૬. સુરુસુરુવગ્ગવણ્ણના

૬૨૭. છટ્ઠવગ્ગે સીતીકતોતિ સીતટ્ટો, સીતપીળિતોતિ વુત્તં હોતિ. સિલકબુદ્ધોતિ પરિહાસવચનમેતં. સિલકઞ્હિ કઞ્ચિ દિસ્વા ‘‘બુદ્ધો અય’’ન્તિ વોહરન્તિ.

૬૩૪. વિલીવચ્છત્તન્તિ વેણુવિલીવેહિ કતં છત્તં. તત્થજાતકદણ્ડકેન કતન્તિ તાલપણ્ણં સહ દણ્ડકેન છિન્દિત્વા તમેવ છત્તદણ્ડં કરોન્તિ ગોપાલકાદયો વિય, તં સન્ધાયેતં વુત્તં. છત્તપાદુકાય વા ઠિતં હોતીતિ એત્થ છત્તપાદુકા વુચ્ચતિ છત્તાધારો. યસ્મિં છત્તં અપતમાનં કત્વા ઠપેન્તિ, તાદિસિકાય છત્તપાદુકાય ઠિતં છત્તં ‘‘છત્ત’’ન્તિ અજ્ઝાહરિતબ્બં. ‘‘છત્તં છત્તપાદુકાય ઠિત’’ન્તિપિ પઠન્તિ, તત્થાપિ અયમેવત્થો.

૬૩૭. ચાપોતિ મજ્ઝે વઙ્કા કાચદણ્ડસદિસા ધનુવિકતિ. કોદણ્ડોતિ વટ્ટલદણ્ડા ધનુવિકતિ. પટિમુક્કન્તિ પવેસિતં લગ્ગિતં.

સુરુસુરુવગ્ગવણ્ણના નિટ્ઠિતા.