ઉપોસથાદિપુચ્છાવિસ્સજ્જનાવણ્ણના

૩૩૨. ‘‘સઙ્ઘં, ભન્તે, પવારેમીતિઆદિ પવારણાકથા નામા’’તિ ગણ્ઠિપદેસુ વુત્તં.

અત્થવસપકરણવણ્ણના

૩૩૪. પઠમપારાજિકવણ્ણનાયમેવ વુત્તન્તિ ‘‘સઙ્ઘસુટ્ઠુતાયા’’તિઆદીનં અત્થવણ્ણનં સન્ધાય વુત્તં. દસક્ખત્તું યોજનાય પદસતં વુત્તન્તિ એકમૂલકનયે દસક્ખત્તું યોજનાય કતાય સઙ્ખલિકનયે વુત્તપદેહિ સદ્ધિં પદસતં વુત્તન્તિ એવમત્થો ગહેતબ્બો. અઞ્ઞથા એકમૂલકે એવ નયે ન સક્કા પદસતં લદ્ધું. એકમૂલકનયેહિ પુરિમપચ્છિમપદાનિ એકતો કત્વા એકેકસ્મિં વારે નવ નવ પદાનિ વુત્તાનીતિ દસક્ખત્તું યોજનાય નવુતિ પદાનિયેવ લબ્ભન્તિ. તસ્મા તાનિ નવુતિ પદાનિ સઙ્ખલિકનયે બદ્ધચક્કવસેન યોજિતે દસ પદાનિ લબ્ભન્તીતિ તેહિ સદ્ધિં પદસતન્તિ સક્કા વત્તું. ઇતો અઞ્ઞથા પન ઉભોસુપિ નયેસુ વિસું વિસું અત્થસતં ધમ્મસતઞ્ચ યથા લબ્ભતિ, તથા પઠમપારાજિકસંવણ્ણનાયમેવ અમ્હેહિ દસ્સિતં, તં તત્થ વુત્તનયેનેવ ગહેતબ્બં. પુરિમપચ્છિમપદાનિ એકત્તેન ગહેત્વા ‘‘પદસત’’ન્તિ વુત્તત્તા ‘‘તત્થ પચ્છિમસ્સ પચ્છિમસ્સ પદસ્સ વસેન અત્થસતં, પુરિમસ્સ પુરિમસ્સ વસેન ધમ્મસત’’ન્તિ વુત્તં. તસ્મિં પદસતે ‘‘સઙ્ઘસુટ્ઠૂ’’તિઆદિના વુત્તપુરિમપદાનં વસેન ધમ્મસતં, ‘‘સઙ્ઘફાસૂ’’તિઆદિના વુત્તપચ્છિમપદાનં વસેન અત્થસતન્તિ અધિપ્પાયો.

મહાવગ્ગવણ્ણના નિટ્ઠિતા.