મહાવગ્ગો

મહાખન્ધકકથા

પબ્બજ્જાકથા

૨૪૪૪. સીલક્ખન્ધાદિયુત્તેન, સુભક્ખન્ધેન દેસિતે;

ખન્ધકેપિ પવક્ખામિ, સમાસેન વિનિચ્છયં.

૨૪૪૫. માતરા અનનુઞ્ઞાતં, પિતરા વાપિ ભિક્ખુનો;

ભણ્ડુકમ્મમપુચ્છિત્વા, પબ્બાજેન્તસ્સ દુક્કટં.

૨૪૪૬. ઉદ્દેસપરિપુચ્છાય, સયં ચે બ્યાવટો સિયા;

દહરો આણાપેતબ્બો, પબ્બાજેત્વાનયાતિ ચ.

૨૪૪૭. ઉપજ્ઝાયમથુદ્દિસ્સ, અવુત્તો દહરો પન;

પબ્બાજેતિ સચે તં સો, સયમેવાપિ વટ્ટતિ.

૨૪૪૮. સામણેરોપિ વત્તબ્બો, દહરો નત્થિ તત્થ ચે;

‘‘ખણ્ડસીમમિમં નેત્વા, પબ્બાજેત્વાનયા’’તિ ચ.

૨૪૪૯. સરણાનિ પનેતસ્સ, દાતબ્બાનેવ અત્તના;

એવમ્પિ ભિક્ખુનાયેવ, હોતિ પબ્બાજિતો નરો.

૨૪૫૦. પુરિસં ભિક્ખુતો અઞ્ઞો, પબ્બાજેતિ ન વટ્ટતિ;

ઇત્થિં ભિક્ખુનિતો અઞ્ઞો, પબ્બાજેતિ ન વટ્ટતિ.

૨૪૫૧. સામણેરોપિ વા દાતું, સામણેરીપિ વા તથા;

આણત્તિયા ઉભિન્નમ્પિ, કાસાયાનિ લભન્તિ તે.

૨૪૫૨. સયમેવ ચ યં કિઞ્ચિ, પબ્બાજેન્તેન ભિક્ખુના;

કેસાપનયનં કત્વા, પઠમં ઉદકે પુન.

૨૪૫૩. ન્હાપેતબ્બો સિયા સુટ્ઠુ, ઘંસિત્વા ગોમયાદિના;

સરીરે પીળકા વાપિ, કચ્છુ વા તસ્સ હોન્તિ ચે.

૨૪૫૪. માતા યથા નિયંપુત્તં, ન જિગુચ્છતિ સબ્બસો;

ન્હાપેતબ્બોવ યતિના, તથેવ અજિગુચ્છતા.

૨૪૫૫. કસ્મા? પનેત્તકેનાપિ, ઉપકારેન સાસને;

સો સદા બલવસ્નેહો, હોતુપજ્ઝાયકાદિસુ.

૨૪૫૬. વિનોદેત્વા પનુપ્પન્નં, ઉક્કણ્ઠં કુલપુત્તકા;

સિક્ખાયો પરિપૂરેત્વા, નિબ્બાનં પાપુણન્તિ હિ.

૨૪૫૭. ગન્ધચુણ્ણેન વા પચ્છા, ચુણ્ણેનપિ હલિદ્દિયા;

સરીરં તસ્સ સીસઞ્ચ, ઉબ્બટ્ટેત્વા પુનપ્પુનં.

૨૪૫૮. ગિહિગન્ધં વિનોદેત્વા, કાસાયાનિ પનેકતો;

દ્વત્તિક્ખત્તું સકિં વાપિ, દાતબ્બાનિસ્સ ભિક્ખુના.

૨૪૫૯. અથ હત્થેપિ વા તસ્સ, અદત્વા સયમેવ તં;

અચ્છાદેતિ ઉપજ્ઝાયો, વટ્ટતાચરિયોપિ વા.

૨૪૬૦. નિવાસેતિ અનાણત્તો, સો પારુપતિ વા સયં;

અપનેત્વા તતો સબ્બં, પુન દાતબ્બમેવ તં.

૨૪૬૧. ભિક્ખુના તુ સહત્થેન, તથા આણત્તિયાપિ વા;

દિન્નં વટ્ટતિ કાસાવં, નાદિન્નં પન વટ્ટતિ.

૨૪૬૨. તસ્સેવ સન્તકં વાપિ, કા કથા અત્તસન્તકે;

વન્દાપેત્વા તત્થ ભિક્ખૂ, કારાપેત્વાન ઉક્કુટિં.

૨૪૬૩. અઞ્જલિં પગ્ગહાપેત્વા, દાતબ્બં સરણત્તયં;

પટિપાટિવસેનેવ, ન ચ ઉપ્પટિપાટિયા.

૨૪૬૪. સચે એકપદં વાપિ, દેતિ એકક્ખરમ્પિ વા;

પટિપાટિં વિરજ્ઝિત્વા, ગહિતં ચે ન વટ્ટતિ.

૨૪૬૫. તિક્ખત્તું યદિ વા દેતિ, બુદ્ધં સરણમેવ વા;

તથા સેસેસુ ચેવમ્પિ, ન દિન્નાનેવ હોન્તિ હિ.

૨૪૬૬. કત્વાનુનાસિકન્તાનિ, એકાબદ્ધાનિ વા પન;

વિચ્છિન્દિત્વાથ મ-ન્તાનિ, દાતબ્બાનિ વિજાનતા.

૨૪૬૭. ઉપસમ્પદકમ્મં તુ, એકતોસુદ્ધિયા સિયા;

ન હોતિ પન પબ્બજ્જા, ઉભતોસુદ્ધિયા વિના.

૨૪૬૮. તસ્મા આચરિયેનાપિ, તથાન્તેવાસિકેનપિ;

બુ-દ્ધ-કારાદયો વણ્ણા, ઠાનકરણસમ્પદં.

૨૪૬૯. અહાપેન્તેન વત્તબ્બા, પબ્બજ્જાગુણમિચ્છતા;

એકવણ્ણવિનાસેન, પબ્બજ્જા હિ ન રૂહતિ.

૨૪૭૦. યદિ સિદ્ધાપિ પબ્બજ્જા, સરણાગમનતોવ હિ;

દાતબ્બા દસ સીલાનિ, પૂરણત્થાય ભિક્ખુના.

પબ્બજ્જાકથા.

૨૪૭૧. ઉપજ્ઝાયમથાચરિયં, નિસ્સાય વસતા પન;

કત્તબ્બાનેવ વત્તાનિ, પિયસીલેન ભિક્ખુના.

૨૪૭૨. આસનં પઞ્ઞપેતબ્બં, દન્તકટ્ઠં મુખોદકં;

દાતબ્બં તસ્સ કાલેન, સચે યાગુ ભવિસ્સતિ.

૨૪૭૩. યાગુ તસ્સુપનેતબ્બા, સઙ્ઘતો કુલતોપિ વા;

પત્તે વત્તઞ્ચ કાતબ્બં, વત્તં ગામપ્પવેસને.

૨૪૭૪. ચીવરે યાનિ વત્તાનિ, વુત્તાનિ હિ મહેસિના;

સેનાસને તથા પાદ-પીઠકથલિકાદિસુ.

૨૪૭૫. એવમાદીનિ વત્તાનિ, સબ્બાનિ પન રોગતો;

વુટ્ઠાનાગમનન્તાનિ, સત્તતિંસસતં સિયું.

૨૪૭૬. વત્તભેદેન સબ્બત્થ, દુક્કટં તુ પકાસિતં;

અનાદરવસેનેવ, અકરોન્તસ્સ ભિક્ખુનો.

ઉપજ્ઝાયાચરિયવત્તકથા.

૨૪૭૭. ઉપજ્ઝાયસ્સ વત્તાનિ, તથા સદ્ધિવિહારિકે;

સતં તેરસ હોન્તેવ, તથાન્તેવાસિકેપિ ચ.

સદ્ધિવિહારિકન્તેવાસિકવત્તકથા.

૨૪૭૮. પક્કન્તે વાપિ વિબ્ભન્તે, પક્ખસઙ્કન્તકે મતે;

આણત્તિયા ઉપજ્ઝાયા, પસ્સમ્ભતિ ચ નિસ્સયો.

૨૪૭૯. હોતિ આચરિયમ્હાપિ, છધા નિસ્સયભેદનં;

પક્કન્તે વાપિ વિબ્ભન્તે, પક્ખસઙ્કન્તકે મતે.

૨૪૮૦. આણત્તિયં ઉભિન્નમ્પિ, ધુરનિક્ખેપનેપિ ચ;

એકેકસ્સ ઉભિન્નં વા, નાલયે સતિ ભિજ્જતિ.

૨૪૮૧. ઉપજ્ઝાયસમોધાન-ગતસ્સાપિ ચ ભિજ્જતિ;

દસ્સનં સવનઞ્ચાતિ, સમોધાનં દ્વિધા મતં.

૨૪૮૨. અદ્ધિકસ્સ ગિલાનસ્સ, ગિલાનુપટ્ઠકસ્સ ચ;

યાચિતસ્સ ન દોસોવ, વસિતું નિસ્સયં વિના.

૨૪૮૩. જાનતા અત્તનો ચેવ, વને ફાસુવિહારતં;

સભાગે દાયકેસન્તે, વસિતુમ્પિ ચ વટ્ટતિ.

નિસ્સયપટિપ્પસ્સમ્ભનકથા.

૨૪૮૪. કુટ્ઠિં ગણ્ડિં કિલાસિઞ્ચ, સોસિઞ્ચ અપમારિકં;

તથા રાજભટં ચોરં, લિખિતં કારભેદકં.

૨૪૮૫. કસાહતં નરઞ્ચેવ, પુરિસં લક્ખણાહતં;

ઇણાયિકઞ્ચ દાસઞ્ચ, પબ્બાજેન્તસ્સ દુક્કટં.

૨૪૮૬. હત્થચ્છિન્નમળચ્છિન્નં, પાદચ્છિન્નઞ્ચ પુગ્ગલં;

કણ્ણનાસઙ્ગુલિચ્છિન્નં, કણ્ડરચ્છિન્નમેવ ચ.

૨૪૮૭. કાણં કુણિઞ્ચ ખુજ્જઞ્ચ, વામનં ફણહત્થકં;

ખઞ્જં પક્ખહતઞ્ચેવ, સીપદિં પાપરોગિનં.

૨૪૮૮. જરાય દુબ્બલં અન્ધં, બધિરઞ્ચેવ મમ્મનં;

પીઠસપ્પિં તથા મૂગં, પબ્બાજેન્તસ્સ દુક્કટં.

૨૪૮૯. અતિદીઘોતિરસ્સો વા, અતિકાલોપિ વા તથા;

અચ્ચોદાતોપિ વા મટ્ઠ-તમ્બલોહનિદસ્સનો.

૨૪૯૦. અતિથૂલો અતિકિસ્સો, મહાસીસોપિ વા તથા;

અતિખુદ્દકસીસેન, સહિતેન યુત્તોપિ વા.

૨૪૯૧. કુટકુટકસીસો વા, તથા સિખરસીસકો;

વેળુનાળિસમાનેન, સીસેન ચ યુતો નરો.

૨૪૯૨. કપ્પસીસોપિ પબ્ભાર-સીસો વા વણસીસકો;

તથા કણ્ણિકકેસો વા, થૂલકેસોપિ વા તથા.

૨૪૯૩. પૂતિનિલ્લોમસીસો વા, જાતિપણ્ડરકેસકો;

જાતિયા તમ્બકેસો વા, તથેવાવટ્ટસીસકો.

૨૪૯૪. સીસલોમેકબદ્ધેહિ, ભમુકેહિ યુતોપિ વા;

સમ્બદ્ધભમુકો વાપિ, નિલ્લોમભમુકોપિ વા.

૨૪૯૫. મહન્તખુદ્દનેત્તો વા, તથા વિસમલોચનો;

કેકરો વાપિ ગમ્ભીર-નેત્તો વિસમચક્કલો.

૨૪૯૬. જતુમૂસિકકણ્ણો વા, હત્થિકણ્ણોપિ વા પન;

છિદ્દમત્તકકણ્ણો વા, તથેવાવિદ્ધકણ્ણકો.

૨૪૯૭. તથા ટઙ્કિતકણ્ણો વા, પૂતિકણ્ણોપિ વા પન;

યોનકાદિપ્પભેદોપિ, નાયં પરિસદૂસકો.

૨૪૯૮. અતિપિઙ્ગલનેત્તો વા, તથા નિપ્પખુમક્ખિ વા;

અસ્સુપગ્ઘરનેત્તો વા, પક્કપુપ્ફિતલોચનો.

૨૪૯૯. તથેવ ચ મહાનાસો, અતિખુદ્દકનાસિકો;

તથા ચિપિટનાસો વા, નરો કુટિલનાસિકો.

૨૫૦૦. નિચ્ચવિસ્સવનાસો વા, યો વા પન મહામુખો;

વઙ્કભિન્નમુખો વાપિ, મહાઓટ્ઠોપિ વા પન.

૨૫૦૧. તથા તનુકઓટ્ઠો વા, વિપુલુત્તરઓટ્ઠકો;

ઓટ્ઠછિન્નોપિ ઉપ્પક્ક-મુખો એળમુખોપિ વા.

૨૫૦૨. સઙ્ખતુણ્ડોપિ દુગ્ગન્ધ-મુખો વા પન પુગ્ગલો;

મહાદન્તોપિ અચ્ચન્તં, તથા અસુરદન્તકો.

૨૫૦૩. હેટ્ઠા ઉપરિતો વાપિ, બહિનિક્ખન્તદન્તકો;

અદન્તો પૂતિદન્તો વા, અતિખુદ્દકદન્તકો.

૨૫૦૪. યસ્સ દન્તન્તરે દન્તો, કાળકદન્તસન્નિભો;

સુખુમોવ ઠિતો, તં ચે, પબ્બાજેતુમ્પિ વટ્ટતિ.

૨૫૦૫. યો મહાહનુકો પોસો;

દીઘેન હનુના યુતો;

ચિપિટહનુકો વાપિ;

રસ્સેન હનુના યુતો.

૨૫૦૬. નિમ્મસ્સુદાઠિકો વાપિ, અતિદીઘગલોપિ વા;

અતિરસ્સગલોપિ વા, ભિન્નગણ્ઠિગલોપિ વા.

૨૫૦૭. તથા ભટ્ઠંસકૂટો વા, ભિન્નપિટ્ઠિઉરોપિ વા;

સુદીઘરસ્સહત્થો વા, કચ્છુકણ્ડુસમાયુતો.

૨૫૦૮. મહાનિસદમંસો વા, ઉદ્ધનગ્ગુપમાયુતો;

વાતણ્ડિકો મહાઊરુ, સઙ્ઘટ્ટનકજાણુકો.

૨૫૦૯. ભિન્નજાણુ મહાજાણુ, દીઘજઙ્ઘો વિજઙ્ઘકો;

વિકટો વાપિ પણ્હો વા, તથા ઉબ્બદ્ધપિણ્ડિકો.

૨૫૧૦. યટ્ઠિજઙ્ઘો મહાજઙ્ઘો, મહાપાદોપિ યો નરો;

તથા પિટ્ઠિકપાદો વા, મહાપણ્હિપિ વા પન.

૨૫૧૧. વઙ્કપાદો નરો યો વા, ગણ્ઠિકઙ્ગુલિકોપિ વા;

યો પનન્ધનખો વાપિ, કાળપૂતિનખોપિ ચ.

૨૫૧૨. ઇચ્ચેવમાદિકં કઞ્ચિ, નરં પરિસદૂસકં;

પબ્બાજેન્તસ્સ ભિક્ખુસ્સ, હોતિ આપત્તિ દુક્કટં.

પરિસદૂસકકથા.

૨૫૧૩. ‘‘સામણેરજ્જ મા ખાદ, મા ભુઞ્જ ચ પિવા’’તિ ચ;

નિવારેન્તસ્સ આહારં, હોતિ આપત્તિ દુક્કટં.