ચૂળવગ્ગો

પારિવાસિકક્ખન્ધકકથા

૨૭૪૮. તજ્જનીયં નિયસ્સઞ્ચ, પબ્બાજં પટિસારણં;

તિવિધુક્ખેપનઞ્ચાતિ, સત્ત કમ્માનિ દીપયે.

૨૭૪૯. તેચત્તાલીસ વત્તાનિ, ખન્ધકે કમ્મસઞ્ઞિતે;

નવાધિકાનિ તિંસેવ, ખન્ધકે તદનન્તરે.

૨૭૫૦. એવં સબ્બાનિ વત્તાનિ, દ્વાસીતેવ મહેસિના;

હોન્તિ ખન્ધકવત્તાનિ, ગહિતાગહણેન તુ.

૨૭૫૧. પારિવાસઞ્ચ વત્તઞ્ચ, સમાદિન્નસ્સ ભિક્ખુનો;

રત્તિચ્છેદો કથં વુત્તો, વત્તભેદો કથં ભવે?

૨૭૫૨. સહવાસો વિનાવાસો, અનારોચનમેવ ચ;

પારિવાસિકભિક્ખુસ્સ, રત્તિચ્છેદો ચ દુક્કટં.

૨૭૫૩. એકચ્છન્ને પનાવાસે, પકતત્તેન ભિક્ખુના;

નિવાસો દકપાતેન, ઉક્ખિત્તસ્સ નિવારિતો.

૨૭૫૪. પારિવાસિકભિક્ખુસ્સ, અન્તોયેવ ન લબ્ભતિ;

ઇચ્ચેવં પન નિદ્દિટ્ઠં, મહાપચ્ચરિયં પન.

૨૭૫૫. ‘‘અવિસેસેન નિદ્દિટ્ઠં, મહાઅટ્ઠકથાદિસુ;

ઉભિન્નં દકપાતેન, નિવાસો વારિતો’’તિ હિ.

૨૭૫૬. અભિક્ખુકે પનાવાસે, અનાવાસેપિ કત્થચિ;

વિપ્પવાસં વસન્તસ્સ, રત્તિચ્છેદો ચ દુક્કટં.

૨૭૫૭. પારિવાસિકભિક્ખુસ્સ, ભિક્ખું દિસ્વાન તઙ્ખણે;

નારોચેન્તસ્સ ચેતસ્સ, રત્તિચ્છેદો ચ દુક્કટં.

૨૭૫૮. પઞ્ચેવ ચ યથાવુડ્ઢં, લભતે પારિવાસિકો;

કાતું તત્થેવ ચ ઠત્વા, ઉપોસથપવારણં.

૨૭૫૯. વસ્સસાટિં યથાવુડ્ઢં, દેન્તિ ચે સઙ્ઘદાયકા;

ઓણોજનં તથા ભત્તં, લભતે પઞ્ચિમે પન.

પારિવાસિકક્ખન્ધકકથા.

સમથક્ખન્ધકકથા

૨૭૬૦. વિવાદાધારતા ચાનુ-વાદાધિકરણમ્પિ ચ;

આપત્તાધારતા ચેવ, કિચ્ચાધિકરણમ્પિ ચ.

૨૭૬૧. એતાનિ પન ચત્તારિ, વુત્તાનિ ચ મહેસિના;

ભેદકારકવત્થૂનિ, વિવાદો તત્થ નિસ્સિતો.

૨૭૬૨. વિપત્તિયો ચતસ્સોવ, અનુવાદો ઉપાગતો;

આપત્તાધારતા નામ, સત્ત આપત્તિયો મતા.

૨૭૬૩. સઙ્ઘકિચ્ચાનિ નિસ્સાય, કિચ્ચાધિકરણં સિયા;

એતેસં તુ ચતુન્નમ્પિ, સમત્તા સમથા મતા.

૨૭૬૪. સમ્મુખા સતિ ચામૂળ્હો, પટિઞ્ઞાવિનયોપિ ચ;

તસ્સપાપિયસી ચેવ, તથા યેભુય્યસીપિ ચ.

૨૭૬૫. તિણવત્થારકો ચેવ, સત્તમો વિનયો મતો;

સત્તિમે સમથા વુત્તા, બુદ્ધેનાદિચ્ચબન્ધુના.

૨૭૬૬. વિવાદો સમ્મતિ દ્વીહિ, અનુવાદો ચતૂહિ ચ;

આપત્તિ પન તીહેવ, કિચ્ચમેકેન સમ્મતિ.

૨૭૬૭. છટ્ઠેન પઠમેનાપિ, વિવાદો એત્થ સમ્મતિ;

સમ્મુખાવિનયાદીહિ, અનુપુબ્બેન તીહિપિ.

૨૭૬૮. તથેવ પઞ્ચમેનાપિ, અનુવાદો હિ સમ્મતિ;

સમ્મુખેન પટિઞ્ઞાય, તિણવત્થારકેન ચ.

૨૭૬૯. આપત્તૂપસમં યાતિ, તીહેવ સમથેહિ સા;

સમ્મુખાવિનયેનેવ, કિચ્ચમેકેન સમ્મતિ.

૨૭૭૦. યેભુય્યસિકકમ્મે તુ, સલાકં ગાહયે બુધો;

ગૂળ્હેન વિવટેનાપિ, કણ્ણજપ્પેન વા પન.

૨૭૭૧. અલજ્જુસ્સદે ગૂળ્હેન, વિવટેનેવ લજ્જિસુ;

બાલેસુ કણ્ણજપ્પેન, સલાકં ગાહયે બુધો.

૨૭૭૨. લજ્જી અલજ્જી બાલોતિ, કેન સક્કા વિજાનિતું?

સકેન કમ્મુનાયેવ, તેન સક્કા વિજાનિતું.

૨૭૭૩. આપજ્જતિ ચ સઞ્ચિચ્ચ, આપત્તિં પરિગૂહતિ;

છન્દાદિઅગતિં યાતિ, અલજ્જી એદિસો સિયા.

૨૭૭૪. નાપજ્જતિ ચ સઞ્ચિચ્ચ, આપત્તિં ન ચ ગૂહતિ;

ન ગચ્છતિગતિઞ્ચાપિ, એદિસો લજ્જિ પુગ્ગલો.

૨૭૭૫. દુચ્ચિન્તિતો ચ દુબ્ભાસી, તથા દુક્કટકારિકો;

એદિસો પન ‘‘બાલો’’તિ, લક્ખણેનેવ ઞાયતિ.

૨૭૭૬. તિધા સલાકગાહેન, બહુકા ધમ્મવાદિનો;

યેભુય્યસિકકમ્મેન, કત્તબ્બન્તિ જિનોબ્રવિ.

૨૭૭૭. અલજ્જી સાનુવાદો ચ, અસુચી કમ્મતો ચ યો;

તસ્સપાપિયસીકમ્મ-યોગ્ગો સો હોતિ પુગ્ગલો.

૨૭૭૮. ભણ્ડને કલહે જાતે, વિવાદસ્મિં અનપ્પકે;

બહુઅસ્સામણે ચિણ્ણે, અનગ્ગેપિ ચ ભસ્સકે.

૨૭૭૯. મૂલમૂલં ગવેસન્તં, હોતિ વાળઞ્ચ કક્ખળં;

તિણવત્થારકેનેવ, કાતબ્બન્તિ પકાસિતં.

૨૭૮૦. યથા ચ તિણપણ્ણેન, છન્નં ગૂથઞ્ચ મુત્તકં;

ન ચ વાયતિ દુગ્ગન્ધં, વૂપસમ્મતિ તઙ્ખણે.

૨૭૮૧. ઠપેત્વા થુલ્લવજ્જઞ્ચ, ગિહીહિ પટિસંયુતં;

દિટ્ઠાવિકમ્મિકઞ્ચેવ, યો ચ તત્થ ન હોતિ તં.

૨૭૮૨. સેસાયાપત્તિયા યાવ, ઉપસમ્પદમાળતો;

સુદ્ધો હોતિ નિરાપત્તિ, તિણવત્થારકે તથા.

સમથક્ખન્ધકકથા.

ખુદ્દકવત્થુક્ખન્ધકકથા

૨૭૮૩. રુક્ખે વા પન કુટ્ટેવા, અટ્ટાને થમ્ભકેસુ વા;

ન્હાયમાનો સકં કાયં, ઉગ્ઘંસેય્યસ્સ દુક્કટં.

૨૭૮૪. કાયં ગન્ધબ્બહત્થેન, કુરુવિન્દકસુત્તિયા;

મલ્લકેન ન ઘંસેય્ય, નાઞ્ઞમઞ્ઞઞ્ચ કાયતો.

૨૭૮૫. અકતં મલ્લકં નામ, ગિલાનસ્સેવ વટ્ટતિ;

કતં તં મલ્લકં નામ, સબ્બેસમ્પિ ન વટ્ટતિ.

૨૭૮૬. કપાલિટ્ઠકખણ્ડાનિ, સબ્બસ્સ પુથુપાણિકં;

ગિલાનસ્સાગિલાનસ્સ, વત્થવટ્ટિ ચ વટ્ટતિ.

૨૭૮૭. વુત્તા ફેણકપાસાણ-કથલા પાદઘંસને;

વટ્ટં વા ચતુરસ્સં વા, કતકં ન ચ વટ્ટતિ.

૨૭૮૮. યં કિઞ્ચિપિ અલઙ્કારં, ધારેન્તસ્સપિ દુક્કટં;

હોતિ અન્તમસો તાલ-પણ્ણમત્તમ્પિ ભિક્ખુનો.

૨૭૮૯. ઓસણ્હેય્ય સકે કેસે, યો હત્થફણકેન વા;

ફણકેનપિ કોચ્છેન, દુક્કટં તસ્સ નિદ્દિસે.

૨૭૯૦. સિત્થતેલોદતેલેહિ, મણ્ડનત્થં ન વટ્ટતિ;

અનુલોમનિપાતત્થં, ઉદ્ધંલોમેન ભિક્ખુના.

૨૭૯૧. હત્થં તેલેન તેમેત્વા, પુઞ્છિતબ્બા સિરોરુહા;

વટ્ટતુણ્હાભિતત્તસ્સ, અલ્લહત્થેન પુઞ્છિતું.

૨૭૯૨. આદાસે ઉદપત્તે વા, યત્થ કત્થચિ અત્તનો;

મુખબિમ્બં વિના હેતું, ઓલોકેન્તસ્સ દુક્કટં.

૨૭૯૩. ‘‘સઞ્છવિં તુ મુખં, નો’’તિ, દટ્ઠુમાબાધપચ્ચયા;

‘‘જિણ્ણો નો’’તાયુસઙ્ખાર-જાનનત્થઞ્ચ વટ્ટતિ.

૨૭૯૪. નચ્ચં વા પન ગીતં વા, વાદિતં વાપિ ભિક્ખુનો;

દટ્ઠું વા પન સોતું વા, ગચ્છતો હોતિ દુક્કટં.

૨૭૯૫. દટ્ઠુમન્તમસો મોર-નચ્ચમ્પિ ચ ન વટ્ટતિ;

સોતુમન્તમસો દન્ત-ગીતમ્પિ ચ ન વટ્ટતિ.

૨૭૯૬. નચ્ચન્તસ્સ સયં વાપિ, નચ્ચાપેન્તસ્સ દુક્કટં;

અનાપત્તન્તરારામે, ઠત્વા સુણાતિ પસ્સતિ.

૨૭૯૭. ‘‘પસ્સિસ્સામી’’તિ નચ્ચં વા, ગીતં વા પન વાદિતં;

વિહારતો વિહારં વા, ગચ્છતો હોતિ દુક્કટં.

૨૭૯૮. આપત્તન્તોવિહારેપિ, ઉટ્ઠહિત્વાન ગચ્છતો;

ઠત્વા ગીવં પસારેત્વા, પસ્સતોપિ ચ વીથિયં.

૨૭૯૯. કેસા દીઘા ન ધારેય્યા, યો ધારેય્યસ્સ દુક્કટં;

દ્વઙ્ગુલં વા દુમાસં વા, તતો ઉદ્ધં ન વટ્ટતિ.

૨૮૦૦. નખે નાસિકલોમાનિ, દીઘાનિ ન તુ ધારયે;

ન ચ વીસતિમટ્ઠં વા, કાતું વટ્ટતિ ભિક્ખુનો.

૨૮૦૧. કપ્પાપેય્ય વિસું મસ્સું, દાઠિકં વા ઠપેય્ય યો;

સંહરાપેય્ય વા લોમં, સમ્બાધે તસ્સ દુક્કટં.

૨૮૦૨. છિન્દતો દુક્કટં વુત્તં, કેસે કત્તરિકાય વા;

અગિલાનસ્સ અઞ્ઞેન, છિન્દાપેન્તસ્સ વા તથા.

૨૮૦૩. છિન્દતો અત્તનો અઙ્ગ-જાતં થુલ્લચ્ચયં સિયા;

સેસઙ્ગછેદને અત્ત-વધે આપત્તિ દુક્કટં.

૨૮૦૪. અહિકીટાદિદટ્ઠસ્સ, તાદિસાબાધપચ્ચયા;

ન દોસો છિન્દતો અઙ્ગં, મોચેન્તસ્સ ચ લોહિતં.

૨૮૦૫. અપરિસ્સાવનો મગ્ગં, સચે ગચ્છતિ દુક્કટં;

યાચમાનસ્સ વા મગ્ગે, તથેવાદદતોપિ તં.

૨૮૦૬. ન ભુઞ્જે ન પિવે નગ્ગો, ન ખાદે ન ચ સાયયે;

ન દદે ન ચ ગણ્હેય્ય, ન ગચ્છેય્યપિ અઞ્જસં.

૨૮૦૭. વન્દિતબ્બં ન નગ્ગેન, વન્દાપેતબ્બમેવ વા;

પરિકમ્મં ન કાતબ્બં, ન નગ્ગેન ચ કારયે.

૨૮૦૮. પરિકમ્મે પટિચ્છાદી, તિસ્સો જન્તાઘરાદિકા;

વુત્તા, વત્થપટિચ્છાદી, સબ્બત્થ પન વટ્ટતિ.

૨૮૦૯. યત્થ કત્થચિ પેળાયં, ભુઞ્જિતું ન ચ વટ્ટતિ;

એકતો ભુઞ્જતો હોતિ, દુક્કટં એકભાજને.

૨૮૧૦. એકપાવુરણા એક-ત્થરણા વા નિપજ્જરે;

એકમઞ્ચેપિ વા તેસં, હોતિ આપત્તિ દુક્કટં.

૨૮૧૧. ન નિસીદેય્ય સઙ્ઘાટિ-પલ્લત્થિકમુપાગતો;

કિઞ્ચિ કીળં ન કીળેય્ય, પલિતં ન ચ ગાહયે.

૨૮૧૨. ભમુકાય નલાટે વા, દાઠિકાયપિ ઉગ્ગતં;

તાદિસં પલિતં ચઞ્ઞં, ગાહાપેતુમ્પિ વટ્ટતિ.

૨૮૧૩. અગિલાનો સચે ભિક્ખુ, છત્તં ધારેય્ય દુક્કટં;

અત્તનો ચીવરાદીનં, ગુત્તત્થં પન વટ્ટતિ.

૨૮૧૪. હત્થિસોણ્ડં ચતુક્કણ્ણં, વસનં મચ્છવાળકં;

વેલ્લિયં તાલવણ્ટઞ્ચ, નિવાસેન્તસ્સ દુક્કટં.

૨૮૧૫. ગહિપારુપનં વાપિ, પારુપન્તસ્સ દુક્કટં;

નિવાસને પારુપને, પરિમણ્ડલતા મતા.

૨૮૧૬. લોકાયતં ન વાચેય્ય, ન ચ તં પરિયાપુણે;

ન તિરચ્છાનવિજ્જા વા, વાચેતબ્બાવ ભિક્ખુના.

૨૮૧૭. ન ચ વટ્ટતિ ધારેતું, સબ્બા ચામરિબીજની;

ન ચાલિમ્પેય્ય દાયં વા, ન ચ લઞ્જે મુખમ્પિ ચ.

૨૮૧૮. ન વહે ઉભતોકાજં, વટ્ટતન્તરકાજકં;

સીસક્ખન્ધકટોલમ્બ-ભારે દોસો ન વિજ્જતિ.

૨૮૧૯. અટ્ઠઙ્ગુલાદિકં ભિક્ખુ, પચ્છિમં ચતુરઙ્ગુલા;

ખાદતો દન્તકટ્ઠઞ્ચ, હોતિ આપત્તિ દુક્કટં.