૨. પારિવાસિકક્ખન્ધકં

પારિવાસિકવત્તકથાવણ્ણના

૭૫. પારિવાસિકક્ખન્ધકે નવકતરં પારિવાસિકન્તિ અત્તનો નવકતરં પારિવાસિકં. પારિવાસિકસ્સ હિ અત્તનો નવકતરં પારિવાસિકં ઠપેત્વા અઞ્ઞે મૂલાયપટિકસ્સનારહમાનત્તારહમાનત્તચારિકઅબ્ભાનારહાપિ પકતત્તટ્ઠાનેયેવ તિટ્ઠન્તિ. તેનાહ ‘‘અન્તમસો મૂલાયપઅકસ્સનારહાદીનમ્પી’’તિ. પાદે ઘંસેન્તિ એતેનાતિ પાદઘંસનં, સક્ખરકથલાદિ. ‘‘અનુજાનામિ, ભિક્ખવે, તિસ્સો પાદઘંસનિયો સક્ખરં કથલં સમુદ્દફેણક’’ન્તિ (ચૂળવ. ૨૬૯) હિ વુત્તં. સદ્ધિવિહારિકાદીનમ્પિ સાદિયન્તસ્સાતિ સદ્ધિવિહારિકાનમ્પિ અભિવાદનાદિં સાદિયન્તસ્સ. ‘‘મા મં ગામપ્પવેસનં આપુચ્છથા’’તિ વુત્તે અનાપુચ્છાપિ ગામં પવિસિતું વટ્ટતિ. યો યો વુડ્ઢોતિ પારિવાસિકેસુ ભિક્ખૂસુ યો યો વુડ્ઢો. નવકતરસ્સ સાદિતુન્તિ પારિવાસિકનવકતરસ્સ અભિવાદનાદિં સાદિતું.

તત્થેવાતિ સઙ્ઘનવકટ્ઠાનેયેવ. અત્તનો પાળિયા પવારેતબ્બન્તિ અત્તનો વસ્સગ્ગેન પત્તપાળિયા પવારેતબ્બં, ન પન સબ્બેસુ પવારિતેસૂતિ અત્થો. યદિ પન ન ગણ્હાતિ ન વિસ્સજ્જેતીતિ યદિ પુરિમદિવસે અત્તનો ન ગણ્હાતિ ગહેત્વા ચ ન વિસ્સજ્જેતિ. ચતુસ્સાલભત્તન્તિ ભોજનસાલાયં પટિપાટિયા દિય્યમાનભત્તં. હત્થપાસે ઠિતેનાતિ દાયકસ્સ હત્થપાસે ઠિતેન.

૭૬. અઞ્ઞો સામણેરો ન ગહેતબ્બોતિ ઉપજ્ઝાયેન હુત્વા અઞ્ઞો સામણેરો ન ગહેતબ્બો. ઉપજ્ઝં દત્વા ગહિતસામણેરાપીતિ પકતત્તકાલે ઉપજ્ઝં દત્વા ગહિતસામણેરાપિ. લદ્ધસમ્મુતિકેન આણત્તોપિ ગરુધમ્મેહિ અઞ્ઞેહિ વા ઓવદિતું લભતીતિ આહ ‘‘પટિબલસ્સ વા ભિક્ખુસ્સ ભારો કાતબ્બો’’તિ. આગતા ભિક્ખુનિયો વત્તબ્બાતિ સમ્બન્ધો. સવચનીયન્તિ સદોસં. જેટ્ઠકટ્ઠાનં ન કાતબ્બન્તિ પધાનટ્ઠાનં ન કાતબ્બં. કિં તન્તિ આહ ‘‘પાતિમોક્ખુદ્દેસકેન વા’’તિઆદિ.

રજેહિ હતા ઉપહતા ભૂમિ એતિસ્સાતિ રજોહતભૂમિ, રજોકિણ્ણભૂમીતિ અત્થો. પચ્ચયન્તિ વસ્સાવાસિકલાભં સન્ધાય વુત્તં. એકપસ્સે ઠત્વાતિ પાળિં વિહાય ભિક્ખૂનં પચ્છતો ઠત્વા. સેનાસનં ન લભતીતિ સેય્યાપરિયન્તભાગિતાય વસ્સગ્ગેન ગણ્હિતું ન લભતિ. અસ્સાતિ ભવેય્ય. ‘‘આગન્તુકેન આરોચેતબ્બં, આગન્તુકસ્સ આરોચેતબ્બ’’ન્તિ અવિસેસેન વુત્તત્તા સચે દ્વે પારિવાસિકા ગતટ્ઠાને અઞ્ઞમઞ્ઞં પસ્સન્તિ, ઉભોહિપિ અઞ્ઞમઞ્ઞસ્સ આરોચેતબ્બં. યથા બહિ દિસ્વા આરોચિતસ્સ ભિક્ખુનો વિહારં આગતે પુન આરોચનકિચ્ચં નત્થિ, એવં અઞ્ઞં વિહારં ગતેનપિ તત્થ પુબ્બે આરોચિતસ્સ પુન આરોચનકિચ્ચં નત્થીતિ વદન્તિ.

૮૧. અવિસેસેનાતિ પારિવાસિકસ્સ ઉક્ખિત્તકસ્સ ચ અવિસેસેન. ઓબદ્ધન્તિ પલિબુદ્ધં.

૮૩. સહવાસોતિ વુત્તપ્પકારે છન્ને પકતત્તેન ભિક્ખુના સદ્ધિં સયનમેવ અધિપ્પેતં, ન સેસઇરિયાપથકપ્પનં. સેસમેત્થ સુવિઞ્ઞેય્યમેવ.

પારિવાસિકક્ખન્ધકવણ્ણના નિટ્ઠિતા.