખુનીવિભઙ્ગે નિસ્સગ્ગિયપાચિત્તિયસિક્ખાપદવણ્ણના નિટ્ઠિતા.

નિસ્સગ્ગિયકણ્ડં નિટ્ઠિતં.