ઉપાલિપઞ્ચકવણ્ણના

૪૨૦-૪૨૧. ઓમદ્દકારકોતિ ઓમદ્દિત્વા અભિભવિત્વા કારકો. ઉપત્થમ્ભો ન દાતબ્બોતિ સામગ્ગિવિનાસાય અનુબલં ન દાતબ્બં. દિટ્ઠાવિકમ્મમ્પિ કત્વાતિ ‘‘ન મેતં ખમતી’’તિ દિટ્ઠિં આવિ કત્વાપિ.

વોહારવગ્ગવણ્ણના

૪૨૪. કાયપ્પયોગેન આપજ્જિતબ્બા કાયપ્પયોગા. વચીપયોગેન આપજ્જિતબ્બા વચીપયોગા. નવસુ ઠાનેસૂતિ ઓસારણાદીસુ નવસુ ઠાનેસુ. દ્વીસુ ઠાનેસૂતિ ઞત્તિદુતિયઞત્તિચતુત્થકમ્મેસુ. તસ્માતિ યસ્મા મહાઅટ્ઠકથાયં વુત્તનયેન ઉભતોવિભઙ્ગા અસઙ્ગહિતા, તસ્મા. યં કુરુન્દિયં વુત્તં, તં ગહેતબ્બન્તિ સમ્બન્ધો.

દિટ્ઠાવિકમ્મવગ્ગવણ્ણના

૪૨૫. ‘‘ચતૂહિ પઞ્ચહી’’તિ વચનતો દ્વીહિ વા તીહિ વા એકતો દેસેતું વટ્ટતિ, તતો પરં ન વટ્ટતિ. માળકસીમાયાતિ ખણ્ડસીમાય. અવિપ્પવાસસીમાયાતિ મહાસીમાય.

મુસાવાદવગ્ગવણ્ણના

૪૪૪. પરિયાયેન જાનન્તસ્સ વુત્તમુસાવાદોતિ યસ્સ કસ્સચિ જાનન્તસ્સ પરિયાયેન વુત્તમુસાવાદોતિ અત્થો.

૪૪૬. અનુયોગો ન દાતબ્બોતિ તેન વુત્તં અનાદિયિત્વા તુણ્હી ભવિતબ્બન્તિ અત્થો.

ભિક્ખુનોવાદવગ્ગવણ્ણના

૪૫૪. એકૂનવીસતિભેદાયાતિ મગ્ગપચ્ચવેક્ખણાદિવસેન એકૂનવીસતિભેદાય.

અધિકરણવૂપસમવગ્ગવણ્ણના

૪૫૮. પઞ્ચહિ કારણેહીતિ ઇદં અત્થનિપ્ફાદનકાનિ તેસં પુબ્બભાગાનિ ચ કારણભાવસામઞ્ઞેન એકજ્ઝં ગહેત્વા વુત્તં, ન પન સબ્બેસં પઞ્ચન્નં સમાનયોગક્ખેમત્તા. અનુસ્સાવનેનાતિ ભેદસ્સ અનુરૂપસાવનેન. યથા ભેદો હોતિ, એવં ભિન્દિતબ્બાનં ભિક્ખૂનં અત્તનો વચનસ્સ સાવનેન વિઞ્ઞાપનેનાતિ અત્થો. તેનાહ ‘‘નનુ તુમ્હે’’તિઆદિ. કણ્ણમૂલે વચીભેદં કત્વાતિ એતેન પાકટં કત્વા ભેદકરવત્થુદીપનં વોહરણં. તત્થ અત્તના વિનિચ્છિતમત્તં રહસ્સવસેન વિઞ્ઞાપનં અનુસ્સાવનન્તિ દસ્સેતિ. કમ્મમેવ ઉદ્દેસો વા પમાણન્તિ તેહિ સઙ્ઘભેદસિદ્ધિતો પમાણં, ઇતરે પન તેસં સમ્ભારભૂતા. તેનાહ ‘‘વોહારા’’તિઆદિ. તત્થાતિ વોહરણે.

કથિનત્થારવગ્ગવણ્ણના

૪૬૭. અન્તરા વુત્તકારણેનાતિ ‘‘તઞ્હિ વન્દન્તસ્સ મઞ્ચપાદાદીસુપિ નલાટં પટિહઞ્ઞેય્યા’’તિઆદિના વુત્તકારણેન.