સઙ્ઘાદિસેસકથા

૩૨૫. મોચેતુકામતાચિત્તં, વાયામો સુક્કમોચનં;

અઞ્ઞત્ર સુપિનન્તેન, હોતિ સઙ્ઘાદિસેસતા.

૩૨૬. પરેનુપક્કમાપેત્વા, અઙ્ગજાતં પનત્તનો;

સુક્કં યદિ વિમોચેતિ, ગરુકં તસ્સ નિદ્દિસે.

૩૨૭. સઞ્ચિચ્ચુપક્કમન્તસ્સ, અઙ્ગજાતં પનત્તનો;

થુલ્લચ્ચયં સમુદ્દિટ્ઠં, સચે સુક્કં ન મુચ્ચતિ.

૩૨૮. સઞ્ચિચ્ચુપક્કમન્તસ્સ, આકાસે કમ્પનેનપિ;

હોતિ થુલ્લચ્ચયં તસ્સ, યદિ સુક્કં ન મુચ્ચતિ.

૩૨૯. વત્થિં કીળાય પૂરેત્વા, પસ્સાવેતું ન વટ્ટતિ;

નિમિત્તં પન હત્થેન, કીળાપેન્તસ્સ દુક્કટં.

૩૩૦. તિસ્સન્નં પન ઇત્થીનં, નિમિત્તં રત્તચેતસા;

પુરતો પચ્છતો વાપિ, ઓલોકેન્તસ્સ દુક્કટં.

૩૩૧. એકેનેકં પયોગેન, દિવસમ્પિ ચ પસ્સતો;

નાપત્તિયા ભવે અઙ્ગં, ઉમ્મીલનનિમીલનં.

૩૩૨. અમોચનાધિપ્પાયસ્સ, અનુપક્કમતોપિ ચ;

સુપિનન્તેન મુત્તસ્મિં, અનાપત્તિ પકાસિતા.

સુક્કવિસટ્ઠિકથા.

૩૩૩. આમસન્તો મનુસ્સિત્થિં, કાયસંસગ્ગરાગતો;

‘‘મનુસ્સિત્થી’’તિ સઞ્ઞાય, હોતિ સઙ્ઘાદિસેસિકો.

૩૩૪. લોમેનન્તમસો લોમં, ફુસન્તસ્સાપિ ઇત્થિયા;

કાયસંસગ્ગરાગેન, હોતિ આપત્તિ ભિક્ખુનો.

૩૩૫. ઇત્થિયા યદિ સમ્ફુટ્ઠો, ફસ્સં સેવનચેતનો;

વાયમિત્વાધિવાસેતિ, હોતિ સઙ્ઘાદિસેસતા.

૩૩૬. એકેન પન હત્થેન, ગહેત્વા દુતિયેન વા;

તત્થ તત્થ ફુસન્તસ્સ, એકાવાપત્તિ દીપિતા.

૩૩૭. અગ્ગહેત્વા ફુસન્તસ્સ, યાવ પાદઞ્ચ સીસતો;

કાયા હત્થમમોચેત્વા, એકાવ દિવસમ્પિ ચ.

૩૩૮. અઙ્ગુલીનં તુ પઞ્ચન્નં, ગહણે એકતો પન;

એકાયેવ સિયાપત્તિ, ન હિ કોટ્ઠાસતો સિયા.

૩૩૯. નાનિત્થીનં સચે પઞ્ચ, ગણ્હાત્યઙ્ગુલિયો પન;

એકતો પઞ્ચ સઙ્ઘાદિ-સેસા હોન્તિસ્સ ભિક્ખુનો.

૩૪૦. ઇત્થિયા વિમતિસ્સાપિ, પણ્ડકાદિકસઞ્ઞિનો;

કાયેન ઇત્થિયા કાય-સમ્બદ્ધં ફુસતોપિ વા.

૩૪૧. પણ્ડકે યક્ખિપેતીસુ, તસ્સ થુલ્લચ્ચયં સિયા;

દુક્કટં કાયસંસગ્ગે, તિરચ્છાનગતિત્થિયા.

૩૪૨. ભિક્ખુનો પટિબદ્ધેન, કાયેન પન ઇત્થિયા;

કાયેન પટિબદ્ધઞ્ચ, ફુસન્તસ્સપિ દુક્કટં.

૩૪૩. ઇત્થીનં ઇત્થિરૂપઞ્ચ, દારુલોહમયાદિકં;

તાસં વત્થમલઙ્કારં, આમસન્તસ્સ દુક્કટં.

૩૪૪. તત્થજાતફલં ખજ્જં, મુગ્ગાદિં તત્થજાતકં;

ધઞ્ઞાનિ પન સબ્બાનિ, આમસન્તસ્સ દુક્કટં.

૩૪૫. સબ્બં ધમનસઙ્ખાદિં, પઞ્ચઙ્ગતુરિયમ્પિ ચ;

રતનાનિ ચ સબ્બાનિ, આમસન્તસ્સ દુક્કટં.

૩૪૬. સબ્બમાવુધભણ્ડઞ્ચ, જિયા ચ ધનુદણ્ડકો;

અનામાસમિદં સબ્બં, જાલઞ્ચ સરવારણં.

૩૪૭. સુવણ્ણપટિબિમ્બાદિ, ચેતિયં આરકૂટકં;

અનામાસન્તિ નિદ્દિટ્ઠં, કુરુન્દટ્ઠકથાય હિ.

૩૪૮. સબ્બં ઓનહિતું વાપિ, ઓનહાપેતુમેવ વા;

વાદાપેતુઞ્ચ વાદેતું, વાદિતં ન ચ વટ્ટતિ.

૩૪૯. ‘‘કરિસ્સામુપહાર’’ન્તિ, વુત્તેન પન ભિક્ખુના;

પૂજા બુદ્ધસ્સ કાતબ્બા, વત્તબ્બાતિ ચ વિઞ્ઞુના.

૩૫૦. સયં ફુસિયમાનસ્સ, ઇત્થિયા પન ધુત્તિયા;

અવાયમિત્વા કાયેન, ફસ્સં પટિવિજાનતો.

૩૫૧. અનાપત્તિ અસઞ્ચિચ્ચ, અજાનન્તસ્સ ભિક્ખુનો;

મોક્ખાધિપ્પાયિનો ચેવ, તથા ઉમ્મત્તકાદિનો.

૩૫૨. પઠમેન સમાનાવ, સમુટ્ઠાનાદયો પન;

કાયસંસગ્ગરાગસ્સ, તથા સુક્કવિસટ્ઠિયા.

કાયસંસગ્ગકથા.

૩૫૩. દુટ્ઠુલ્લવાચસ્સાદેન, ઇત્થિયા ઇત્થિસઞ્ઞિનો;

દ્વિન્નઞ્ચ પન મગ્ગાનં, વણ્ણાવણ્ણવસેન ચ.

૩૫૪. મેથુનયાચનાદીહિ, ઓભાસન્તસ્સ ભિક્ખુનો;

વિઞ્ઞું અન્તમસો હત્થ-મુદ્દાયપિ ગરું સિયા.

૩૫૫. ‘‘સિખરણીસિ, સમ્ભિન્ના, ઉભતોબ્યઞ્જના’’તિ ચ;

અક્કોસવચનેનાપિ, ગરુકં તુ સુણન્તિયા.

૩૫૬. પુનપ્પુનોભાસન્તસ્સ, એકવાચાય વા બહૂ;

ગણનાય ચ વાચાનં, ઇત્થીનં ગરુકા સિયું.

૩૫૭. સા ચે નપ્પટિજાનાતિ, તસ્સ થુલ્લચ્ચયં સિયા;

આદિસ્સ ભણને ચાપિ, ઉબ્ભજાણુમધક્ખકં.

૩૫૮. ઉબ્ભક્ખકમધોજાણુ-મણ્ડલં પન ઉદ્દિસં;

વણ્ણાદિભણને કાય-પટિબદ્ધે ચ દુક્કટં.

૩૫૯. થુલ્લચ્ચયં ભવે તસ્સ, પણ્ડકે યક્ખિપેતિસુ;

અધક્ખકોબ્ભજાણુમ્હિ, દુક્કટં પણ્ડકાદિસુ.

૩૬૦. ઉબ્ભક્ખકમધોજાણુ-મણ્ડલેપિ અયં નયો;

સબ્બત્થ દુક્કટં વુત્તં, તિરચ્છાનગતિત્થિયા.

૩૬૧. અત્થધમ્મપુરેક્ખારં, કત્વા ઓભાસતોપિ ચ;

વદતોપિ અનાપત્તિ, પુરક્ખત્વાનુસાસનિં.

૩૬૨. તથા ઉમ્મત્તકાદીનં, સમુટ્ઠાનાદયો નયા;

અદિન્નાદાનતુલ્યાવ, વેદનેત્થ દ્વિધા મતા.

દુટ્ઠુલ્લવાચાકથા.

૩૬૩. વણ્ણં પનત્તનો કામ-પારિચરિયાય ભાસતો;

તસ્મિંયેવ ખણે સા ચે, જાનાતિ ગરુકં સિયા.

૩૬૪. નો ચે જાનાતિ સા યક્ખિ-પેતિદેવીસુ પણ્ડકે;

હોતિ થુલ્લચ્ચયં તસ્સ, સેસે આપત્તિ દુક્કટં.

૩૬૫. ચીવરાદીહિ અઞ્ઞેહિ, વત્થુકામેહિ અત્તનો;

નત્થિ દોસો ભણન્તસ્સ, પારિચરિયાય વણ્ણનં.

૩૬૬. ઇત્થિસઞ્ઞા મનુસ્સિત્થી, પારિચરિયાય રાગિતા;

ઓભાસો તેન રાગેન, ખણે તસ્મિં વિજાનનં.

૩૬૭. પઞ્ચઙ્ગાનિ ઇમાનેત્થ, વેદિતબ્બાનિ વિઞ્ઞુના;

સમુટ્ઠાનાદયોપ્યસ્સ, અનન્તરસમા મતા.

અત્તકામપારિચરિયકથા.

૩૬૮. પટિગ્ગણ્હાતિ સન્દેસં, પુરિસસ્સિત્થિયાપિ વા;

વીમંસતિ ગરુ હોતિ, પચ્ચાહરતિ ચે પન.

૩૬૯. ‘‘યસ્સા હિ સન્તિકં ગન્ત્વા, આરોચેહી’’તિ પેસિતો;

તમદિસ્વા તદઞ્ઞસ્સ, અવસ્સારોચકસ્સ સો.

૩૭૦. ‘‘આરોચેહી’’તિ વત્વા તં, પચ્ચાહરતિ ચે પન;

ભિક્ખુ સઙ્ઘાદિસેસમ્હા, સઞ્ચરિત્તા ન મુચ્ચતિ.

૩૭૧. ‘‘માતરા રક્ખિતં ઇત્થિં, ગચ્છ બ્રૂહી’’તિ પેસિતો;

પિતુરક્ખિતમઞ્ઞં વા, વિસઙ્કેતોવ ભાસતો.

૩૭૨. પટિગ્ગણ્હનતાદીહિ, તીહિ અઙ્ગેહિ સંયુતે;

સઞ્ચરિત્તે સમાપન્ને, ગરુકાપત્તિમાદિસે.

૩૭૩. દ્વીહિ થુલ્લચ્ચયં વુત્તં, પણ્ડકાદીસુ તીહિપિ;

એકેનેવ ચ સબ્બત્થ, હોતિ આપત્તિ દુક્કટં.

૩૭૪. ચેતિયસ્સ ચ સઙ્ઘસ્સ, ગિલાનસ્સ ચ ભિક્ખુનો;

ગચ્છતો પન કિચ્ચેન, અનાપત્તિ પકાસિતા.

૩૭૫. મનુસ્સત્તં તથા તસ્સા, નનાલંવચનીયતા;

પટિગ્ગણ્હનતાદીનં, વસા પઞ્ચઙ્ગિકં મતં.

૩૭૬. ઇદઞ્હિ છસમુટ્ઠાનં, અચિત્તકમુદીરિતં;

અલંવચનીયત્તં વા, પણ્ણત્તિં વા અજાનતો.

૩૭૭. ગહેત્વા સાસનં કાય-વિકારેનૂપગમ્મ તં;

વીમંસિત્વા હરન્તસ્સ, ગરુકં કાયતો સિયા.

૩૭૮. સુત્વા યથાનિસિન્નોવ, વચનં ઇત્થિયા પુન;

તં તત્થેવાગતસ્સેવ, આરોચેન્તસ્સ વાચતો.

૩૭૯. અજાનન્તસ્સ પણ્ણત્તિં, કાયવાચાહિ તં વિધિં;

કરોતો હરતો વાપિ, ગરુકં કાયવાચતો.

૩૮૦. જાનિત્વાપિ કરોન્તસ્સ, ગરુકાપત્તિયો તથા;

સચિત્તકેહિ તીહેવ, સમુટ્ઠાનેહિ જાયરે.

સઞ્ચરિત્તકથા.

૩૮૧. સયંયાચિતકેહેવ, કુટિકં અપ્પમાણિકં;

અત્તુદ્દેસં કરોન્તસ્સ, તથાદેસિતવત્થુકં.

૩૮૨. હોન્તિ સઙ્ઘાદિસેસા દ્વે, સારમ્ભાદીસુ દુક્કટં;

સચે એકવિપન્ના સા, ગરુકં એકકં સિયા.

૩૮૩. પુરિસં યાચિતું કમ્મ-સહાયત્થાય વટ્ટતિ;

મૂલચ્છેજ્જવસેનેવ, યાચમાનસ્સ દુક્કટં.

૩૮૪. અવજ્જં હત્થકમ્મમ્પિ, યાચિતું પન વટ્ટતિ;

હત્થકમ્મમ્પિ નામેતં, કિઞ્ચિ વત્થુ ન હોતિ હિ.

૩૮૫. ગોણમાયાચમાનસ્સ, ઠપેત્વા ઞાતકાદિકે;

દુક્કટં તસ્સ નિદ્દિટ્ઠં, મૂલચ્છેજ્જેન તેસુપિ.

૩૮૬. ‘‘ગોણં દેમા’’તિ વુત્તેપિ, ગહેતું ન ચ વટ્ટતિ;

સકટં દારુભણ્ડત્તા, ગહેતું પન વટ્ટતિ.

૩૮૭. વાસિફરસુકુદ્દાલ-કુઠારાદીસ્વયં નયો;

અનજ્ઝાવુત્થકં સબ્બં, હરાપેતુમ્પિ વટ્ટતિ.

૩૮૮. વલ્લિઆદિમ્હિ સબ્બસ્મિં, ગરુભણ્ડપ્પહોનકે;

પરેસં સન્તકેયેવ, હોતિ આપત્તિ દુક્કટં.

૩૮૯. પચ્ચયેસુ હિ તીસ્વેવ, વિઞ્ઞત્તિ ન ચ વટ્ટતિ;

તતિયે પરિકથોભાસ-નિમિત્તાનિ ચ લબ્ભરે.

૩૯૦. ‘‘અદેસિતે ચ વત્થુસ્મિં, પમાણેનાધિકં કુટિં;

કરિસ્સામી’’તિ ચિન્તેત્વા, અરઞ્ઞં ગચ્છતોપિ ચ.

૩૯૧. ફરસું વાપિ વાસિં વા, નિસેન્તસ્સાપિ દુક્કટં;

છિન્દતો દુક્કટં રુક્ખં, તસ્સ પાચિત્તિયા સહ.

૩૯૨. એવં પુબ્બપયોગસ્મિં, કુટિકારકભિક્ખુનો;

યથાપયોગમાપત્તિં, વિનયઞ્ઞૂ વિનિદ્દિસે.

૩૯૩. યા પન દ્વીહિ પિણ્ડેહિ, નિટ્ઠાનં તુ ગમિસ્સતિ;

હોતિ થુલ્લચ્ચયં તેસુ, પઠમે દુતિયે ગરુ.

૩૯૪. અનાપત્તિ સચઞ્ઞસ્સ, દેતિ વિપ્પકતં કુટિં;

તથા ભૂમિં સમં કત્વા, ભિન્દતોપિ ચ તં કુટિં.

૩૯૫. ગુહં લેણં કરોન્તસ્સ, તિણપણ્ણચ્છદમ્પિ વા;

વાસાગારં ઠપેત્વાન, અઞ્ઞસ્સત્થાય વા તથા.

૩૯૬. દેસાપેત્વાવ ભિક્ખૂહિ, વત્થું પન ચ ભિક્ખુનો;

ક્રિયતોવ સમુટ્ઠાતિ, કરોતો અપ્પમાણિકં.