ભિક્ખુનીવિભઙ્ગો

૧૯૬૪. ભિક્ખુનીનં હિતત્થાય, વિભઙ્ગં યં જિનોબ્રવિ;

તસ્મિં અપિ સમાસેન, કિઞ્ચિમત્તં ભણામહં.

પારાજિકકથા

૧૯૬૫. છન્દસો મેથુનં ધમ્મં, પટિસેવેય્ય યા પન;

હોતિ પારાજિકા નામ, સમણી સા પવુચ્ચતિ.

૧૯૬૬. મનુસ્સપુરિસાદીનં, નવન્નં યસ્સ કસ્સચિ;

સજીવસ્સાપ્યજીવસ્સ, સન્થતં વા અસન્થતં.

૧૯૬૭. અત્તનો તિવિધે મગ્ગે, યેભુય્યક્ખાયિતાદિકં;

અઙ્ગજાતં પવેસેન્તી, અલ્લોકાસે પરાજિતા.

૧૯૬૮. ઇતો પરમવત્વાવ, સાધારણવિનિચ્છયં;

અસાધારણમેવાહં, ભણિસ્સામિ સમાસતો.

૧૯૬૯. અધક્ખકં સરીરકં, યદુબ્ભજાણુમણ્ડલં;

સરીરકેન ચે તેન, ફુસેય્ય ભિક્ખુની પન.

૧૯૭૦. અવસ્સુતસ્સાવસ્સુતા, મનુસ્સપુગ્ગલસ્સ યા;

સરીરમસ્સ તેન વા, ફુટ્ઠા પારાજિકા સિયા.

૧૯૭૧. કપ્પરસ્સ પનુદ્ધમ્પિ, ગહિતં ઉબ્ભજાણુના;

યથાવુત્તપ્પકારેન, કાયેનાનેન અત્તનો.

૧૯૭૨. પુરિસસ્સ તથા કાય- પટિબદ્ધં ફુસન્તિયા;

તથા યથાપરિચ્છિન્ન- કાયબદ્ધેન અત્તનો.

૧૯૭૩. અવસેસેન વા તસ્સ, કાયં કાયેન અત્તનો;

હોતિ થુલ્લચ્ચયં તસ્સા, પયોગે પુરિસસ્સ ચ.

૧૯૭૪. યક્ખપેતતિરચ્છાન- પણ્ડકાનં અધક્ખકં;

ઉબ્ભજાણું તથેવસ્સા, ઉભતોવસ્સવે સતિ.

૧૯૭૫. એકતોવસ્સવે ચાપિ, થુલ્લચ્ચયમુદીરિતં;

અવસેસે ચ સબ્બત્થ, હોતિ આપત્તિ દુક્કટં.

૧૯૭૬. ઉબ્ભક્ખકમધોજાણુ-મણ્ડલં પન યં ઇધ;

કપ્પરસ્સ ચ હેટ્ઠાપિ, ગતં એત્થેવ સઙ્ગહં.

૧૯૭૭. કેલાયતિ સચે ભિક્ખુ, સદ્ધિં ભિક્ખુનિયા પન;

ઉભિન્નં કાયસંસગ્ગ-રાગે સતિ હિ ભિક્ખુનો.

૧૯૭૮. હોતિ સઙ્ઘાદિસેસોવ, નાસો ભિક્ખુનિયા સિયા;

કાયસંસગ્ગરાગો ચ, સચે ભિક્ખુનિયા સિયા.

૧૯૭૯. ભિક્ખુનો મેથુનો રાગો, ગેહપેમમ્પિ વા ભવે;

તસ્સા થુલ્લચ્ચયં વુત્તં, ભિક્ખુનો હોતિ દુક્કટં.

૧૯૮૦. ઉભિન્નં મેથુને રાગે, ગેહપેમેપિ વા સતિ;

અવિસેસેન નિદ્દિટ્ઠં, ઉભિન્નં દુક્કટં પન.

૧૯૮૧. યસ્સ યત્થ મનોસુદ્ધં, તસ્સ તત્થ ન દોસતા;

ઉભિન્નમ્પિ અનાપત્તિ, ઉભિન્નં ચિત્તસુદ્ધિયા.

૧૯૮૨. કાયસંસગ્ગરાગેન, ભિન્દિત્વા પઠમં પન;

પચ્છા દૂસેતિ ચે નેવ, હોતિ ભિક્ખુનિદૂસકો.

૧૯૮૩. અથ ભિક્ખુનિયા ફુટ્ઠો, સાદિયન્તોવ ચેતસા;

નિચ્ચલો હોતિ ચે ભિક્ખુ, ન હોતાપત્તિ ભિક્ખુનો.

૧૯૮૪. ભિક્ખુની ભિક્ખુના ફુટ્ઠા, સચે હોતિપિ નિચ્ચલા;

અધિવાસેતિ સમ્ફસ્સં, તસ્સા પારાજિકં સિયા.

૧૯૮૫. તથા થુલ્લચ્ચયં ખેત્તે, દુક્કટઞ્ચ વિનિદ્દિસે;

વુત્તત્તા ‘‘કાયસંસગ્ગં, સાદિયેય્યા’’તિ સત્થુના.

૧૯૮૬. તસ્સા ક્રિયસમુટ્ઠાનં, એવં સતિ ન દિસ્સતિ;

ઇદં તબ્બહુલેનેવ, નયેન પરિદીપિતં.

૧૯૮૭. અનાપત્તિ અસઞ્ચિચ્ચ, અજાનિત્વામસન્તિયા;

સતિ આમસને તસ્સા, ફસ્સં વાસાદિયન્તિયા.

૧૯૮૮. વેદનટ્ટાય વા ખિત્ત-ચિત્તાયુમ્મત્તિકાય વા;

સમુટ્ઠાનાદયો તુલ્યા, પઠમન્તિમવત્થુના.

ઉબ્ભજાણુમણ્ડલકથા.

૧૯૮૯. પારાજિકત્તં જાનન્તિ, સલિઙ્ગે તુ ઠિતાય હિ;

‘‘ન કસ્સચિ પરસ્સાહં, આરોચેસ્સામિ દાનિ’’તિ.

૧૯૯૦. ધુરે નિક્ખિત્તમત્તસ્મિં, સા ચ પારાજિકા સિયા;

અયં વજ્જપટિચ્છાદિ- નામિકા પન નામતો.

૧૯૯૧. સેસં સપ્પાણવગ્ગસ્મિં, દુટ્ઠુલ્લેન સમં નયે;

વિસેસો તત્ર પાચિત્તિ, ઇધ પારાજિકં સિયા.

વજ્જપટિચ્છાદિકથા.

૧૯૯૨. સઙ્ઘેનુક્ખિત્તકો ભિક્ખુ, ઠિતો ઉક્ખેપને પન;

યંદિટ્ઠિકો ચ સો તસ્સા, દિટ્ઠિયા ગહણેન તં.

૧૯૯૩. અનુવત્તેય્ય યા ભિક્ખું, ભિક્ખુની સા વિસુમ્પિ ચ;

સઙ્ઘમજ્ઝેપિ અઞ્ઞાહિ, વુચ્ચમાના તથેવ ચ.

૧૯૯૪. અચજન્તીવ તં વત્થું, ગહેત્વા યદિ તિટ્ઠતિ;

તસ્સ કમ્મસ્સ ઓસાને, ઉક્ખિત્તસ્સાનુવત્તિકા.

૧૯૯૫. હોતિ પારાજિકાપન્ના, હોતાસાકિયધીતરા;

પુન અપ્પટિસન્ધેયા, દ્વિધા ભિન્ના સિલા વિય.

૧૯૯૬. અધમ્મે પન કમ્મસ્મિં, નિદ્દિટ્ઠં તિકદુક્કટં;

સમુટ્ઠાનાદયો સબ્બે, વુત્તા સમનુભાસને.

ઉક્ખિત્તાનુવત્તિકકથા.

૧૯૯૭. અપારાજિકખેત્તસ્સ, ગહણં યસ્સ કસ્સચિ;

અઙ્ગસ્સ પન તં હત્થ-ગ્ગહણન્તિ પવુચ્ચતિ.

૧૯૯૮. પારુતસ્સ નિવત્થસ્સ, ગહણં યસ્સ કસ્સચિ;

એતં સઙ્ઘાટિયા કણ્ણ-ગ્ગહણન્તિ પવુચ્ચતિ.

૧૯૯૯. કાયસંસગ્ગસઙ્ખાત-અસદ્ધમ્મસ્સ કારણા;

ભિક્ખુની હત્થપાસસ્મિં, તિટ્ઠેય્ય પુરિસસ્સ વા.

૨૦૦૦. સલ્લપેય્ય તથા તત્થ, ઠત્વા તુ પુરિસેન વા;

સઙ્કેતં વાપિ ગચ્છેય્ય, ઇચ્છેય્યા ગમનસ્સ વા.

૨૦૦૧. તદત્થાય પટિચ્છન્ન-ટ્ઠાનઞ્ચ પવિસેય્ય વા;

ઉપસંહરેય્ય કાયં વા, હત્થપાસે ઠિતા પન.

૨૦૦૨. અયમસ્સમણી હોતિ, વિનટ્ઠા અટ્ઠવત્થુકા;

અભબ્બા પુનરુળ્હાય, છિન્નો તાલોવ મત્થકે.

૨૦૦૩. અનુલોમેન વા વત્થું, પટિલોમેન વા ચુતા;

અટ્ઠમં પરિપૂરેન્તી, તથેકન્તરિકાય વા.

૨૦૦૪. અથાદિતો પનેકં વા, દ્વે વા તીણિપિ સત્ત વા;

સતક્ખત્તુમ્પિ પૂરેન્તી, નેવ પારાજિકા સિયા.

૨૦૦૫. આપત્તિયો પનાપન્ના, દેસેત્વા તાહિ મુચ્ચતિ;

ધુરનિક્ખેપનં કત્વા, દેસિતા ગણનૂપિકા.

૨૦૦૬. ન હોતાપત્તિયા અઙ્ગં, સઉસ્સાહાય દેસિતા;

દેસનાગણનં નેતિ, દેસિતાપિ અદેસિતા.

૨૦૦૭. અનાપત્તિ અસઞ્ચિચ્ચ, અજાનિત્વા કરોન્તિયા;

સમુટ્ઠાનાદયો સબ્બે, અનન્તરસમા મતા.

૨૦૦૮. ‘‘અસદ્ધમ્મો’’તિ નામેત્થ, કાયસંસગ્ગનામકો;

અયમુદ્દિસિતો અત્થો, સબ્બઅટ્ઠકથાસુપિ.

૨૦૦૯. વિઞ્ઞૂ પટિબલો કાય-સંસગ્ગં પટિપજ્જિતું;

કાયસંસગ્ગભાવે તુ, સાધકં વચનં ઇદં.

અટ્ઠવત્થુકકથા.

૨૦૧૦. અવસ્સુતા પટિચ્છાદી, ઉક્ખિત્તા અટ્ઠવત્થુકા;

અસાધારણપઞ્ઞત્તા, ચતસ્સોવ મહેસિના.

પારાજિકકથા નિટ્ઠિતા.

સઙ્ઘાદિસેસકથા

૨૦૧૧. યા પન ભિક્ખુની ઉસ્સયવાદા;

અટ્ટકરી મુખરી વિહરેય્ય;

યેન કેનચિ નરેનિધ સદ્ધિં;

સા ગરુકં કિર દોસમુપેતિ.

૨૦૧૨. સક્ખિં વાપિ સહાયં વા, પરિયેસતિ દુક્કટં;

પદે પદે તથા અટ્ટં, કાતું ગચ્છન્તિયાપિ ચ.

૨૦૧૩. આરોચેતિ સચે પુબ્બં, ભિક્ખુની અત્તનો કથં;

દિસ્વા વોહારિકં તસ્સા, હોતિ આપત્તિ દુક્કટં.

૨૦૧૪. આરોચેતિ સચે પચ્છા, ઇતરો અત્તનો કથં;

હોતિ ભિક્ખુનિયા તસ્સા, થુલ્લચ્ચયમનન્તરં.

૨૦૧૫. આરોચેતિતરો પુબ્બં, સચે સો અત્તનો કથં;

પચ્છા ભિક્ખુની ચે પુબ્બ-સદિસોવ વિનિચ્છયો.

૨૦૧૬. ‘‘આરોચેહી’’તિ વુત્તા ચે, ‘‘કથં તવ મમાપિ ચ’’;

આરોચેતુ યથાકામં, પઠમે દુક્કટં સિયા.

૨૦૧૭. દુતિયારોચને તસ્સા, થુલ્લચ્ચયમુદીરિતં;

ઉપાસકેન વુત્તેપિ, અયમેવ વિનિચ્છયો.

૨૦૧૮. આરોચિતકથં સુત્વા, ઉભિન્નમ્પિ યથા તથા;

વિનિચ્છયે કતે તેહિ, અટ્ટે પન ચ નિટ્ઠિતે.

૨૦૧૯. અટ્ટસ્સ પરિયોસાને, જયે ભિક્ખુનિયા પન;

પરાજયેપિ વા તસ્સા, હોતિ સઙ્ઘાદિસેસતા.

૨૦૨૦. દૂતં વાપિ પહિણિત્વા, આગન્ત્વાન સયમ્પિ વા;

પચ્ચત્થિકમનુસ્સેહિ, આકડ્ઢીયતિ યા પન.

૨૦૨૧. આરામે પન અઞ્ઞેહિ, અનાચારં કતં સચે;

અનોદિસ્સ પરં કિઞ્ચિ, રક્ખં યાચતિ તત્થ યા.

૨૦૨૨. યાય કિઞ્ચિ અવુત્તાવ, ધમ્મટ્ઠા સયમેવ તુ;

સુત્વા તં અઞ્ઞતો અટ્ટં, નિટ્ઠાપેન્તિ સચે પન.

૨૦૨૩. તસ્સા, ઉમ્મત્તિકાદીન-મનાપત્તિ પકાસિતા;

કથિનેન સમુટ્ઠાનં, તુલ્યં સકિરિયં ઇદં.

અટ્ટકારિકથા.

૨૦૨૪. જાનન્તી ભિક્ખુની ચોરિં, વજ્ઝં વિદિતમેવ યા;

સઙ્ઘં અનપલોકેત્વા, રાજાનં ગણમેવ વા.

૨૦૨૫. વુટ્ઠાપેય્ય વિના કપ્પં, ચોરિવુટ્ઠાપનં પન;

સઙ્ઘાદિસેસમાપત્તિ-માપન્ના નામ હોતિ સા.

૨૦૨૬. પઞ્ચમાસગ્ઘનં યાય, હરિતં પરસન્તકં;

અતિરેકગ્ઘનં વાપિ, અયં ‘‘ચોરી’’તિ વુચ્ચતિ.

૨૦૨૭. ભિક્ખુનીસુ પનઞ્ઞાસુ, તિત્થિયેસુપિ વા તથા;

યા પબ્બજિતપુબ્બા સા, અયં ‘‘કપ્પા’’તિ વુચ્ચતિ.

૨૦૨૮. વુટ્ઠાપેતિ ચ યા ચોરિં, ઠપેત્વા કપ્પમેવિદં;

સચે આચરિનિં પત્તં, ચીવરં પરિયેસતિ.

૨૦૨૯. સમ્મન્નતિ ચ સીમં વા, તસ્સા આપત્તિ દુક્કટં;

ઞત્તિયા દુક્કટં દ્વીહિ, કમ્મવાચાહિ ચ દ્વયં.

૨૦૩૦. થુલ્લચ્ચયસ્સ, કમ્મન્તે, ગરુકં નિદ્દિસે બુધો;

ગણો આચરિની ચેવ, ન ચ મુચ્ચતિ દુક્કટં.

૨૦૩૧. અનાપત્તિ અજાનન્તી, વુટ્ઠાપેતિ, તથેવ ચ;

કપ્પં વા અપલોકેત્વા, તસ્સા ઉમ્મત્તિકાય વા.

૨૦૩૨. ચોરિવુટ્ઠાપનં નામ, જાયતે વાચચિત્તતો;

કાયવાચાદિતો ચેવ, સચિત્તઞ્ચ ક્રિયાક્રિયં.

ચોરિવુટ્ઠાપનકથા.