ભિક્ખુનીવિભઙ્ગો

૧૭૦. ભિક્ખૂનં પાટવત્થાય, વિનયસ્સ વિનિચ્છયે;

ભિક્ખુનીનં વિભઙ્ગોપિ, કિઞ્ચિમત્તં ભણામહં.

૧૭૧. અવસ્સુતસ્સ પોસસ્સ, ભિક્ખુનીપિ અવસ્સુતા;

નન્દન્તી કાયસંસગ્ગં, કતિ આપત્તિયો ફુસે;

૧૭૨. તિસ્સો આપત્તિયો ઉબ્ભ-જાણુસ્સાધક્ખકસ્સ ચ;

હોતિ પારાજિકં તસ્સા, ગહણં સાદિયન્તિયા.

૧૭૩. ઉબ્ભક્ખકં અધોજાણુ-ગહણં સાદિયન્તિયા;

થુલ્લચ્ચયં સિયા, કાય-પટિબદ્ધે તુ દુક્કટં.

૧૭૪. છાદેન્તી ભિક્ખુની વજ્જં, તિસ્સો આપત્તિયો ફુસે;

જાનં પારાજિકં ધમ્મં, છાદેન્તી સા પરાજિકા.

૧૭૫. થુલ્લચ્ચયં વેમતિકા, પટિચ્છાદેતિ ચે પન;

અથાચારવિપત્તિં ચે, પટિચ્છાદેતિ દુક્કટં.

૧૭૬. નિસ્સજ્જન્તી ન તં લદ્ધિં, ઉક્ખિત્તસ્સાનુવત્તિકા;

સમનુભાસનાયેવ, તિસ્સો આપત્તિયો ફુસે.

૧૭૭. ઞત્તિયા દુક્કટં, દ્વીહિ, કમ્મવાચાહિ થુલ્લતા;

કમ્મવાચાય ઓસાને, પારાજિકમુદીરિતં.

૧૭૮. પૂરેન્તી અટ્ઠમં વત્થું, તિસ્સો આપત્તિયો ફુસે;

પુરિસેનિધાગચ્છાતિ, વુત્તાગચ્છતિ દુક્કટં.

૧૭૯. થુલ્લચ્ચયં તુ પોસસ્સ, હત્થપાસપ્પવેસને;

પૂરેન્તી અટ્ઠમં વત્થું, સમણી સા પરાજિતા.

પારાજિકકથા.

૧૮૦. ઉસ્સયવાદિકા અટ્ટં, કરોન્તી તિવિધં ફુસે;

એકસ્સારોચને તસ્સા, હોતિ આપત્તિ દુક્કટં.

૧૮૧. દુતિયારોચને તસ્સા, થુલ્લચ્ચયમુદીરિતં;

અટ્ટસ્સ પરિયોસાને, હોતિ સઙ્ઘાદિસેસતા.

૧૮૨. ચોરિવુટ્ઠાપિકા વાપિ, ઞત્તિયા દુક્કટં ફુસે;

દ્વીહિ થુલ્લચ્ચયં કમ્મ-વાચોસાને ગરું સિયા.

૧૮૩. એકા ગામન્તરં ગચ્છે, ગમને દુક્કટં સિયા;

પરિક્ખેપે અતિક્કન્તે, પાદેન પઠમેન તુ.

૧૮૪. હોતિ થુલ્લચ્ચયાપત્તિ, તસ્સા સમણિયા પન;

દુતિયેન અતિક્કન્તે, ગરુકે પન તિટ્ઠતિ.

૧૮૫. ચતુત્થે દુતિયે વુત્ત-સદિસોવ વિનિચ્છયો;

આપત્તીનં પભેદે તુ, કાચિ નત્થિ વિસેસતા.

૧૮૬. અવસ્સુતા સયં હુત્વા, તાદિસસ્સેવ હત્થતો;

ગહેત્વા પન ભુઞ્જન્તી, ભોજનાદીસુ કિઞ્ચિપિ.

૧૮૭. ફુસે આપત્તિયો તિસ્સો, ભોજનાદીસુ કિઞ્ચિપિ;

પટિગ્ગણ્હન્તિયા તસ્સા, હોતિ થુલ્લચ્ચયં પન.

૧૮૮. અજ્ઝોહારેસુ સબ્બેસુ, હોતિ સઙ્ઘાદિસેસતા;

ઉદકં દન્તપોનં વા, પટિગ્ગણ્હાતિ દુક્કટં.

૧૮૯. ‘‘સહત્થેન ગહેત્વા ત્વં, ખાદ વા ભુઞ્જ વા’’તિપિ;

ઉય્યોજેન્તી પનેવં તુ, તિસ્સો આપત્તિયો ફુસે.

૧૯૦. દુક્કટં વચને તસ્સા, ‘‘ભુઞ્જિસ્સામી’’તિ ગણ્હતિ;

અજ્ઝોહારેસુ સબ્બેસુ, તસ્સા થુલ્લચ્ચયં સિયા.

૧૯૧. ભોજનસ્સ પનોસાને, હોતિ સઙ્ઘાદિસેસતા;

ઉય્યોજેતિ ચ યા તસ્સા, ઇમા તિસ્સોતિ દીપયે.

૧૯૨. સત્તમે અટ્ઠમે ચાપિ, નવમે દસમેપિ ચ;

ચોરિવુટ્ઠાપનેનેવ, સમાનોવ વિનિચ્છયો.

સઙ્ઘાદિસેસકથા.

૧૯૩. પત્તસન્નિચયં યિહ, કરોન્તી ભિક્ખુની પન;

એકં નિસ્સગ્ગિયંયેવ, ફુસે પાચિત્તિયં તુ સા.

૧૯૪. અકાલચીવરં કાલ-ચીવરં ભાજાપેન્તિયા;

પયોગે દુક્કટં વુત્તં, લાભે નિસ્સગ્ગિયં સિયા.

૧૯૫. ચીવરં પરિવત્તેત્વા, અચ્છિન્દતિ સચે પન;

પયોગે દુક્કટં, છિન્ને, તસ્સા નિસ્સગ્ગિયં સિયા.

૧૯૬. વિઞ્ઞાપેત્વાવ અઞ્ઞં ચે, વિઞ્ઞાપેતિ તતો પરં;

પયોગે દુક્કટં, વિઞ્ઞા-પિતે નિસ્સગ્ગિયં સિયા.

૧૯૭. ચેતાપેત્વા હિ અઞ્ઞં ચે, ચેતાપેતિ તતો પરં;

પયોગે દુક્કટં, ચેતા-પિતે નિસ્સગ્ગિયં સિયા.

૧૯૮. એવમેવ ચ સેસેસુ, છટ્ઠાદીસુ ચ સત્તસુ;

અનન્તરસમાનોવ, આપત્તીનં વિનિચ્છયો.

નિસ્સગ્ગિયકથા.

૧૯૯. લસુણં ખાદતિ દ્વે ચે, દુક્કટં ગહણે સિયા;

અજ્ઝોહારપયોગેસુ, પાચિત્તિ પરિયાપુતા.

૨૦૦. સંહરાપેન્તિયા લોમં, સમ્બાધે દ્વેવ હોન્તિ હિ;

પયોગે દુક્કટં વુત્તં, હોતિ પાચિત્તિ સંહટે.

૨૦૧. કરોન્તી તલઘાતં તુ, દ્વે પનાપત્તિયો ફુસે;

પયોગે દુક્કટં હોતિ, કતે પાચિત્તિયં સિયા.

૨૦૨. જતુના મટ્ઠકં કિઞ્ચિ, સાદિયન્તી દુવે ફુસે;

પયોગે દુક્કટાદિન્ને, તસ્સા પાચિત્તિયં સિયા.

૨૦૩. પઞ્ચમં તુ ચતુત્થેન, સમાનમિતિ દીપયે;

આપત્તીનં વિભાગસ્મિં, વિસેસો નત્થિ કોચિપિ.

૨૦૪. ભિક્ખુસ્સ ભુઞ્જમાનસ્સ, પાનીયેનુપતિટ્ઠતિ;

હત્થપાસે તુ પાચિત્તિ, હિત્વા તિટ્ઠતિ દુક્કટં.

૨૦૫. વિઞ્ઞાપેત્વામકં ધઞ્ઞં, ‘‘ભુઞ્જિસ્સામી’’તિ ગણ્હતિ;

દુક્કટં હોતિ પાચિત્તિ, અજ્ઝોહારેસુ દીપયે.

૨૦૬. ઉચ્ચારાદિં તિરોકુટ્ટે, છડ્ડેન્તી દ્વે ફુસે હવે;

પયોગે દુક્કટં વુત્તં, પાચિત્તિ છડ્ડિતે સિયા.

૨૦૭. ઉચ્ચારાદિચતુક્કં તુ, છડ્ડેતિ હરિતે સચે;

પયોગે દુક્કટં તસ્સા, પાચિત્તિ છડ્ડિતે સિયા.

૨૦૮. નચ્ચાદિં દસ્સનત્થાય, સચે ગચ્છતિ દુક્કટં;

પસ્સન્તિયાપિ પાચિત્તિ, તથેવ ચ સુણન્તિયા.

લસુણવગ્ગો પઠમો.

૨૦૯. પઠમે દુતિયે ચેવ, તતિયે ચ ચતુત્થકે;

તુલ્યો લસુણવગ્ગસ્સ, છટ્ઠેનિધ વિનિચ્છયો.

૨૧૦. કુલાનિ ઉપસઙ્કમ્મ, નિસીદિત્વા પનાસને;

સામિકે તુ અનાપુચ્છા, પક્કમન્તી દુવે ફુસે.

૨૧૧. પઠમેન ચ પાદેન, અનોવસ્સમતિક્કમે;

દુક્કટં હોતિ, પાચિત્તિ, દુતિયાતિક્કમે સિયા.

૨૧૨. સામિકે તુ અનાપુચ્છા, આસને ચે નિસીદતિ;

પયોગે દુક્કટં હોતિ, પાચિત્તિ ચ નિસીદિતે.

૨૧૩. છટ્ઠેન સત્તમં સબ્બં, સમાનં અટ્ઠમે પન;

પયોગે દુક્કટં, ઉજ્ઝા-પિતે પાચિત્તિયં સિયા.

૨૧૪. અત્તાનં ચાભિસપ્પેન્તી, દ્વે ફુસે નિરયાદિના;

પયોગે દુક્કટં વુત્તં, પાચિત્તિ અભિસપ્પિતે.

૨૧૫. વધિત્વા પન અત્તાનં, રોદન્તી તુ દુવે ફુસે;

વધતિ રોદતિ પાચિત્તિ, કરોતેકં તુ દુક્કટં.

રત્તન્ધકારવગ્ગો દુતિયો.

૨૧૬. નગ્ગા ન્હાયતિ દ્વે ચેવ, પયોગે દુક્કટં સિયા;

ન્હાનસ્સ પરિયોસાને, તસ્સા પાચિત્તિયં સિયા.

૨૧૭. કારાપેતિ પમાણાતિ-ક્કન્તં ઉદકસાટિકં;

પયોગે દુક્કટં, કારા-પિતે પાચિત્તિયં સિયા.

૨૧૮. ચીવરં તુ વિસિબ્બેત્વા, વિસિબ્બાપેત્વ વા પન;

નેવ સિબ્બન્તિયા વુત્ત-મેકં પાચિત્તિયં પન.

૨૧૯. પઞ્ચાહિકં તુ સઙ્ઘાટિ-ચારં પન અતિક્કમે;

એકાવસ્સા પનાપત્તિ, પાચિત્તિ પરિદીપિતા.

૨૨૦. સચે સઙ્કમનીયં તુ, ધારેતિ પન ચીવરં;

પયોગે દુક્કટં વુત્તં, પાચિત્તિ પન ધારિતે.

૨૨૧. ગણચીવરલાભસ્સ, અન્તરાયં કરોતિ ચે;

પયોગે દુક્કટં હોતિ, કતે પાચિત્તિયં સિયા.

૨૨૨. વિભઙ્ગં પટિબાહન્તી, ચીવરાનં તુ ધમ્મિકં;

પયોગે દુક્કટં વુત્તં, પાચિત્તિ પટિબાહિતે.

૨૨૩. અગારિકાદિનો દેતિ, સચે સમણચીવરં;

પયોગે દુક્કટં, દિન્ને, પાચિત્તિ પરિયાપુતા.

૨૨૪. ચીવરે દુબ્બલાસાય, કાલં ચે સમતિક્કમે;

પયોગે દુક્કટં વુત્તં, પાચિત્તિ સમતિક્કમે.

૨૨૫. ધમ્મિકં કથિનુદ્ધારં, પટિબાહન્તિયા દુવે;

પયોગે દુક્કટં હોતિ, પાચિત્તિ પટિબાહિતે.

ન્હાનવગ્ગો તતિયો.

૨૨૬. દુવે ભિક્ખુનિયો એક-મઞ્ચસ્મિં ચે તુવટ્ટેય્યું;

પયોગે દુક્કટં તાસં, નિપન્ને ઇતરં સિયા.

૨૨૭. દુતિયં પઠમેનેવ, સદિસં તતિયે પન;

પયોગે દુક્કટં હોતિ, કતે પાચિત્તિયં સિયા.

૨૨૮. નુપટ્ઠાપેન્તિયા વાપિ, દુક્ખિતં સહજીવિનિં;

એકાયેવ પનાપત્તિ, પાચિત્તિ પરિદીપિતા.

૨૨૯. સચે ઉપસ્સયં દત્વા, નિક્કડ્ઢતિ ચ ભિક્ખુનિં;

પયોગે દુક્કટં તસ્સા, હોતિ પાચિત્તિ કડ્ઢિતે.

૨૩૦. છટ્ઠે પન ચ સંસટ્ઠા, ઞત્તિયા દુક્કટં ફુસે;

કમ્મવાચાય ઓસાને, પાચિત્તિ પરિદીપિતા.

૨૩૧. અન્તોરટ્ઠે તુ સાસઙ્કે, ચારિકં તુ ચરન્તિયા;

પયોગે દુક્કટં વુત્તં, પટિપન્નાય સેસકં.

૨૩૨. અટ્ઠમં નવમઞ્ચેવ, સત્તમેન સમં મતં;

દસમે પન એકાવ, પાચિત્તિ પરિદીપિતા.

તુવટ્ટવગ્ગો ચતુત્થો.

૨૩૩. રાજાગારાદિકં સબ્બં, દસ્સનત્થાય ગચ્છતિ;

પયોગે દુક્કટં તસ્સા, પાચિત્તિ યદિ પસ્સતિ.

૨૩૪. આસન્દિં વાપિ પલ્લઙ્કં, પરિભુઞ્જન્તિયા દુવે;

પયોગે દુક્કટં વુત્તં, ભુત્તે પાચિત્તિયં સિયા.

૨૩૫. સુત્તં કન્તન્તિયા દ્વેવ, પયોગે દુક્કટં મતં;

ઉજ્જવુજ્જવને તસ્સા, પાચિત્તિ સમુદાહરે.

૨૩૬. વેય્યાવચ્ચં ગિહીનં તુ, દ્વેવ હોન્તિ કરોન્તિયા;

પયોગે દુક્કટં વુત્તં, કતે પાચિત્તિયં સિયા.

૨૩૭. પઞ્ચમે પન એકાવ, પાચિત્તિ પરિદીપિતા;

પયોગે દુક્કટં છટ્ઠે, દિન્ને પાચિત્તિયં સિયા.

૨૩૮. સત્તમં દુતિયેનેવ, સમાપત્તિપભેદતો;

અટ્ઠમં દુતિયે વગ્ગે, પઞ્ચમેન સમં મતં.

૨૩૯. તિરચ્છાનગતં વિજ્જં, દ્વેવ હોન્તિ પઠન્તિયા;

પયોગે દુક્કટં હોતિ, પાચિત્તિ હિ પદે પદે.

૨૪૦. દસમં નવમેનેવ, સમાનં સબ્બથા પન;

‘‘પરિયાપુણાતિ, વાચેતિ’’, પદમત્તં વિસેસકં.